Read Baltic Romani Bible 2019 – Библия - Пэ Балтитко Романи чиб (Романэс) 2019 Сэндарьенгири Лылвари́ 9 Bible Online

Сэндарьенгири Лылвари́ 9 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Сэндарьенгири Лылвари́ 9

¹Авимеле́хо, Иероваалоскиро (Гедеоноскиро) чхаво́, гия́ дро Сихемо кэ пэ́скирэ-да́кирэ пша́ла, и ракирдя́ лэ́нгэ и сарэ́ пэ́скирэ-да́кирэ дадэ́скирэ родо́скэ, и пхэндя́:

²“Допхэнэн сарэ́ Сихемоскирэ манушэ́нгэ: со явэ́ла фэды́р ваш тумэ́нгэ, соб (кай) тумэ́ тэ явэ́н хуланца пэ тумэ́ндэ сарэ́ эфтадэша́ Иероваалоскирэ чхавэ́, ці, соб (кай) тэ явэ́л екх хула́й? И пририпирэн, со мэ сом тумаро́ кокало и лоч (плоть) тумари́.”

³Пша́ла лэ́скирэ да́кирэ, допхэндлэ пал лэ́стэ сарэ́ далэ́ лава́ Сихемоскирэ манушэ́нгэ; и збандия лэ́нгиро ило́ кэ Авимеле́хо, пал-дова́ со ракирдэ́ ёнэ: ёв исын амаро́ пшал.

⁴И дынэ́ лэ́скэ эфтадэша́ шэ́кели руп Ваалверифоскирэ кхэрэ́стыр, о Авимеле́хо прилыя́ пэ буты́ кэ пэ далэ́ балвалитконэ и локхэ-годякирэн (своевольнонэ) манушэ́н, савэ́ и гинэ́ пал лэ́стэ.

⁵И явдя́ ёв дро лэ́скирэ-дадэ́скиро кхэр дрэ Офра, и замардя́ пэ́скирэ пшалэ́н эфтадэша́ Иероваалоскирэ чхавэ́н, пэ екх бар. Яця́пэ екх Иофа́мо, Иероваалоскиро тыкнэды́р чхаво́, пал-дова́ со гарадыя.

⁶И скэдынэ́пэ сарэ́ Сихемоскирэ мануша́ и саро́ Милоскиро кхэр, и гинэ́ и чхудэ́ Авимелехос крали́са пашы́л дэмбо, со на́дур исын Сихемостыр.

⁷Ке́ли роспхэндлэ́ пал дава́ Иофамоскэ, ёв гия́ и тэрдия́ пэ Гаризимоскирэ-бэрга́киро вучипэ́н, и, ґаздыя́ пэ́скири зан (глос), дыя́ го́дла и ракирдя́ лэ́нгэ: “Шунэ́н ман, Сихемоскирэ мануша́лэ, и тэ шунэ́л тумэн Дэвэ́л!

⁸Гинэ́ вари-ке́ли дрэвы (кашта́) тэ помакхэн пэ пэ́стэ крали́с и пхэндлэ́ маслинакэ: ‘Кралин пэ амэ́ндэ.’

⁹Маслина отпхэндя́ лэ́нгэ: “Ци ячкирава мэ миро ту́ко, савэ́са мануша́ сыкавэ́на паты́в дэвлэскэ и манушэ́нгэ, и ци джа́ва мэ тэ бадинав пир вэша́?”

¹⁰И пхэндлэ́ кашта́ смоковницакэ: ‘Джа́ ту, кралин пэ амэ́ндэ.’

¹¹Смоковница пхэндя́ лэ́нгэ: “Ци ячкирава мэ миро гудлыпэн и лачхо́ миро барьякирдо́ (пло́до), и ци джа́ва тэ бадинав пир вэша́?”

¹²И пхэндлэ́ кашта́ винаградоскирэ лозакэ: ‘Джа́ ту, — кралин пэ амэ́ндэ.’

¹³Винаградоскири лоза пхэндя́ лэ́нгэ: ‘Ци ячкирава мэ миро со́ко (хум), саво́ веселинэла (лошакирэла) дэвлэн и манушэ́н, и ци джа́ва тэ бадинав пир вэша́?’

¹⁴Пэ ко́нцо (яго́ро) пхэндлэ́ сарэ́ кашта́ терновникоскэ: ‘Джа́ ту, — кралин пэ амэ́ндэ.’

¹⁵Терновнико пхэндя́ каштэнгэ: ‘Ко́ли тумэ́ пир чачипэ́н тэ чхувэ́н ман крали́са пэ пэ́стэ, то тэды джа́н, откхинён тэл мири́ зэр (тень); ко́ли над, тэды выджа́ла терновникостыр яг и схачкирэ́ла Ливаноскирэ кедры.’

¹⁶И адя́кэ дыкхэ́н, ци пир чачипэ́н, и ци пир патябэн тумэ́ кэрэ́на, чхуви Авимелехос крали́са? И ци шука́р тумэ́ кэрдэ́ Иероваалоса и лэ́скирэ кхэрэса, и ци пир лэ́скирэ лачхэ́ рэ́нды (де́лы) кэрдэ́ тумэ́?

¹⁷Пал тумэ́ндэ миро дад мардя́пэ, на тангиндя пэ́скиро джиибэ́н и выракхця (збавиндя) тумэн Мадианитянэнгирэ вастэ́стыр;

¹⁸а тумэ́ какана́ ґаздынэ́пэ проти мирэ́-дадэ́скиро кхэр, и домардэ́ эфтадэша́ мирэ́-дадэ́скирэ чхавэ́н пэ екх бар, и чхудэ́ крали́са пэ Сихемоскирэ манушэ́ндэ Авимелехос, лэ́скирэ писхарицакирэ чхавэ́с, пал-дова́ со ёв исын тумаро́ пшал.

¹⁹Ко́ли тумэ́ какана́ пир чачипэ́н и пир патябэн кэрдэ́ Иероваалоса и лэ́скирэ кхэрэса, тэды радынэ́нпэ пал Авимелехостэ, и ёв мэк тэ радынэ́лпэ пал тумэ́ндэ;

²⁰ко́ли ишчо (инкэ́) над, тэды мэк тэ выджа́л яг Авимелехостыр и мэк тэ схачкирэл Сихемоскирэ манушэ́н и саро́ Миллоскиро кхэр, и мэк тэ выджа́л яг Сихемоскирэ манушэ́ндыр и Миллоскирэ кхэрэ́стыр, и мэк тэ схачкирэл Авимелехос.”

²¹И праста́ндыя Иофа́мо, и настя́, и гия́ дрэ Беэра, и дживдя́ одо́й, ґарадыи пэ́скирэ пшалэстыр Авимелехостыр.

²²Авимеле́хо ишчо (инкэ́) кралиндя пэ Израилё трин бэрш.

²³И бичхадя́ Дэвэ́л холямэ́ духос машки́р Авимелехостэ и машки́р Сихемоскирэ манушэ́ндэ, и на лынэ́ тэ кандэ́н Сихемоскирэ мануша́ Авимелехос,

²⁴соб (кай) адя́кэ-паць тэ отхал палэ пал эфтадэша́ Иероваалоскирэ чхавэ́ндэ, и рат лэ́нгиро тэ явэ́л пэ Авимелехостэ, лэ́нгирэ пшалэ́стэ, саво́ домардя́ лэн, и пэ Сихемоскирэ манушэ́ндэ, савэ́ зоралякирдэ лэ́скирэ васта́, соб (кай) ёв тэ домарэл пэ́скирэ пшалэ́н.”

²⁵Сихемоскирэ мануша́ чхудэ́ проти лэ́стэ дрэ гараибэн манушэ́н пэ бэргэнгиро вучипэ́н, савэ́ обчорэнас кажнонэ́ (сваконэс), кон гия́ маму́й лэ́ндэ пир дром. Пал саро́ сыс роспхэндло Авимелихоскэ.

²⁶Явдя́ и Гаало Еведоскиро чхаво́, пэ́скирэ пшалэ́нца дро Сихемо, и псирдэ́ ёнэ пир Сихемо, и Сихемоскирэ мануша́ чхудэ́ пэ́скиро ило́ пэ лэ́стэ.

²⁷И выгинэ́ пэ фэ́лда, и скэдынэ́ пэ́скиро винаградо (дракх), и тасадэ му́ри, и кэрдэ́ свэ́нки, псирдэ́ дрэ пэ́скирэ дэвлэскиро кхэр, и ханэ́ и пинэ́, и кошнэ Авимелехос.

²⁸Гаало, Еведоскиро чхаво́, ракирдя́: “Кон исын Авимеле́хо, и со исын Сихемо, соб (кай) амэ́нгэ тэ дынарина́с лэ́скэ? Ци на Иероваалоскиро чхаво́ ёв, и ци на Зевуло исын лэ́скиро шэрало́ барыдыро́? Дынаринэ́н фэды́р Емороскирэ родо́скэ, Сихемоскирэ дадэ́скэ, а лэ́скэ ваш со амэ́нгэ тэ дынарина́с?

²⁹Ко́ли бы кон тэ дэл адалэ́ манушэ́н, дрэ мирэ́ васта́, то мэ протрадавас Авимелехос.” И пхэндло́ сыс Авимелехоскэ: “Кэр бутыдыр тыро́ халадыбэ́н и выджа.”

³⁰Зевуло, форо́скиро барыдыро́, шундя́ Гаалоскирэ лава́, Еведоскирэ-чхавэ́скирэ, и захачи́я лэ́скири холы́.

³¹Ёв мэндрипнаса бичхавэ́ла манушэ́н кэ Авимеле́хо, соб (кай) тэ пхэнэ́н: “Акэ, Гаало, Еведоскиро чхаво́, и лэ́скирэ пша́ла явнэ́ дрэ Сихемо, и ґа́да, ёнэ ґаздэ́на пэ бу́нто фо́ро проти ту́тэ;

³²и адя́кэ ушты́ раты́, ту и мануша́, савэ́ исын ту́са, и чхув дро гараибэн манушэ́н пэ фэ́лда;

³³злокоса (утроса), сыр явэ́ла тэ уштэл кхам, ушты́ тася́рлэс (ра́нэс) и джа́ кэ фо́ро; и ке́ли ёв и мануша́, савэ́ исын лэ́стэ, выджа́на кэ ту, тэды кэр лэ́нца, со могинэ́ла тыро́ васт.”

³⁴И уштыя́ раты́ Авимеле́хо и сарэ́ мануша́, савэ́ сыс лэ́са, и чхудэ́ дро ґараибэн пашы́л Сихемо штар отря́ды.

³⁵Гаало, Еведоскиро чхаво́, выгия́ и тэрдия́ пашы́л форо́скирэ вудара́; и уштыя́ Авимеле́хо и мануша́, савэ́ сыс лэ́са, гараибнастыр.

³⁶Гаало, дыкхця́ манушэ́н, и ракирэ́ла Зевулоскэ: “Ѓа́да, исын мануша́, савэ́ змэкэнапэ бэргэнгирэ вучипна́стыр.” А Зевуло пхэндя́ лэ́скэ: “Бэргэнгири зэр (тень) здэлапэ ту́кэ манушэ́нца.”

³⁷Гаало нэвэ́с ракирэ́ла, и пхэндя́: “Ѓа́да, э мануша́, савэ́ змэкэнапэ вучипна́стыр, и екх отрядо джа́ла Меонимоскирэ дэмбостыр.”

³⁸И пхэндя́ лэ́скэ Зевуло: “Кай исын тырэ́ ушта́, савэ́ ракирдэ́: ‘Кон исын Авимеле́хо, соб (кай) амэ тэ лас тэ дынарина́с лэ́скэ?’ Дава́ исын одолэ́ мануша́, савэ́н ту бидыкхцян; выджа акана́ и марпэ лэ́нца.”

³⁹И гия́ Гаало анги́л Сихемоскирэ манушэ́ндэ, и мардя́пэ Авимелехоса.

⁴⁰И традыяпэ пал лэ́стэ Авимеле́хо, и праста́ндыя ёв лэ́стыр, и бут пынэ́ домардэ́, кэ са́мо форо́скири по́рта (вра́ты).

⁴¹И яця́пэ Авимеле́хо дрэ Арума, а Гаалос и лэ́скирэ пшалэ́н Зевуло вытрадыя́, соб (кай) ёнэ тэ на дживэ́н кэ Сихемо.

⁴²Пэ яви́р дывэ́с выгинэ́ мануша́ пэ фэ́лда, и роспхэндлэ́ пал саро́ Авимелехоскэ.

⁴³Ёв лыя́ пэ́скирэ манушэ́н, и роскэрдя́ (розделиндя) лэн пэ трин отря́ды, и чхудя́ дро ґараибэн пэ фэ́лда. И дыкхця́, со мануша́ выгинэ́ форо́стыр, ґаздыя́пэ пэ лэ́ндэ и домардя́ лэн.

⁴⁴Машкир дова́ часо, сыр Авимеле́хо и отря́ды, савэ́ сыс лэ́са, подгинэ́ и тэрдинэ́ пашы́л форо́скири по́рта, то яви́р дуй отря́ды пынэ́ пэ сарэ́ндэ, савэ́ сыс дрэ фэ́лда, и домарэнас лэн.

⁴⁵И мардя́пэ Авимеле́хо фороса саро́ дова́ дывэ́с, и лыя́ фо́ро, и домардя́ манушэ́н, савэ́ сыс дрэ лэ́стэ, и роспхагирдя́ фо́ро и почхудя лэс лондэса.

⁴⁶Сыр шундлэ́ пал дова́ сарэ́ мануша́, савэ́ сыс дрэ Сихемоскири вучарды́ (башня), то загинэ́ дрэ вучарды́ дрэ капишча (мангипнытко штэ́то) Ваал-Верифо.

⁴⁷Авимелехоскэ роспхэндлэ́, со скэдынэ́пэ одори́к сарэ́, савэ́ сыс дрэ Сихемоскири вучарды́.

⁴⁸И гия́ Авимеле́хо пэ бэ́рга Селмон, кокоро́ и сарэ́ мануша́, савэ́ сыс лэ́са, и лыя́ Авимеле́хо товэра пэ́са и вычингирдя вэшэскирэ сэнки (рандя́), и чхудя́ пэ пэ́скирэ псикэ́, и пхэндя́ манушэ́нгэ, савэ́ сыс лэ́са: “Тумэ́ дыкхнэ́, со мэ кэрдём; сыгнэдыр кэрэ́н и тумэ́ дова́-паць, со мэ.”

⁴⁹И вычингирдя кажно (сва́ко) сарэ́ манушэ́ндыр сэнки, и гинэ́ пал Авимелехостэ, и чхудэ́ кэ вучарды́ (башня), и подхачкирдэ лэ́нца вучарды́ яга́са, и мынэ́ сарэ́, савэ́ сыс дрэ Сихемоскири вучарды́, пашы́л тысёнцо муршэ́н и джувле́н.

⁵⁰Коригэды́р (позжэ) гия́ Авимеле́хо дро Тевцо, и обчхудя́ халадыбнаса Тевцо, и лыя́ лэс.

⁵¹Машкир фо́ро сыс зоралы́ вучарды́, и нашнэ́ одори́к сарэ́ мурша́ и джувля́, и сарэ́ форо́скирэ мануша́, и запхандлэпэ, и гинэ́ упрэ́ пэ башнякири стрэ́ха (чхаки́н).

⁵²Авимеле́хо явдя́ кэ вучарды́ и окрэнжындя ла, и подги́я кэ вучардякирэ вудара́, соб тэ схачкирэл ла яга́са.

⁵³Тэды екх джувлы́ чхурдыя́ котэ́р бар жэрновостыр (бэлэдинятыр) пэ Авимелехоскиро шэро́ и пропхагирдя лэ́скэ чэрепо.

⁵⁴Авимеле́хо дова́-паць часо кхардя́ кэ пэ тэрнэ́-бэршэнгирэс, пэ́скирэс оружэносцос, и пхэндя́ лэ́скэ: “Вытырдэ тыри́ курта́ла и мулякир ман, соб (кай) тэ на пхэнэ́н пал ма́ндэ: ‘Э джувлы́ замардя́ лэс.’ И пропхусадя лэс тэрнэ́-бэршэнгиро лэ́скиро, и ёв мыя́.

⁵⁵Израильтя́ни дыкхи́, со мыя́ Авимеле́хо, гинэ́ кажно (сва́ко) пэ пэ́скиро штэ́то.

⁵⁶Адя́кэ отдыя́ Дэвэ́л палэ Авимелехоскэ пал фуипэ́н, саво́ ёв кэрдя́ пэ́скирэ дадэ́скэ, сыр замардя́ эфтадэша́ пэ́скирэ пшалэ́н.

⁵⁷И сарэ́ Сихемоскирэ-манушэ́нгирэ чорэ́ рэ́нды (де́лы) порискирдя Дэвэ́л пэ лэ́нгиро шэро́. И латхя́ лэн Иофамо́скиро прокошыбэ́н, Иероваалоскирэ чхавэ́скиро.