Read Baltic Romani Bible 2019 – Библия - Пэ Балтитко Романи чиб (Романэс) 2019 Рута 3 Bible Online

Рута 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Рута 3

¹И пхэндя́ ла́кэ Ноэминь, ла́кири сасуй: “Мри чхая́, ци тэ на породэс ту́кэ пэ́скэ штэ́то, соб ту́кэ тэ явэ́л шука́р?”

²Ѓа́да, Воозо, конэскирэ дынарицэнца ту са́нас, исын амари́ сэмэ́нца; ґа́да, ёв дрэ дая́ рат веинэла пэ шу́рна ґэрсто (ячменё);

³выморпэ, подмакхпэ, ури пэ пэ́стэ гожа тырэ́ и́ди и джа́ пэ шу́рна, нэ на сыкадёв лэ́скэ, пака ёв на мэкэ́ла тэ хал и тэ пьел;

⁴ке́ли ёв пасёла тэ совэ́л, уджин штэ́то, кай ёв пасёла; тэды ту явэ́са и отчхакирэса пашы́л лэ́скирэ ґэра́, и пасёса; ёв пхэнэ́ла ту́кэ, со ту́кэ тэ кэрэ́с.”

⁵Рута пхэндя́ ла́кэ: “Кэра́ва саро́, со ту пхэндя́н ма́нгэ.”

⁶И гия́ пэ шу́рна (гумно), и кэрдя́ саро́ адя́кэ, сыр припхэндя́ ла́кэ сасуй ла́кири.

⁷Воозо хая и выпия чалэ́с и розвеселиндя пэ́скиро ило́, и гия́ и пасия́ тэ совэ́л пашы́л скирда. И ёй штылинькэс явдя́, отчхакирдя́ пэ́скэ пашы́л лэ́скирэ ґэра́ и пасия́.

⁸Дрэ паш рат ёв тринскирдяпэ, ґаздыя́пэ, и, ґа́да, пашы́л лэ́скирэ ґэра́ сыс пашты джувлы́.

⁹И пхэндя́ ла́кэ Воозо: “Кон ту сан?” Ёй пхэндя́: “Мэ сом Рута, дына́рица тыри́, ґа́здэ якх тыри́ пэ дынарицатэ тырьятэ, пал-дова́ со ту сан сэмэ́нца.”

¹⁰Воозо пхэндя́: “Бахтякирды ту сан Ра́стыр-Дэвлэ́стыр, мири́ чхай! Дава́ палатуно́ тыро́ лачхо́ рэ́ндо кэрдя́н ту, пэ бут фэды́р англатунэстыр, со ту на ги́ян тэ родэс тэрнэ́ манушэ́н, ни чорорэн ни барвалэн;

¹¹и адя́кэ, мири́ чхай, на дар, мэ кэра́ва ту́кэ, саро́, со ту пхэндя́н; пал-дова́ со сарэ́ мирэ́ манушэ́нгирэ вудара́ джинэ́на, со ту сан лачхи́ джувлы́;

¹²мэк и чачипэ́н, со мэ сом сэмэ́нца, нэ исын сэмэ́нца пашылэды́р ма́ндыр;

¹³ратькир дая́ рат; а тася́, ко́ли ёв прилэ́ла тут, тэды шука́р, мэк тэ прилэл; а ко́ли ёв на закамэ́ла тэ прилэл тут, тэды мэ прилава; тэ явэ́л джидо́ Рай Дэвэ́л! Сов кэ зло́ко (ра́нко).

¹⁴И сыс суты ёй пашэ́ лэ́скирэ ґэра́ кэ зло́ко, и уштыя́ англэды́р, сыр могиндлэ́ ёнэ тэ уґалён екх екхэ́с. И пхэндя́ Воозо: “Мэк тэ на джинэ́н, со джувлы́ сыс яви пэ шу́рна (гумно).”

¹⁵И пхэндя́ ла́кэ: “Подэ упратуны и́дя, сави́ пэ ту́тэ, порикир ла.” Ёй рикирдя, и ёв отмериндя ла́кэ шов меры ґэрсто (ячменё), и чхудя́ пэ ла́тэ, и гия́ дро фо́ро.

¹⁶А Рута явдя́ кэ пэ́скири сасуй. Одоя пхэндя́ ла́кэ: “Со, мири́ чхай?” Ёй пирипхэндя саро́ ла́кэ, со кэрдя́ ла́кэ одова́ ману́ш.

¹⁷И пхэндя́ ла́кэ: “Далэ́ шов меры ґэрсто (ячменё) ёв дыя́ ма́нгэ и пхэндя́ ма́нгэ: ‘На джа́ кэ пэ́скири сасуй чхучэ́ вастэ́нца.’”

¹⁸Одоя пхэндя́: “Ужакир мири́ чхай, пака ту уджинэса, со́са выджа́ла дава́ рэ́ндо; пал-дова́ со одова́ ману́ш на ячэ́лапэ дро рама́нё (миро), на кэри ададывэ́с рэ́нды.”