Read Baltic Romani Bible 2019 – Библия - Пэ Балтитко Романи чиб (Романэс) 2019 3 Иан 1 Bible Online

3 Иан 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

3 Иан 1

¹Пхурэстыр, мирэ́ дрогонэ́ Гаёскэ, кон исын дро́го ма́нгэ чачипна́са.

²Дро́го миро! Мэ мангавапэ Дэвлэ́скэ, соб (кай) тэ явэ́л ко́фо (польза) пэ саро́, со ту кэрэ́са, соб (кай) тэ явэс ту састо́, адя́кэ-паць сыр тыро́ ду́хо (фа́но) барьёла.

³Пал-дова́ со мэ древа́н обрадындёмпэ, ке́ли дэвлы́тка пша́ла явнэ́ и допхэндлэ пал тыро́ чачипэ́н, сыр ту и дживэса пир чачипэ́н.

⁴Ваш ма́нгэ нанэ барэды́р ра́дыма, сыр тэ шунав, со мирэ́ чхаворэ́ дживэ́на пир чачипэ́н.

⁵Дро́го миро! Ту кэрэ́са патяибныткэс саро́, со кэрэ́са ваш дэвлытконэ́ пшалэ́нгэ и чужонэ́ манушэ́нгэ,

⁶савэ́ допхэнэнас анги́л кхангири́ пал тыри́ пшалы́тко паты́в, ке́ли ту бичхавэсас лэн дро дром, сыр трэй и, сыр исын лачхо́ Дэвлэ́скэ, тэды ту кэрэ́са лачхэ́с;

⁷пал-дова́ со ёнэ гинэ́ пал Христосо́скиро лав, ёнэ на лынэ́ нисо́ Наюдэндыр.

⁸Палдава́ амэ́нгэ трэй тэ прилас шука́р адасавэ́ манушэ́н, соб (кай) амэ могинасас тэ кэра́с буты́ кхэтанэ́ ваш чачипэ́н.

⁹Мэ чхиндём кхангирьякэ, нэ Диатрефо, савэ́скэ явдя́ пэ годы́ тэ явэ́л лэ́нгирэ шэралэса, на прилэ́ла дова́, со мэ чхина́ва.

¹⁰Палдава́, ке́ли мэ ява́ва, мэ да́ва лэ́скэ тэ рипирэл пал дова́, со ёв кэрэ́ла, сыр ёв злыджала плётки пэ амэ́ндэ. Нэ ёв адя́кэ исын ґа́лко кэ дава́, со ёв и кокоро́ на прилэ́ла дэвлытконэ́ пшалэ́н, и адя́кэ-паць кэрэ́ла проти одолэ́ндэ, кон камэ́ла тэ прилэл и ишчо (инкэ́) ёв традэ́ла яври́ лэн кхангирья́тыр.

¹¹Миро дро́го! На яв ту адасаво́, соб (кай) тэ кэрэ́с чорипэ́н, а яв адасаво́, соб (кай) тэ кэрэ́с лачхипэ́н. Кон кэрэ́ла лачхипэ́н, одова́ исын Дэвлэ́стыр, а кон кэрэ́ла чорипэ́н, одова́ на дыкхця́ Дэвлэ́с.

¹²Сарэ́ допхэнэна лачхипэ́н пал Дмитриёстэ (Митрастэ), и чачипэ́н адя́кэ-паць пал лэ́стэ; амэ адя́кэ-паць дочхуваса амаро́ допхэныбэ́н и тумэ́ джинэ́на, со амаро́ допхэныбэ́н исын чачуно́.

¹³Ма́ндэ бут трэиндя́ тэ чхинав тумэ́нгэ, нэ мэ на кама́м тэ кэра́в дава́ чэрниласа́ и порэ́са;

¹⁴нэ мэ патя́ва, со сыг мэ дыкхаво тумэн, и амэ ява́са тэ ракирас муй кэ муй.

¹⁵Тэ явэ́л рама́нё (миро) ту́кэ. Пиридэна “паклоно” ту́кэ мала́. Пиридэ “паклоно” малэнгэ (другэнгэ), кажнонэ́скэ пир лав. Ами́нь.