Read Baltic Romani Bible 2019 – Библия - Пэ Балтитко Романи чиб (Романэс) 2019 Юдэ́нгэ 7 Bible Online

Юдэ́нгэ 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Юдэ́нгэ 7

¹Пал-дова́ со Мелхисэдэ́ко сыс Салимоскиро кра́ли, раша́й Най Вучэдырэскирэ Дэвлэ́скиро, одова́, кон стрэниндя (пирилыя) Авраамос и бахтякирдя́ лэс, ке́ли одова́ рисёлас палэ, сыр мулякирдя́ кралье́н;

²и конэ́скэ Авраа́мо адя́кэ-паць отдыя́ дэ́што паш сарэ́стыр, пал-дова́ со лав Мелхисэдэко значынэ́ла “чачипна́скиро Кра́ли”, и пал-дова́ со ёв сыс Салимоскиро кра́ли, лэ́скиро лав адя́кэ-паць значынэ́ла “Раманёскиро (Мироскиро) Кра́ли”;

³ёв сыс бидадэскиро, бидакиро, нико́н на джиндя́ пал лэ́скиро ро́до; дава́ исын наджиндло адя́кэ-паць, ке́ли ёв бия́ндыя и ке́ли мыя́, Ёв исын сы́рбы Дэвлэ́скиро Чхаво́ и раша́й пэ сарэ́ ве́ки.

⁴Дыкхэ́н, саво́ баро́ ману́ш сыс Мелхисэдэко, конэ́скэ аж баро́ раша́й Авраа́мо дыя́ дэ́што паш пэ́скирэ миштыпна́стыр, саво́ ёв яндя́ марибнастыр.

⁵А кодолэ́ Левиёскирэ чхавэ́, савэ́ ячэ́напэ рашанца пир Зако́но, и ёнэ скэдэ́на дэ́што паш Израилёскирэ манушэ́ндыр, лэ́нгирэ пшалэ́ндыр; мэк ёнэ исын Авраамо́скирэ родо́стыр.

⁶Кадава́ ману́ш нанэ Левиёскирэ родо́стыр, нэ ёв лыя́ дэ́што паш Авраамостыр и бахтякирдя́ лэс, манушэ́с, саво́ ґарэдыр дорэсця́ лав Дэвлэ́стыр.

⁷Дава́ исын чачипэ́н, со кодова́ ману́ш бахтякирэ́ла, кон исын барэды́р одолэ́стыр, савэ́с ёв бахтякирэ́ла.

⁸Рашая́, савэ́ лэ́на дэ́што паш, мэрэ́на, а пал Мелхисэдэкостэ исын пхэндло́, со ёв лэ́ла дэ́што паш, и дживэ́ла.

⁹Сашты́ (можна) тэ пхэнас, со аж кокоро́ Левиё, кон лэ́ла дэ́што паш, плэскирдя дэ́што паш Мелхисэдэкостэ пир Авраамостэ.

¹⁰Пал-дова́ со, ке́ли Мелхисэдэко стрэниндя (пирилыя) Авраамос, тэды Левиё на сыс ишчо (инкэ́) пэ свэ́то Авраамостэ.

¹¹Ко́ли могинэ́нас Левитэ́нгирэ рашая́ тэ кэрэ́н кэ ко́нцо (кэ яго́ро) пэ́скири буты́, сыр рашая́ анги́л Дэвлэ́стэ, пал-дова́ со пир дая́ буты́ Зако́но сыс дыно́ манушэ́нгэ, тэды ваш со трэиндя́ тэ явэ́л яви́р Раша́й дасаво-паць сыр Мелхисэдэко, а на дасаво-паць, соб (кай) тэ кхарэлпэ, со ёв пир Ароноскиро рашаипэн (титуло).

¹²Пал-дова́ со, ко́ли парувэна раша́н, тэды трэй и тэ парувэн Зако́но.

¹³Амаро́ Рай Дэвэ́л, пал Конэ́стэ амэ ракираса какана́, сыс явирэ родо́стыр, савэ́стыр нико́н и ние́кхвар на дынариндя́ пашы́л алта́рё.

¹⁴Амэ джина́са, со амаро́ Рай Дэвэ́л сыс Юда́скирэ родо́стыр, пал Савэ́стэ Мо́йза (Моисеё) нисо́ на пхэндя́ пал рашандэ кадалэ́ родо́стыр.

¹⁵Какана́ амэ буты́р джина́са, со исын яви́р раша́й, саво́ исын адасаво́-паць сыр Мелхисэдэ́ко,

¹⁶Саво́ яця́ раша́са на пир манушэ́нгиро упхэныбэн, сыр дада́, а пир джиибна́скири зор, сави́ нашты́ тэ мулякирэс.

¹⁷Пал-дова́ со Свэ́нто Чхиныбэ́н ракирэ́ла: “Ту сан Раша́й пэ сарэ́ ве́ки, кадасаво́-паць, сыр и Мелхисэдэко сыс.”

¹⁸Палдава́ адя́кэ исын, со пхуранэ́-манушэ́нгиро припхэныбэ́н отпарувэна, пал-дова́ со ёв исын на́лачхо и лэ́стыр нанэ нисаво́ кучипэ́н.

¹⁹Пал-дова́ со Мойза́скиро Законо на кэрдя́ нисо́, соб (кай) вари-со тэ явэ́л бидошакиро; и, ґа́да, амэ́ндэ исын фэдэды́р наде́я, пир сави́ амэ ява́са пашылэды́р кэ Дэвэ́л.

²⁰Адава́ саро́ исын пир Дэвлэ́скири совла́х,

²¹пал-дова́ со сарэ́ яви́р рашая́ ячнэ́ тэ кэрэ́н Дэвлэ́скири буты́ би совлахакиро, а Христо́со яця́ Раша́са (яця́ Раша́й) пир Дэвлэ́скири совла́х, пал-дова́ со пал Лэ́стэ исын пхэндло́: “Рай Дэвэ́л совлахадя́, и Ёв на дэ́лапэ палэ: “Ту сан раша́й пэ сарэ́ ве́ки””,

²²палдава́ Ису́со исын сы́рбы дудвало́ (поручытелё), со нэво́ завето исын фэды́р.

²³И кадасавэ́ рашая́ сыс бут ґарэдыр пир пхурано́ завето, ёнэ мэрэнас и ёнэ на могинэ́нас тэ ячэ́нпэ пэ пэ́скири буты́.

²⁴Нэ Ису́со ячэ́лапэ Раша́са пэ сарэ́ ве́ки, и Лэ́скири буты́ на пиридэлапэ ни конэ́скэ.

²⁵Палдава́ Ису́со могинэ́ла тэ зракхэ́л сарэ́ манушэ́н, савэ́ явэ́на пашылэды́р кэ Дэвэ́л пир Лэ́стэ; Ёв исын ўса́ды (сак) джидо́ тэ мангэ́л Дэвлэ́с пал лэ́ндэ.

²⁶Пал-дова́ со адасаво́ Англатуно́ Раша́й и трэй амэ́нгэ: свэ́нто, лачхэ́-илы́тко, на магирдо́ грэхоса; Дэвэ́л чхудя́ Лэс дрэ риг грэхитконэ́ манушэ́ндыр и ґаздыя́ Лэс вучэ́с дро Болыбна́скиро Раё.

²⁷Лэ́скэ на трэй тэ янэл свэ́нто дыибэ́н кажно дывэ́с, сыр яви́р рашая́ кэрэ́на адя́кэ, савэ́ ґарэдыр янэ́нас свэ́нта дыибэна́ пал пэ́скирэ грэ́хи, и палэ пал манушэ́нгирэ грэ́хи. Христо́со кэрдя́ дава́ е́кхвар, ке́ли отдыя́ Кокоро́ Пэс сыр свэ́нто дыибэ́н пал амарэ́ грэ́хи.

²⁸Пир Мойза́скиро Зако́но чхувэ́на англатунэ́ рашанца манушэ́н, савэ́ исын грэхи́тка; нэ Дэвэ́л чхудя́ Пэ́скирэ Чхавэ́с пир совла́х, со сыс пало́ (после) Зако́но, Лэс, Саво́ исын бидошакиро пэ сарэ́ ве́ки.