Read Baltic Romani Bible 2019 – Библия - Пэ Балтитко Романи чиб (Романэс) 2019 Ису́со 4 Bible Online

Ису́со 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Ису́со 4

¹Ке́ли сарэ́ мануша́ пиригинэ́ пирда́л Иорда́но, Рай Дэвэ́л пхэндя́ Исусо́скэ:

²“Лэн пэ́скэ манушэ́ндыр дэшуду́й манушэ́н, пир екхэ манушэ́стэ родыцо́стыр (чангатыр),

³и дэн лэ́нгэ упхэныбэ́н и пхэнэ́н: “Лэн пэ́скэ адатхы́р, машкира́л Иорданос, кай сыс тэрдэ́ твардэс ґэра́ раша́нгирэ, дэшуду́й бара́, и лыджа́н лэн пэ́са, и чхувэ́н лэн пэ рат, кай явэ́на тэ ратькирэн дрэ дая́ рат”.

⁴Ису́со кхардя́ дэшудуен манушэ́н, савэ́н выкэдыя́ Израилёскирэ чхавэ́ндыр, пир екхэ манушэ́стэ родыцо́стыр;

⁵и пхэндя́ лэ́нгэ Ису́со: “Джа́н анги́л Ра́скирэ-Дэвлэ́скиро, тумарэ́ Дэвлэ́скиро ковчэго, машкира́л Иорда́но, и лэн одотхы́р и чхувэ́н пэ пэ́скиро псико́ кажно (сва́ко) ману́ш пир екх бар, пир Израилёскирэ чхавэ́нгирэ-родыцоскиро гиныбэ́н,

⁶соб (кай) ёнэ тэ явэ́н тумэ́ндэ сыр знаме́нии (ґертыка́). Ке́ли пхучэна тумэ́ндыр дро (часо), саво́ явэ́ла тумарэ́ чхавэ́ и пхэнэ́на: “Кэ со тумэ́ндэ далэ́ бара́?”

⁷Тумэ́ пхэнэ́на лэ́нгэ: “Дро рипирибэ́н пал дова́, со пани́ Иорданоскиро розгия́пэ анги́л Ра́скирэ-Дэвлэ́скиро завето́скиро ковчэго; ке́ли ёв гия́ пирда́л Иорда́но, тэды пани́ Иорданоскиро розгия́пэ. Адя́кэ бара́ далэ́ явэ́на ваш Израилёскирэ чхавэ́нгэ рипирибнаса пэ ве́ко”.

⁸И кэрдэ́ Израилёскирэ чхавэ́ адя́кэ, сыр припхэндя́ Ису́со: лынэ́ дэшуду́й бара́ Иорданостыр, сыр ракирдя́ Рай Дэвэ́л Исусо́скэ, пир Израилёскиро чхавэ́нгиро-родыцоскиро гиныбэ́н, и яндлэ́ лэн пэ́са пэ рат, и чхудэ́ лэн одо́й.

⁹И яви́р дэшуду́й бара́ чхудя́ Ису́со машки́р Иорда́но пэ штэ́то, кай сыс тэрдэ́ раша́нгирэ ґэра́, савэ́ лыджинэ́ завето́скиро ковчэго. Ёнэ исын одо́й и кэ дава́ дывэ́с.

¹⁰Рашая́, савэ́ лыджинэ́ ковчэго, сыс тэрдэ́ машки́р Иорда́но, пака кэрдо́ сыс саро́, со Рай Дэвэ́л припхэндя́ Исусо́скэ тэ пхэнэ́с манушэ́нгэ, — адя́кэ, сыр ракирдя́ Мо́йза Исусо́скэ; а мануша́ далэ́ часоса бахталэс пириджанас.

¹¹Ке́ли сарэ́ мануша́ пиригинэ́ Иорда́но, тэды пиригия и Ра́скирэ-Дэвлэ́скиро завето́скиро ковчэго, и рашая́ анги́л манушэ́ндэ;

¹²И чхавэ́ Рувимо́скирэ, и чхавэ́ Гадо́скирэ, и паш Манасия́скиро ро́дыцо пиригинэ́ анги́л Израилёскирэ чхавэ́ндэ мардытконэнца, сыр ракирдя́ лэ́нгэ Мо́йза.

¹³Пашы́л штардэша́ тысёнцы мардытконэнца пэ брань пиригинэ́ анги́л Растэ-Дэвлэ́стэ пэ Ерихоноскирэ лошчыны, соб (кай) тэ марэ́нпэ.

¹⁴Дрэ дова́-паць дывэ́с барьякирдя Рай Дэвэ́л Исусо́с анги́л сарэ́ Израилёскирэ якха́, и ячнэ́ тэ дарэнпэ лэ́ндыр, сыр дардэпэ Мойзастыр, дрэ сарэ́ лэ́скирэ джиибна́скирэ дывэса́.

¹⁵И пхэндя́ Рай Дэвэ́л Исусо́скэ:

¹⁶“Припхэн рашангэ, савэ́ лыджа́на ковчэго досыкаибна́са (откровенияса) тэ выджа́н Иорданостыр”.

¹⁷Ису́со припхэндя́ рашангэ и пхэндя́: “Выджа́н Иорданостыр”.

¹⁸И ке́ли рашая́, савэ́ лыджинэ́ Ра́скирэ-Дэвлэ́скиро завето́скиро ковчэго, выгинэ́ Иорданостыр, тэды, сыр лэ́нгирэ ґэра́ тэрдинэ́ пэ пхув, пани́ Иорданоскиро сы́гэс потхадыя пир пэ́скиро штэ́то и гия́, сыр тася́ и пэ три́то дывэ́с, вучэды́р сарэ́ пэ́скирэ брэгэндыр.

¹⁹И выгинэ́ мануша́ Иорданостыр пэ дэ́што дывэ́с пэрвонэ́-чхонэ́скиро, и чхудэ́ ста́но дрэ Галга́ло, пэ васточно Ерихоноскири риг.

²⁰И дэшуду́й бара́, савэ́ лынэ́ ёнэ Иорданостыр, Ису́со чхудя́ дро Галга́ло.

²¹И пхэндя́ Израилёскирэ чхавэ́нгэ: “Ке́ли спхучэна дрэ пэ́рво часо чхавэ́ тумарэ́ пэ́скирэ дадыр: ‘Со значынэна далэ́ бара́?’”

²²Пхэнэ́н тумарэ́ чхавэ́нгэ: “Израилё пиригия пирда́л саро́ Иорда́но пир шуки́ пхув.”

²³Палдава́ со Рай Дэвэ́л, Дэвэ́л тумаро́, вышутькирдя пани́ Иорданоскиро ваш тумэнкэ, пака тумэ́ пиригинэ́ лэс, адя́кэ-паць сыр Рай Дэвэ́л, Дэвэ́л тумаро́, кэрдя́ Лолэ́ морёса, саво́ вышутькирдя анги́л амэ́ндэ, пака амэ пиригиям лэс,

²⁴соб (кай) сарэ́ пхувья́кирэ мануша́ уджиндлэ́, со васт Ра́скирэ Дэвлэ́скиро исын зорало́, и соб (кай) тумэ́ тэ дарэ́н Ра́стыр-Дэвлэ́стыр, Дэвлэ́стыр тумарэстыр, дрэ сарэ́ дывэса́.