Read Baltic Romani Bible 2019 – Библия - Пэ Балтитко Романи чиб (Романэс) 2019 1 Химаскэ 1 Bible Online

1 Химаскэ 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

1 Химаскэ 1

¹Павли́стыр, Исусо́скирэ-Христосо́скирэ Апостолостыр, савэ́с выкэдыя́ Дэвэ́л, амаро́ Зракхибнари (Спасителё) и Рай Дэвэ́л, Ису́со Христо́со, пэ савэ́стэ мэ надеинасапэ,

²Химаскэ, чачунэ́ чхавэ́скэ дро патяибэ́н: мэк тэ дэл бахталыпэ́н, тангипэ́н и рама́нё ту́кэ, амаро́ Дэвэ́л Дад и амаро́ Рай Дэвэ́л, Ису́со Христо́со.

³Ке́ли мэ скэдаваспэ тэ традав кэ Македония, мэ зоралэ́с мангдём тут тэ ячэспэ дрэ Ефесия и тэ припхэнэс одолэ́ манушэ́нгэ тэ на сыклякирэ́н яви́р сыклякирибэ́н,

⁴и тэ на шунэ́н лэ́нгирэ парамыси́тка и роспхэныбэна пал вари-конэ́скиро ро́до би концоскиро (би ягороскиро), савэ́ кэрэ́на буты́р чинга́рд, сыр сыклякирэ́на пал Дэвлэ́скиро патяибэ́н.

⁵Дава́ припхэныбнаскиро чачипэ́н исын дро паты́в кэ яви́р мануша́ жужэ́ илэ́стыр и лачхэ́ патыватыр и чачунэ́ патяибнастыр,

⁶вари-савэ́ мануша́ дуринэ далэ́ дромэ́стыр, и лынэ́ тэ залэнпэ чхучэ́ (пустонэ) ракирибнаса,

⁷ёнэ закамлэ тэ явэ́н Законо́скирэ сыклякирдэ́, нэ ёнэ кокорэ́ на джинэ́на ни дова́, пал со ёнэ ракирэ́на, ни дова́, со ёнэ допхэнэна.

⁸Нэ амэ джина́са, со Зако́но исын лачхо́, ко́ли вари-кон кэрэ́ла пир Зако́но,

⁹амэ джина́са, со Зако́ны исын счхудэ на ваш патяибнытконэ манушэ́скэ, а ваш одолэ́нгэ, савэ́ кэрэ́на на пир Зако́но, и савэ́ на кандэ́на, и савэ́ на патя́на Дэвлэ́скэ, и савэ́ кэрэ́на грэ́хи, и савэ́ исын бидэвлыткарья, и савэ́ исын магирдэ́, и савэ́ ґаздэ́на васт пэ пэ́скирэ дадэ́стэ ци датэ, и савэ́ мулякирэна манушэ́н,

¹⁰савэ́ дживэ́на джувле́нца би сэвлакиро, савэ́ дживэ́на муршэнца сыр джувле́нца, савэ́ чорэна манушэ́н, савэ́ исын хохаибнарья, савэ́ совлахана хоханэ́с сыр якхи́тка.

¹¹Адя́кэ упхэнэла пэ лэ́ндэ славу́тно бахталы́ зан амарэ́ бахтякирдэ Дэвлэ́скири, сави́ сыс допатяндлы ма́нгэ тэ роспхэнав.

¹²И мэ парикирава мирэ́ Ра́скэ-Дэвлэ́скэ, Исусо́скэ Христосо́скэ, Саво́ дыя́ ма́нгэ зор, со Ёв приґалыя ман патяибнытконэса и дыя́ ма́нгэ тэ дынаринав Лэ́скэ,

¹³ма́нгэ, саво́ англэды́р тэлякирдя Дэвлэ́с, и традыя́ дэвлытконэ́ манушэ́н, и кэрдём чорипэ́н лэ́нгэ: нэ Дэвэ́л примангдя ма́нгэ, пал-дова́ со адя́кэ кэрдём пир наджиныбэн и пир напатяибэн.

¹⁴Нэ бахталыпэ́н амарэ́ Ра́скиро-Дэвлэ́скиро сыс сыкадо кэ мэ дро саро́ ла́киро барвалыпэ́н, выкэдыибнаса и илэ́са дрэ Исусо́стэ Христосо́стэ.

¹⁵Кадава́ лав исын патяибны́тко, со Ису́со Христо́со явдя́ дро свэ́то тэ зракхэ́л грехитконэ́н, савэ́ндыр мэ сом най фуеды́р.

¹⁶Нэ ваш дава́ ма́нгэ сыс примангнэ грэ́хи, соб (кай) Ису́со Христо́со тэ сыкавэ́л дрэ ма́ндэ пэрвонэстэ саро́ длуго вырикирибэн, соб (кай) тэ дыкхэ́н одолэ́, савэ́ явэ́на тэ патя́н дрэ Лэ́стэ кэ ве́чно джиибэ́н.

¹⁷Вечнонэ Крали́скэ, саво́ ние́кхвар на мэрэ́ла и дживэ́ла дрэ сарэ́ ве́ки, Набицялэскэ и Екхджинэскэ Дэвлэ́скэ, мэк тэ явэ́л паты́в и сла́ва дрэ сарэ́ ве́ки.

¹⁸Мэ да́ва ту́кэ дава́ упхэныбэ́н, чха́ва миро Хима, сыр анги́л сыс пхэндло́ пал ту́тэ, соб (кай) тэ рикирэспэ кэ далэ́ лава́ и тэ могинэс тэ лыджас свэ́нто марибэ́н,

¹⁹и тэ ракхэ́с патяибэ́н и лачхи́ паты́в, сави́ вари-савэ́ мануша́ хасякирдэ́, и лэ́нгиро патяибэ́н роспыяпэ,

²⁰машки́р лэ́ндэ сыс Именеё и Лександро (Александро), савэ́н мэ отдыём налачхэскэ, соб (кай) ёнэ тэ на тэлякирэн Дэвлэ́с.