Read Baltic Romani Bible 2019 – Библия - Пэ Балтитко Романи чиб (Романэс) 2019 Сэндарьенгири Лылвари́ 14 Bible Online

Сэндарьенгири Лылвари́ 14 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Сэндарьенгири Лылвари́ 14

¹И гия́ Самсо́но дрэ Фимнафа, и дыкхця́ дрэ Фимнафа джувля́ Филистимия́кирэ чхаендыр.

²Ёв гия́ и пхэндя́ пэ́скирэ дадэ́скэ и пэ́скирэ да́кэ, и пхэндя́: “Мэ дыкхцём дрэ Фимнафа Филистимия́кирэ чхаендыр джувля́: лэн ма́нгэ ла дрэ ромны́ (ромня́тэ).”

³Лэ́скиро дад и дай пхэндлэ́ лэ́скэ: “Нау́што нанэ джувле́н машки́р тырэ́-пшалэнгирэ чхаендэ и дрэ сарэ́ мирэ́ манушэ́ндэ, со ту джа́са тэ лэс джувля́ наобчхиндлэндэ Филистимляндэ?” И пхэндя́ Самсо́но пэ́скирэ дадэ́скэ: “Лэ ла ма́нгэ, пал-дова́ со ёй исын ма́нгэ пир ило́.”

⁴Дад лэ́скиро и дай лэ́скири на джиндлэ́, со дава́ сыс Ра́стыр-Дэвлэ́стыр, и со ёв родэ́ла ваканцыя (случаё) тэ отомстинэл (тэ отхал палэ) Филистимлянэнгэ. А дро дова́ часо Филистимля́ни сыс хулая́ пэ Израилё.

⁵И гия́ Самсо́но дадэ́са пэскирэса и даса пэскирьяса дрэ Фимнафа, а ке́ли подгинэ́ кэ винаградники Фимнафакирэ, ґа́да, тэрно́ ле́во (шчэр) рычыны джа́ла пэ стреч лэ́скэ.

⁶И згия пэ лэ́стэ Ра́скирэ-Дэвлэ́скиро Ду́хо (Фа́но), и ёв роскустя левос сыр бузнорэс; а дро васт лэ́стэ ничы́ на сыс. И ёв на пхэндя́ пэ́скирэ дадэ́скэ и пэ́скирэ да́кэ, со ёв кэрдя́.

⁷И явдя́, и ракирдя́ джувля́са, и ёй яця́ пир ило́ Самсоноскэ.

⁸Сыр прогинэ́ вари-кицы́ дывэса́, нэвэ́с гия́ ёв, соб (кай) тэ лэс ла, и загия́ тэ подыкхэл левоскиро тру́по, и ґа́да, роё бэрлинэн (пчолэн) дро левоскиро тру́по и авги́н.

⁹Ёв лыя́ лэс дрэ пэ́скирэ васта́, и гия́, и хая дромэ́са; и ке́ли явдя́ кэ пэ́скиро дад и пэ́скири дай, дыя́ и лэ́нгэ, и ёнэ ханэ́; нэ на пхэндя́ лэ́нгэ, со ёв левоскирэ трупостыр лыя́ дава́ авги́н.

¹⁰И явдя́ лэ́скиро дад кэ джувлы́, и кэрдя́ одо́й Самсо́но сками́нд, сыр исын прилыно, кэрэ́на тэрнэ́.

¹¹И сыр одо́й дыкхнэ́ лэс, то дынэ́ лэ́скэ выкэдынэ́ триндэша бьявитконэ малэн, савэ́ бы явэ́на пашы́л лэ́стэ.

¹²То тэ́ньчи пхэндя́ лэ́нгэ Самсо́но: “Задава мэ тумэ́нгэ шэрэпхарибнытко задыибэн (загадка); ко́ли тумэ́ роспхандэна (отгадынэна) ма́нгэ лэс пал эфта́ дывэса́ пэ пиро́ роспхандэна и чачунэ́с, тэды мэ да́ва тумэ́нгэ триндэша синдоны и триндэша зменна и́ди;

¹³ко́ли на дэ́на ра́да тэ роспхандэн ма́нгэ, тэды тумэ́ бангэ́ явэ́на тэ дэн ма́нгэ триндэша синдоны и триндэша зменна и́ди.” Ёнэ пхэндлэ́ лэ́скэ: “Загадын (задэ) тыро́ шэрэпхарибнытко, пошунаса.”

¹⁴И пхэндя́ лэ́нгэ: “Хабнаскирэстыр выгия́ хабнытко, и зоралэстыр выгия́ гудло́.” И на могиндлэ́ ёнэ тэ отгадынэн шэрэпхарибнытко (загадка) дрэ трин дывэ́с.

¹⁵Пэ эфта́то дывэ́с пхэндлэ́ ёнэ Самсоноскирэ ромнякэ: “Уракир тырэ́ ромэс, соб (кай) ёв тэ роспхандэл амэ́нгэ шэрэпхарибнытко (загадка); а ко́ли над, то схачкираса яга́са тут и тырэ́-дадэ́скиро кхэр; нау́што тумэ́ кхардэ́ амэн, соб (кай) тэ обкэдэн амэн?”

¹⁶рондя́ Самсоноскири ромны́ анги́л лэ́стэ и ракирэ́ла: “Ту бидыкхэса ман, и мэ на сом пир ило́ ту́кэ; ту дыя́н мирэ́-манушэ́нгирэ чхавэ́нгэ шэрэпхарибнытка, а ма́нгэ на роспхандэса лэс.” Ёв пхэндя́ ла́кэ: “Мирэ́ дадэ́скэ и мирэ́ да́кэ на роспхандём лэс; и ту́кэ ци роспхандава?”

¹⁷рондя́ ёй анги́л лэ́стэ эфта́ дывэса́, дрэ савэ́ сыс лэ́ндэ пиро́. Кэ ко́нцо (яго́ро) пэ эфта́то дывэ́с ёв роспхандя ла́кэ; пал-дова́ со ёй зоралэ́с мангдя́ лэс. А ёй розгадындя шэрэпхарибнытка пэ́скирэ манушэ́нгирэ чхавэ́нгэ.

¹⁸И пэ эфта́то дывэ́с анги́л кхамэскиро загиибэ́н пхэндлэ́ лэ́скэ мануша́: “Со исын гудлэдыр авгинэстыр, и со исын зоралэды́р левостыр!” Ёв пхэндя́ лэ́нгэ: “Ко́ли бы тумэ́ тэ на дэн го́дла пэ мирэ́ тэрнэ́ гурумнятэ, тэды на отгадынэнас бы миро шэрэпхарибнытко.”

¹⁹И згия пэ лэ́стэ Дэвлэ́скиро Ду́хо (Фа́но), и гия́ ёв дро Аскалоно, и домардя́ одо́й триндэша манушэ́н, злыя́ лэ́ндыр и́ди и отдыя́ змена лэ́нгирэ ризэндыр одолэ́нгэ, кон роспхандя (розгадындя) шэрэпхарибнытко (загадка). И захачи́я лэ́скири холы́, и гия́ ёв дрэ пэ́скирэ-дадэ́скиро кхэр.

²⁰А Самсоноскири ромны́ выгия́ палоро́м пал бьявитконэ лэ́скирэ малэстэ, саво́ сыс дру́го (мал) пашы́л лэ́стэ.