Read Baltic Romani Bible 2019 – Библия - Пэ Балтитко Романи чиб (Романэс) 2019 Яков 1 Bible Online

Яков 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Яков 1

¹Яково, саво́ исын Дэвлэ́скиро и Ра́скирэ-Дэвлэ́скиро, Исусо́скирэ Христосо́скиро писха́ри (рабо), бичхавэ́ла миро (рама́нё) Юдэ́нгирэ дэшудуе́ родэ́нгэ, савэ́ исын росчхурдынэ пир свэ́то машкира́л Наюдэ́ндэ.

²Пшала́лэ мирэ́, гинэн пал бари ра́дыма, ке́ли тумэн пропатякирэна пир яви́р (разнэс),

³и джинэ́н тумэ́, со пропатякирибэн кэрэ́ла тумаро́ патяибэ́н зоралэды́р.

⁴Тумаро зорало́ патяибэ́н тэ вырикирэл кэрэ́ла бидошакиро рэ́ндо (де́ло), соб (кай) тумэ́ тэ явэ́н лачхэ́ и бидошакирэ пир саро́, соб (кай) тэ на явэ́л ни саво́ наухтылыбэн тумэ́ндэ.

⁵Ко́ли вари-конэ́стэ тумэ́ндыр на ухтылэл (на́доси) годы́, то мэк ёв тэ мангэ́л Дэвлэ́стыр, Саво́ дэ́ла сарэ́нгэ, кон камэ́ла, и Саво́ на выракирэла, а дэ́ла лэ́скэ:

⁶нэ мэк ёв тэ мангэ́л патяибна́са; мэк ёв тэ на кунинэлапэ. Пал-дова́ со кон нанэ зоралэ́с тэрдо́ дро пэ́скиро патяибэ́н, одова́ исын сы́рбы морёскири вална (вэлна), сави́ балва́л ґаздэ́ла, и нэвэ́стыр чхурдэ́ла палэ:

⁷мэк тэ на думинэл адасаво́ ману́ш, со ёв дорэсэ́ла вари-со Ра́стыр-Дэвлэ́стыр;

⁸адасаво́ ману́ш исын балвалитко и чхурдэлапэ пэ дуй рига́, нанэ зорало́ пир ду́хо (фа́но) дрэ сарэ́ пэ́скирэ дрома́.

⁹А пшал, саво́ исын притасадо, мэк тэ шарэлпэ ёв долэса, со исын лэ́скэ дыно́ вучипна́стыр,

¹⁰и барвало́ ману́ш, мэк ёв тэ шарэлпэ, ке́ли мануша́ ладжакирэна лэс, пал-дова́ со явэ́ла часо и лэ́скиро барвалыпэ́н хасёла, сыр фэлды́тка лулудя́ (цвэты) пир чар.

¹¹Пал-дова́ со уштэ́ла кхам и шутькирэла чар пэ́скирэ хачкирибнаса, и ла́кирэ лулудя́ (цвэты) пэрэ́на, и саро́ шукарибэн хасёла, адя́кэ-паць и хасёла барвало́ ману́ш сарэ́са, со ёв кэрдя́.

¹²Бахтало́ исын одова́ ману́ш, саво́ зоралэ́с вырикирэ́ла пропатякирибэн, пал-дова́ со, ко́ли ёв вырикирдя пропатякирибэн, ёв дорэсэ́ла джиибна́скири вя́нка, пал сави́ Дэвэ́л дыя́ лав сарэ́ манушэ́нгэ, конэ́скэ исын дро́го Ёв.

¹³Ке́ли пропатякирэна тумэн, мэк нико́н тэ на ракирэ́л: “Адава́ Дэвэ́л пропатякирэла ман”, пал-дова́ со холы́ на могинэ́ла тэ пропатякирэл Дэвлэ́с, а Дэвэ́л Кокоро́ на пропатякирэла никонэ́с.

¹⁴Нэ кажно ману́ш пропатякирэла пэс пэ́скирэ масэнгирэ тырдыпнаса, саво́ на трэй, и саво́ затырдэла лэс дрэ фэлы́;

¹⁵пало́ дава́ злыджаибэн, саво́ на трэй, и саво́ лыджа́ла кэ грэ́хо, саво́ явэ́ла кэрдо́ и саво́ лыджа́ла кэ мэрибэ́н.

¹⁶Дро́га мирэ́ пшала́лэ, дыкхэ́н, соб (кай) нико́н тумэн тэ на дэл дукха́ (тэ на хохавэ́л):

¹⁷кажно лачхипэ́н и кажно бидошакиро тала́но бичхадэ́ амэ́нгэ вучипна́стыр, дудэнгирэ (свэтэнгирэ) Дадэ́стыр, Саво́ на парудёла, и на пирикэрэлапэ.

¹⁸Ёв выкэдыя́ пир Пэ́скири во́ля тэ дэл джиибэ́н амэ́нгэ чачунэ́ лавэ́са, соб (кай) амэ́нгэ тэ явас Лэ́скирэ пэрвонэнца, савэ́н Ёв создыя́.

¹⁹Джинэ́н, мирэ́ дро́га пшала́лэ: мэк кажно ману́ш буты́р тэ шунэ́л ле́нтэс/поволинькэс (насыгэс) тэ ракирэ́л, ле́нтэс тэ холясол.

²⁰Пал-дова́ со манушэскири холы́ на кэрэ́ла манушэ́с чачунэдыр, сыр дава́ трэй Дэвлэ́скэ.

²¹Ваш дава́ отчхувэн пэ́стыр сарэ́ ладжавэ кэ магирипэ́н рэ́нды и песьцёныма, савэ́ ишчо (инкэ́) ячнэ́пэ андрэ́ тумэ́ндэ и прилэ́н лав ковлэ́ илэ́са, саво́ мэкця́ корнё (рукх) дро тумаро́ ило́ и могинэ́ла тэ зракхэ́л тумэн.

²²Кэрэ́н саро́ пир Дэвлэ́скиро патяибэ́н, и, ко́ли тумэ́ фэ́ни шунэ́на, а на кэрэ́на адя́кэ, тэды тумэ́ хохавэна кокорэ́ пэс.

²³Пал-дова́ со, ко́ли вари-кон шунэ́ла лав и на кэрэ́ла саро́, сыр исын пхэндло́, одова́ исын сы́рбы ману́ш, саво́ роздыкхэла пэ́скирэ-москири гожыма дро гиндало,

²⁴а адасаво́ ману́ш роздыкхэла пэс и джа́ла криг и ада́й-паць бистрэла, саво́ ёв сыс.

²⁵Нэ ману́ш, саво́ лачхэ́с сыклякирэ́ла Зако́но, саво́ исын бидошакиро, и саво́ дэ́ла во́ля; кадава́ ману́ш кэрэ́ла пир Зако́но, и на бистрэла, со ёв шундя́, и явэ́ла бахтало́ дро дова́, со ёв кэрэ́ла.

²⁶Ко́ли вари-кон тумэ́ндыр гинэ́ла пэс, со ёв исын зорья́са патяибнаскиро, а на пхандэла пэ́скири чиб, ёв хохавэла кокоро́ пэс, и кадасавэскирэ-манушэскири строгима на трэй ни конэ́скэ.

²⁷Жужэ́-патяибнаскири и намагирды строгима анги́л Дэвлэ́стэ Дадэ́стэ исын дро дова́, соб (кай) тумэ́ тэ джа́н тэ дыкхэ́н пал пиротэндэ (сиротэндэ) и пивлендэ (удовэндэ), ке́ли ёнэ пхарэ́с пиридживэна и тэ зракхэн пэс бидошакирэнца далэ́ свэто́стыр.