Read Baltic Romani Bible 2019 – Библия - Пэ Балтитко Романи чиб (Романэс) 2019 Титоскэ 2 Bible Online

Титоскэ 2 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Титоскэ 2

¹А ту ра́кир дова́, со трэй ваш чачуно́ сыклякирибэ́н;

²соб (кай) пхурэ́ мурша́ тэ явэ́н ракхунэ, соб (кай) ёнэ тэ джинэ́н, сыр трэй пэс тэ лыджа́н, тэ явэ́н годьварэ́ и зоралэ́ дро патяибэ́н, дрэ паты́в кэ яви́р мануша́, дро вырикирибэн;

³соб (кай) пхурэ́ джувля́ адя́кэ-паць тэ ладжан пэс патывалэс, сыр трэй свэнтонэнгэ, тэ на злыджан плётки, и тэ на пьен бут мол, а тэ сыклякирэ́н лачхипнаскэ явирэ манушэ́н;

⁴соб (кай) ёнэ могинэ́нас тэ сыклякирэ́н тэрнэ́ джувле́н тэ сыкавэ́н паты́в пэ́скирэ ромэнгэ, и тэ сыкавэ́н паты́в пэ́скирэ чхавэ́нгэ;

⁵соб (кай) ёнэ тэ явэ́н свэ́нта, жужэ́, тэ рикирэ́н лачхэ́с кхэри́тко хулаибэн; тэ явэ́н лачхэ́, тэ кандэ́н пэ́скирэ ромэн, соб (кай) тэ на явэ́л кошно Дэвлэ́скиро лав.

⁶Тэрнэ́ манушэ́н сыкля́кир адя́кэ-паць, соб (кай) ёнэ тэ обрикирэн пэс:

⁷сыка́в пэс кокоро́ пир сарэ́ лачхэ́ рэ́нды, соб (кай) яви́р мануша́ тэ дыкхэ́н и адя́кэ-паць тэ кэрэ́н лачхипэ́н, сыкля́кир жужыпнаскэ дро ило́, патывалыпнаскэ;

⁸ра́кир чачунэ́ лава́, соб (кай) адалэ́ манушэ́нгэ, савэ́ исын вэ́рги тумарэ́, тэ явэ́л лэ́нгэ ладжаво, и ёнэ тэ на могинэн тэ пхэнэ́н нисаво́ чорипэ́н пал амэ́ндэ:

⁹соб (кай) писха́рья тэ кандэ́н пэ́скирэ хулан дро саро́, тэ кэрэ́н пир ило́ и тэ на обракирэн лэн пала́л;

¹⁰тэ на чорэн нисо́ пэ́скирэ хуландыр, а тэ сыкавэ́н лачхо́ патяибэ́н и тэ явэ́н патяибнытка дро саро́, мэк ёнэ тэ кэрэ́н адя́кэ, соб (кай) сарэ́ тэ кутякирэн амарэ́ Зракхибнарискирэ-Дэвлэ́скиро сыклякирибэ́н.

¹¹Пал-дова́ со явдя́ Дэвлэ́скиро бахталыпэ́н, саво́ зракхэ́ла сарэ́ манушэ́н;

¹²саво́ сыклякирэ́ла амэн, соб (кай) амэ тэ на кэра́с магирипэ́н и тэ дурьёвас свэто́скирэ тырдыпнастыр, тэ джива́с дрэ дава́ ве́ко пир чачипэ́н и дара́са анги́л Дэвлэ́стэ,

¹³и тэ ужакирас лачхи́ наде́я, ке́ли явэ́ла баро́ Дэвэ́л слава́са и амаро́ Зракхибнари, Ису́со Христо́со,

¹⁴Саво́ отдыя́ Пэс пал амэ́ндэ, соб (кай) Ёв тэ зракхэ́л амэн сарэ́ начачунэ рэндэ́ндыр, тэ кэрэ́л амэн жужэ́ манушэ́нца, соб (кай) амэ тэ явас екх Лэ́скирэ манушэ́нца, савэ́ древа́н тырдэнапэ тэ кэрэ́н лачхипэ́н.

¹⁵Сыкля́кир дава́ и сыка́в манушэ́нгэ лэ́нгири банг сарэ́ правоса, соб (кай) нико́н тэ на дыкхэ́л вучипна́стыр пэ ту́тэ.