Read Baltic Romani Bible 2019 – Библия - Пэ Балтитко Романи чиб (Романэс) 2019 Филипийцэнгэ 4 Bible Online

Филипийцэнгэ 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Филипийцэнгэ 4

¹И адя́кэ, мирэ́ дро́га, савэ́н мэ кама́м тэ дыкха́в, тумэ́ сан мири́ ра́дыма и бахт, тэрдён зоралэ́с дро пэ́скиро джиибэ́н дрэ Растэ — Дэвлэ́стэ.

²Манга́ва Еводия, и Синтихияс тэ думинэн адя́кэ-паць дрэ Растэ-Дэвлэ́стэ;

³и мэ манга́ва и тут, миро чачуно́ мал пир буты́, тэ дэс васт лэ́нгэ, адалэ́ джувленгэ, савэ́ лынэпэ тэ роспхэнэ́н бахталы́ зан (звесь) кхэтанэ́ ма́нца, и Климентоса и явирэ мирэ́ малэнца пир буты́, савэнгирэ лава́ исын дрэ Дэвлэ́скирэ-джиибна́скири лылвари́.

⁴Радынэ́нпэ ўса́ды (сак) дро тумаро́ екхипэ́н Ра́са-Дэвлэ́са: и мэ нэвэ́стыр пхэна́ва: “Радынэ́нпэ.”

⁵Мэк сарэ́ мануша́ тэ джинэ́н тумарэ́-илэ́скиро ковлыпэн, Рай Дэвэ́л исын сарэ́са пашы́л.

⁶На пхагирэн шэро́ пэ́скэ ни пал со, нэ кажно мо́ло, ке́ли тумэ́ мангэ́напэ Дэвлэ́скэ, мангэ́нпэ парикирибнаса тэ отчхакирэн пэ́скирэ патерья (молитвы) анги́л Дэвлэ́стэ;

⁷и Дэвлэ́скиро рама́нё (миро), саво́ исын вучэды́р кажнонэ́ амарэ́ джиныбнастыр, явэ́ла тэ ракхэ́л тумарэ́ илэ и годы́ дро екхипэ́н Исусо́са Христосо́са.

⁸И акэ, пшала́лэ мирэ́, саро́, со исын чачуно́, со нанэ хохано́, со исын патяибны́тко, со исын жужо́, со исын мол тэ сыкавэ́л паты́в, со исын патывало, ко́ли исын вари-саво́ лачхипэ́н и вари-саво́ шарибэ́н, екх пал дава́ тумэ́ думинэн.

⁹Саро́, со тумэ́ высыклынэ, и со прилынэ́ и шундлэ́, ци со тумэ́ дыкхнэ́ дрэ ма́ндэ, дова́ и кэрэ́н, и Дэвлэ́скиро рама́нё (миро) явэ́ла тумэ́нца.

¹⁰Мэ древа́н обрадындёмпэ дро екхипэ́н Ра́са-Дэвлэ́са, со тумэ́ какана́ лынэ́ тэ пэкэнпэ (тэ заботисон) пал ма́ндэ, тумэ́ и англэды́р пэкнэпэ, нэ тумэ́нгэ на сыс саштыпэн (возможность/ваканцыя).

¹¹Мэ ракира́ва дава́ на палдова́, со ма́нгэ вари-со трэй; нэ палдова́ со мэ присыклыём тэ явав радо сарэскэ, со ма́ндэ исын.

¹²Мэ джина́в тэ джива́в и дро чорорипэн и дро миштыпэ́н, мэ высыклыём сарэскэ и дро саро́, тэ явав чало и тэ вырикирав бокх, тэ явав дро миштыпэ́н и тэ явав дро наухтылыбэн.

¹³Мэ саро́ могина́ва тэ вырикирав зорья́са, сави́ Христо́со дэ́ла ма́нгэ.

¹⁴Нэ тумэ́ шука́р кэрдэ́, со дынэ́ васт, ке́ли ма́ндэ сыс би́да.

¹⁵Нэ и тумэ́ джинэ́на, Филипийцалэ, со сыр мэ лыём тэ роспхэнав бахталы́ зан (звесь), ке́ли мэ выгиём Македониятыр, ни екх кхангири́ на сыс кхэтанэ́ ма́нца и на помогиндя ма́нгэ ловэнца пшалэ́ндыр и на прилыя́ ман апри́ч екхэ тумэ́ндэ;

¹⁶Тумэ́ адя́кэ-паць и дрэ Фесалоника на екх мо́ло бичхавэнас ма́нгэ пэ джиибэ́н.

¹⁷Мэ ракира́ва дава́ на ваш дова́, со мэ родыём ловэ́ пшалэ́ндыр, нэ мэ кама́м, соб (кай) тумэ́ тэ кэрэ́н дова́, со янэ́ла тумэ́нгэ лачхипэ́н.

¹⁸Мэ дорэсцём буты́р, сыр ма́нгэ трэй, мэ сом радо, ке́ли дорэсцём Епафодитостыр саро́, со тумэ́ бичхадэ́ ма́нгэ сы́рбы гудло́ аромато, сыр дро́го свэ́нто дыибэ́н, саво́ исын лачхо́ Дэвлэ́скэ.

¹⁹Нэ мэк миро Дэвэ́л тэ пхэрдякирэл саро́, со тумэ́нгэ трэй пир Пэ́скиро барвалыпэ́н дрэ сла́ва пир Исусо́стэ Христосо́стэ.

²⁰Мэк тэ явэ́л сла́ва амарэ́ Дэвлэ́скэ и Дадэ́скэ пэ сарэ́ ве́ки. Ами́нь.

²¹Пиридэ́н “рама́нё” сарэ́ Исусо́скирэ Христосо́скирэ свэнтонэнгэ. Адя́кэ-паць саро́ пиридэна ‘рама́нё’ тумэ́нгэ сарэ́ пша́ла, савэ́ исын кхэтанэ́ ма́нца, пиридэна “рамане” тумэ́нгэ.

²²Пиридэна “рама́нё” тумэ́нгэ сарэ́ свэ́нта, нэ най буты́р кхенингоскирэ (кесарёскирэ) кхэрэ́стыр.

²³Мэк бахталыпэ́н амарэ́ Ра́скирэ-Дэвлэ́скиро, Исусо́скирэ Христосо́скиро тэ явэ́л сарэ́нца тумэ́нца. Ами́нь.