Read Baltic Romani Bible 2019 – Библия - Пэ Балтитко Романи чиб (Романэс) 2019 2 Фесалоникийцэнгэ 2 Bible Online

2 Фесалоникийцэнгэ 2 - Baltic Romani Bible 2019 – Библия - Пэ Балтитко Романи чиб (Романэс) 2019 bible

2 Фесалоникийцэнгэ 2

¹Амэ древа́н мангаса тумэн, пшала́лэ, тэ на кунинэнпэ дро дова́, со амаро́ Рай-Дэвэ́л, Ису́со Христо́со явэ́ла, соб (кай) тэ скэдэл амэн кэ Пэ.

²И соб (кай) тумэ́ тэ на сыгнён тэ зджан годятыр ци и тэ на пиридживэн пал духоскиро сыкаибэ́н, ни лавэ́стыр, ни лылэстыр, сы́рбы дава́ амэ бичхадям, савэ́ выпхэнэна, со Ра́скирэ-Дэвлэ́скиро дывэ́с какана́ явдя́.

³Дыкхэ́н, соб (кай) ние́кх тэ на хохавэ́л тумэн: пал-дова́ со кадава́ дывэ́с на явэ́ла кэ / жы́ко дова́ часо, пака явэ́ла отгиибэн Дэвлэ́стыр и явэ́ла сыкадо грэхэнгиро ману́ш, савэ́скэ трэй тэ хасёл;

⁴ёв явэ́ла тэ джал проти саро́ свэ́нто, со кхарэ́на Дэвлэ́са ци свэнтымаса, адя́кэ, со ёв бэшэ́ла дрэ Дэвлэ́скири Кхангири́ сы́рбы Дэвэ́л и явэ́ла тэ выдэл пэс пал Дэвлэ́стэ.

⁵Нау́што тумэ́ на рипирэна, со мэ, ке́ли со́мас кэ тумэ́, ракирдём тумэ́нгэ пал дава́?

⁶И какана́ тумэ́ джинэ́на, со на домэкэла лэс тэ сыкавэ́л пэс дро лэ́скиро часо.

⁷Пал-дова́ со чораханы бизладоскири зор какана́ кэрэ́ла буты́, и екх пака обрикирэла саро́ дава́, и ёв явэ́ла тэ кэрэ́л дава́ кэ/жы́ко дова́ часо, пака лэ́на лэс криг.

⁸И тэды би законоскиро грэхэнгиро ману́ш сыкавэ́ла пэс, савэ́с Рай Дэвэ́л Ису́со замарэла (мулякирэ́ла) Пэ́скирэ уштэ́нца, ке́ли явэ́ла.

⁹Бизаконоскиро ману́ш явэ́ла налачхэскирэ зорья́са, ёв явэ́ла тэ сыкавэ́л бари зор, и хоханэ́ знаме́нии (ґертыка́) и ди́вы,

¹⁰ёв явэ́ла сарэ́ хохаибнаса ваш манушэ́нгэ, савэ́ хасёна пал дова́, со ёнэ на прилынэ́ чачуны́ паты́в ваш пэ́скиро зракхибэ́н.

¹¹И пал дава́ Дэвэ́л бичхавэ́ла зор лэ́нгэ, соб (кай) ёнэ тэ пэрэ́н тэл дошвалэ сыклякирибэ́н и тэ патя́н хохаибнаскэ.

¹²Мэк тэ явэ́н сэндиндлэ сарэ́, кон на закамдя́ тэ патял чачипнаскэ, нэ выкэдыя́ начачипэ́н.

¹³Нэ амэ́нгэ трэй, пшала́лэ, саро́ часо тэ парикирас Дэвлэ́скэ пал тумэ́ндэ, савэ́н Рай Дэвэ́л выкэдыя́, пал-дова́ со Ёв англэды́р выкэдыя́ тумэн ваш зракхибэ́н пир Духоскири зор и патяибэ́н дро чачипэ́н;

¹⁴кэ саво́ Ёв и кхардя́ тумэн пир амаро́ роспхэныбэн пал бахталы́ зан (звесь), соб (кай) тумэ́ндэ тэ явэ́н паш дрэ сла́ва амарэ́ Ра́скирэ-Дэвлэ́скири, Исусо́скирэ Христососкири.

¹⁵И палдава́, пшала́лэ, явэ́н зоралэ́ пир ду́хо (фа́но) и рикирэнпэ упхэныбнаскэ, савэ́скэ тумэ́ са́нас высыклякирдэ, ци пир лав, ци пир амаро́ лыл.

¹⁶Мэк Кокоро́ амаро́ Рай Дэвэ́л, Ису́со Христо́со, и Дэвэ́л амаро́ Дад, Савэ́скэ яця́м дро́га амэ и дыя́ пир бахталыпэ́н ве́чно подрикирибэ́н и лачхи́ наде́я,

¹⁷тэ подрикирэ́л тумарэ́ илэ и тэ кэрэ́л зоралэды́р тумэн дро кажно лав и лачхо́ рэ́ндо.