Read Biblija - Pe Baltitko Romani čib (Romanes) 2019 Baltic Romani Bible Džiibén 11 Bible Online

Džiibén 11 - Biblija - Pe Baltitko Romani čib (Romanes) 2019 Baltic Romani Bible bible

Džiibén 11

¹Pe sarí phuv sys jekh čib, i jekh rakiribén.

²I sys adiáke: vastokóstyr giné jone dromésa, pe Sinaroskiri phuv lathné jone dólo i lyné te dživén odój.

³I phendlé jone jekh jekhéske: “Javén, kerása but kirpičy (kintá) i obhačkirasa len jagása.” I jačné lénde kirpičy zamiést bará, a phuvitko smola zamiést zvjoska.

⁴I phendlé jone: “Javén, kerása péske fóro i vučardý (bašnia), vučipnása ke bolybén; i dasa péske lav, sob (kaj) te na rozdžaspe pir sarí phuv.”

⁵I gijá telé Raj Devél te dykhél fóro i vučardý (bašnia), saví kerdé manušéngire čhavé.

⁶I phendiá Raj Devél: “Áke, jekh isyn nacyja, i saré rakiréna pe jekh čib; i ĥáda, so jone lyné te kerén, i na otiačena jone daléstyr, so zakamle te kerén;

⁷iavén, džása telé, i piripentynasa odój léngiro rakiribén adiáke, sob (kaj) jekh manúš te na ĥaljol, so rakiréla javír manúš.”

⁸I rosčhudiá Raj Devél len odothýr pir sarí phuv; i jone pirijačne te kerén fóro.

⁹Paldavá léske dynó lav Vavilóno, odój Raj Devél piripentyndia pir sarí phuv rakiribén, i odothýr len Raj Devél rosčhudiá te dživén pir sarí phuv.

¹⁰Ĥáda, isyn lav pal Simoskiro ródo: Simoske sys šel berš, i pir duj berš paló paniéskiro začhuiben (potopo), léstyr bijándyja Arfaksado;

¹¹paló Arfaksadoskiro bijanypén, o Simo dživdiá pandžšelá berš, i léstyr bijándyne čhavé i čhaja.

¹²Dre trijandapandž berš Arfaksadostyr bijándyja Sala.

¹³Paló Salaskiro bijanypén, Arfaksado dživdiá štaršelatrin berš, i léstyr bijándyne čhavé i čhaja.

¹⁴Dre trijánda berš Salastyr bijándyja Jeviero.

¹⁵Paló Jevieroskiro bijanypén Sala dživdiá štaršelatrin berš, i léstyr bijándyne čhavé i čhaja.

¹⁶Dre trijánda trindeša štar berš Jevierostyr bijándyja Falieko.

¹⁷Paló Faliekoskiro bijanypén, Jeviero dživdiá štaršelá trindeša berš, i léstyr bijándyne čhavé i čhaja.

¹⁸Dre trijánda (trindeša) berš Faliekostyr bijándyja Ragavo.

¹⁹Paló Ragavoskiro bijanypén Faliéko dživdiá dujšelá jeniá berš, i léstyr bijándyne čhavé i čhaja.

²⁰Dre trijánda (trindeša) duj berš Ragavostyr bijándyja Sieruho.

²¹Paló Sieruhoskiro bijanypén Ragavo dživdiá duj šelá eftá berš, i léstyr bijándyne čhavé i čhaja.

²²Dre trijánda (trindeša) berš Sieruhostyr bijándyja Nahoro.

²³Paló Nahoroskiro bijanypén Sieruho dživdiá duj šelá berš, i léstyr bijándyne čhavé i čhaja.

²⁴Dre biš te jeniá berš Nahorostyr bijándyja Fara[12].

²⁵Paló Faraskiro bijanypén Nahoro dživdiá šel te dešujenia berš, i léstyr bijándyne čhavé i čhaja.

²⁶Dre eftadešá berš Farastyr bijándyja Avrámo [Abramo-ju.o.], Nahoro i Garano.

²⁷Ĥáda, isyn Faraskiro ródo: Farastyr bijándyja Avrámo, Nahoro i Garano. Garanostyr bijándyja Loto.

²⁸I Garano myjá angíl péskire dadéste Faraste, pe phuv, pe saví jov bijándyja, Ŭro Xaldiejéngiro.

²⁹Avrámo i Nahoro lyné péske romnién, Avramoskire romniá khardé: Sara; Nahoroskire romniá khardé Milka [Mil'ka-ju.o.], saví sys Garanoskiri čhaj, Milkakire-dadéskiri i Iskaskire-dadéskiri.

³⁰Sara sys nakhabný džuvlý, bičhavorengiri.

³¹I lyjá Fara Avramos, péskire čhavés, i Lotos, Aranoskire čhavés, péskire unukos, i Sara, peskirjá borja, péskire-čhavéskire Avramoskire romniá, i gijá krig lénca Urostyr Xaldiejengirostyr, sob (kaj) te džán pe Xanaanóskiri phuv; kiéli doginé jone ke Xarano, jone terdiné odój.

³²I dživdiá Fara dujšelá pandž berš, i myjá Fara dro Xarano.