Read Baltic Romani Bible 2019 – Библия - Пэ Балтитко Романи чиб (Романэс) 2019 1 Иан 4 Bible Online

1 Иан 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

1 Иан 4

¹Дро́га мирэ́! На патя́н кажнонэ́ духоскэ, а спробинэн (пропатякирэн) ду́хи, ци Дэвлэ́стыр исын ёнэ, пал-дова́ со бут хоханэ́ проро́ки явэ́на дро свэ́то.

²Тумэ́ уджинэна Дэвлэ́скиро ду́хо (фа́но) адя́кэ: кажно ду́хо (фа́но), саво́ приґалёла Исусо́с Христосо́с, со Ёв явдя́ дро манушы́тко лоч (плоть), исын Дэвлэ́стыр;

³а кажно ду́хо (фа́но), саво́ на приґалёла Исусо́с Христосо́с, со Ёв явдя́ дро манушы́тко лоч, нанэ Дэвлэ́стыр, дава́ исын антихристоскиро ду́хо (фа́но), пал савэ́стэ тумэ́ шундлэ́, со ёв явэ́ла и какана́ Ёв ужэ исын дро свэ́то.

⁴Бияталэ (чхаворэ́)! Тумэ́ сан Дэвлэ́скирэ и пиризорьякирдэ лэн, пал-дова́ со Ду́хо (Фа́но), Саво́ дживэ́ла дрэ тумэ́ндэ, исын зоралэды́р духо́стыр, саво́ исын дро свэ́то.

⁵Кадалэ́ хоханэ́ проро́ки исын свэто́стыр: ёнэ и ракирэ́на пал свэто́скирэ рэ́нды, и свэ́то шунэ́ла лэн.

⁶Амэ сам Дэвлэ́скирэ: кон джинэ́ла Дэвлэ́с, одова́ шунэ́ла амэн; кон на Дэвлэ́скиро, одова́ на шунэ́ла амэн. Пир дава́ амэ уджинаса чачуно́ ду́хо (фа́но) и хохано́ ду́хо (фа́но).

⁷Дро́га мирэ́! Ява́са амэ тэ дас паты́в екх екхэ́скэ, пал-дова́ со пшалы́тко паты́в исын Дэвлэ́стыр и кажно (сва́ко), кон исын лачхо́ кэ яви́р, исын Дэвлэ́скиро чхаво́ и джинэ́ла Дэвлэ́с.

⁸Одова́, кон исын на́лачхо кэ яви́р ману́ш, на джинэ́ла Дэвлэ́с, пал-дова́ со Дэвэ́л исын пшалы́тко паты́в.

⁹Дэвлэ́скири ла́ска кэ амэ сыс сыкады дро дова́, со Дэвэ́л бичхадя́ дро свэ́то Лэ́скирэ Екхорэ Чхавэ́с, соб (кай) амэ тэ дорэсас (тэ долас) ве́чно джиибэ́н пир Лэ́стэ.

¹⁰Акэ, дро со пшалы́тко паты́в исын: дава́ нанэ, со амэ́нгэ яця́ дро́го Дэвэ́л, а дава́ исын, со Лэ́скэ яця́м дро́га амэ и Ёв бичхадя́ Пэ́скирэ Чхавэ́с тэ страдынэл (тэ пирилыджал пхарипэ́н) кэ мэрибэ́н пал амарэ́ грэ́хи.

¹¹Дро́га мирэ́! Ко́ли Дэвлэ́скэ яця́м дро́га амэ, тэды амэ́нгэ адя́кэ-паць трэй тэ дас паты́в екх екхэ́скэ.

¹²Ние́кх ману́ш ние́кхвар на дыкхця́ Дэвлэ́с. Ко́ли амэ сам лачхэ́ екх кэ екх, тэды Дэвэ́л дживэ́ла дро екхипэ́н амэ́нца, и Лэ́скири ла́ска исын пхэрды́ дрэ амэ́ндэ.

¹³Пир дава́ амэ уджинаса, со амэ дживаса дро екхипэ́н Лэ́са, и со Ёв исын дрэ амэ́ндэ, пал-дова́ со Ёв дыя́ амэ́нгэ Пэ́скиро Ду́хо (Фа́но).

¹⁴И амэ дыкхцям и сам якхи́тка (якхалэ), со Дад бичхадя́ Чхавэ́с тэ зракхэ́л свэ́то.

¹⁵Кон приґалёла, со Ису́со исын Дэвлэ́скиро Чхаво́, кодова́ ману́ш дживэ́ла дро екхипэ́н Дэвлэ́са, и Дэвэ́л исын дро екхипэ́н лэ́са.

¹⁶И амэ уджиндям ла́ска и упатяндыям, сави́ ла́ска исын Дэвлэ́стэ кэ амэ. Дэвэ́л исын дрэ пшалы́тко паты́в кэ яви́р мануша́, и одова́ ману́ш, кон исын лачхо́ кэ яви́р, дживэ́ла дро екхипэ́н Дэвлэ́са и Дэвэ́л исын дро екхипэ́н лэ́са.

¹⁷Пир дава́ екхипэ́н Дэвлэ́са пшалы́тко паты́в ячэ́лапэ пхэрдо́ дрэ амэ́ндэ, соб (кай) амэ́ндэ тэ явэ́л муршыпэн дро дывэ́с, ке́ли явэ́ла сэ́ндо, пал-дова́ со амэ дживаса дро дава́ свэ́то адя́кэ, сыр Христо́со дживдя́.

¹⁸Ко́ли амэ сам лачхэ́ кэ яви́р мануша́ и амэ на дара́са ни конэ́стыр, пал-дова́ со пхэрды́ паты́в вытрадэла дар, а кон дарэ́ла, кодова́ сы́рбы ужакирэ́ла ка́ра. А кодова́, кон дарэ́ла, дрэ лэ́стэ нанэ пхэрды́ паты́в.

¹⁹Амэ сам лачхэ́ екх кэ екх, пал-дова́ со Дэвлэ́скэ англэды́р яця́м дро́га амэ.

²⁰Ко́ли вари-кон пхэнэ́ла: “Ма́нгэ исын дро́го Дэвэ́л”, а кокоро́ нанэ лачхо́ кэ пэ́скиро пшал, одова́ исын хохаибнари; пал-дова́ со кон нанэ лачхо́ кэ пэ́скиро пшал, савэ́с ёв дыкхця́, на могинэ́ла тэ дэл паты́в Дэвлэ́скэ, Савэс ёв на дыкхця́?

²¹И дава́ исын дасаво припхэныбэ́н, саво́ амэ́ндэ исын Христосостыр, со одова́ ману́ш, конэ́скэ дро́го исын Дэвэ́л, исын банго́ (мусинэла) адя́кэ-паць тэ явэ́л лачхо́ кэ пэ́скиро пшал.