Read Baltic Romani Bible 2019 – Библия - Пэ Балтитко Романи чиб (Романэс) 2019 Титоскэ 3 Bible Online

Титоскэ 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Титоскэ 3

¹Пхэн ишчо (инкэ́) манушэ́нгэ пал дова́, соб (кай) ёнэ тэ кандэ́н ран и барыдырэ́н, и тэ явэ́н скэдынэ́ тэ кэрэ́н кажно лачхо́ рэ́ндо (де́ло);

²тэ на калякирэн никонэ́с, а тэ явэ́н раманёнэса (мирнонэса), тэ явэ́н штыл (тиха), ковлэ́-илы́тка кэ сарэ́ мануша́.

³Пал-дова́ со и амэ са́мас вари-ке́ли бигодякирэ, на кандыям и амэн; амэ са́мас писха́рья пэ́скирэ-масэнгирэ тырдыпнаскэ, амэ дживдям дро холы́ и зэвлыныпэ́н, древа́н бидыкхцям екх екхэ́с.

⁴А ке́ли амаро́ Дэвэ́л, Зракхибнари, сыкадя́ Пэ́скири лачхэ́-илы́ткима и ла́ска,

⁵на пал чачунэ́ рэ́нды, савэ́ амэ кэрасас, а пал Пэ́скиро тангипэ́н, тэды Ёв зракхця́ амэн пир панескиро болдэипэн кэ нэво́ джиибэ́н и нэвякирдя амари́ годы́ Свэнтонэ́ Духо́са,

⁶Саво́ Ёв пхэрдэ́с дыя́ амэ́нгэ пир Исусо́стэ Христосо́стэ, амарэ́ Зракхибнаристэ,

⁷соб (кай) Дэвэ́л тэ приґалёл амэн чачунэнца пир Пэ́скиро бахталыпэ́н тэ ячас Лэ́скирэ чхавэ́нца дро ве́чно джиибэ́н, ваш саво́ амэ́ндэ исын наде́я.

⁸Дава́ лав исын патяибны́тко, и мэ кама́м, соб (кай) ту тэ ракирэ́с пал дава́ сарэ́ зорья́са дро ду́хо (фа́но) ваш дова́, соб (кай) одолэ́, савэ́ упатя́ндынэ дрэ Дэвлэ́стэ, причхувэ́н зор тэ кэрэ́н лачхэ́ рэ́нды. Дава́ саро́ исын лачхипэ́н и трэй манушэ́нгэ.

⁹Джа́ криг (дурьёв) дурэды́р дылынэ́ пхучибнэндыр и роспхэныбнэндыр пал вари-конэ́скиро ро́до, ци спрэчкэндыр ци марибнэндыр пал лава́ Законо́стыр; пал-дова́ со дава́ на трэй ни конэ́скэ и дасаво ракирибэ́н исын кротконэ годятыр.

¹⁰Рисёв криг манушэ́стыр, саво́ причхувэла зор тэ розчхувэл патяибнаскирэн пэ групы пало́ (после) дава́, сыр ту сыклякирэса лэс екх ци дуй мо́лы,

¹¹ту джинэ́са со адасаво́ ману́ш исын розмэкно и кэрэ́ла грэ́хи, кадалэса ёв сэндякирэ́ла кокоро́ пэс.

¹²Ке́ли мэ бичхава́ва кэ ту Артёмос ци Тихикос, прилэ́ зор сыр сыгэды́р тэ явэс кэ мэ дро Никаполё, пал-дова́ со мэ скэдыёмпэ тэ явав одо́й саро́ ивант (зима).

¹³Зинас, саво́ исын сыклякирдо пир Зако́но, и Аполос, бичха́в дро дром сыр трэй, соб (кай) лэ́нгэ саро́ тэ ухтылэл;

¹⁴и мэк амарэ́ мануша́ адя́кэ-паць тэ сыклён тэ кэрэ́н лачхэ́ рэ́нды, соб (кай) тэ сыклён тэ дэн ра́да пэ дава́, со трэй амэ́нгэ, соб (кай) лэ́нгиро джиибэ́н тэ на явэ́л чхучо́.

¹⁵Пиридэна “паклоно” ту́кэ сарэ́, кон исын ма́нца. Пиридэ “паклоно” сарэ́нгэ, конэ́скэ сам дро́га амэ дро патяибэ́н. Тэ явэ́л бахталыпэ́н сарэ́нца тумэ́нца. Ами́нь.