Read Baltic Romani Bible 2019 – Библия - Пэ Балтитко Романи чиб (Романэс) 2019 2 Химаскэ 1 Bible Online

2 Химаскэ 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

2 Химаскэ 1

¹Павли́стыр, Исусо́скирэ Христосо́скирэ Апостолостыр, савэ́с Дэвэ́л выкэдыя́ пир Пэ́скири во́ля тэ роспхэнэл пал пхэндло́ джиибэ́н дро екхипэ́н Исусо́са Христосо́са.

²Химаскэ, мирэ́ дрогонэ́ чхавэ́скэ: мэк тэ явэ́л бахталыпэ́н, тангипэ́н, рама́нё Дэвлэ́стыр Дадэ́стыр и амарэстыр Ра́стыр-Дэвлэ́стыр, Исусо́стыр Христосостыр.

³Мэ парикирава Дэвлэ́скэ, Савэ́скэ мэ дынаринава (служынава) адя́кэ, сыр дава́ кэрдэ́ и мирэ́-дадэнги́рэ дада́ сарэ́ жужэ́ патыва́са, палдава́ мэ рипирава пал ту́тэ дро миро мангипэ́н Дэвлэ́скэ раты́ и дывэсэ́,

⁴древа́н ками тэ дыкха́в тут и мэ рипирава тырэ́ ясва, соб (кай) ма́нгэ тэ явэ́л далэ́стыр бари ра́дыма;

⁵мэ рипирава пал тыро́ чачуно́ патяибэ́н; адя́кэ патяндыя тырэ́-дакири дай Лоида и тыри́ дай Евника, мэ джино́м, со дасаво патяибэ́н исын адя́кэ-паць и дрэ ту́тэ.

⁶Пир дая́ причына мэ пхэна́ва ту́кэ тэ рипирэс и тэ рикирэс дрэ пэ́стэ Дэвлэ́скиро тала́но, саво́ ту́кэ дыя́ Дэвэ́л, ке́ли мэ чхудём упрэ́ васта́ пэ ту́тэ.

⁷Пал-дова́ со Дэвэ́л дыя́ амэ́нгэ ду́хо (фа́но) тэ на дарас, а соб (кай) тэ зоралёвас, и паты́в кэ яви́р мануша́, и годы́.

⁸И палдава́ на ладжа тэ допхэнэс пал амарэ́ Растэ-Дэвлэ́стэ, ни ма́ндыр, со мэ сом дро штарибэ́н пал Лэ́стэ, нэ яв кхэтанэ́ ма́нца дрэ мэ́ньки пал бахталы́ зан, пал-дова́ со Дэвэ́л дыя́ зор пэ дава́,

⁹Ёв, Саво́ зракхця́ и кхардя́ амэн кэ свэ́нто джиибэ́н на пир амарэ́ рэ́нды, а пир Пэ́скири дума и бахталыпэ́н, саво́ сыс дыно́ амэ́нгэ пир Исусо́стэ Христосо́стэ анги́л, сыр свэ́то яця́,

¹⁰Саво́ сыкадя́ пэс какана́ амэ́нгэ пир дава́ бахталыпэ́н, сыр явдя́ пэ пхув амаро́ Зракхибнари, Ису́со Христо́со, Саво́ хасякирдя́ мэрибэ́н и отчхакирдя́ дуд (свэ́то) и дыя́ ве́чно джиибэ́н пир бахталы́ зан (звесь);

¹¹ваш сави́ Дэвэ́л чхудя́ ман тэ явав Апостолоса и сыклякирибнаскирэса тэ роспхэнав бахталы́ зан ваш Наюдэ́нгэ.

¹²Пал дава́ мэ и мэнчынавапэ какана́ адя́кэ; нэ мэ на ладжава далэ́стыр, пал-дова́ со мэ джино́м дрэ Конэ́стэ мэ упатяндыём и мэ зоралэ́с (твардэс) джино́м, со Ёв могинэ́ла тэ зракхэ́л дова́, со ёв ма́нгэ допатяндыя анги́л дова́ Дывэ́с, ке́ли Ёв явэ́ла.

¹³Рикир сыр приме́ро (сыкаибэ́н) чачунэ́ лава́, савэ́нгэ мэ сыклякирдём тут, выкэдыибнаса и патяибна́са дро екхипэ́н Исусо́са Христосо́са.

¹⁴Ракх дова́ кучипэ́н, саво́ допатяндыя ту́кэ Свэ́нто Ду́хо (Фа́но), Саво́ дживэ́ла дрэ амэ́ндэ.

¹⁵Ту джинэ́са, со сарэ́ мануша́ Асиятыр мэкнэ́ ман, и кхэтанэ́ лэ́нца Фигело и Ермагено.

¹⁶Мэк Рай Дэвэ́л тэ тангинэ́л Анисифороскиро кхэр, пал-дова́ со ёв бут мо́лы прилэлас ман, и на ладжалас, со мэ сом дро штарибэ́н;

¹⁷а ке́ли ёв сыс кэ Римо, одо́й древа́н родыя ман и латхя́ ман;

¹⁸мэк Рай Дэвэ́л тэ тангинэ́л лэс дро Пэ́скиро Дывэ́с, сыр Ёв явэ́ла; ту фэды́р джинэ́са, ци бут ёв дынариндя́ ма́нгэ дро Ефесо.