Read Biblija - Pe Baltitko Romani čib (Romanes) 2019 Baltic Romani Bible Džiibén 13 Bible Online

Džiibén 13 - Biblija - Pe Baltitko Romani čib (Romanes) 2019 Baltic Romani Bible bible

Džiibén 13

¹I gijá Avrámo Jegiptóstyr, kokoró i léskiri romný, i saró, so sys léste, i Loto gijá lésa pe paš-dyvés pe Xanaano.

²I Avrámo sys drieván barvaló kheritkoné murdalénca (skotosa), i rupésa, i suvnakása.

³I džálas jov dromésa paš-dyveséstyr ke Viefíljo, pe štéto, kaj angledýr sys léskiri šátra maškír Viefíljo i maškír Gajo,

⁴ke dová štéto, kaj sys altárjo, savó jov angledýr odój kerdiá; i odój Avrámo prikhardia lav Ráskire-Devléskiro.

⁵I Lotoste, savó Avramosa psirdiá, adiáke-pac' sys kherítka murdalá (tyknó i baró skoto), i šátry.

⁶I phuv na mogindiá len dujén te rikirén, sob (kaj) te dživén khetané, pal-dová so léngiro mištypén sys dasavo baró, so jone na mogindlé te dživén khetané.

⁷I sys košybén maškír Avramoskire čhupnar'jende (pastuhende) i maškír Lotoskire čhupnar'jende (pastuhende); i Xananiei i Fierieziei tedy dživdé pe doiá phuv.

⁸I phendiá Avrámo Lotoske: “Mek te na javél košybén maškír mánde i túte, i maškír miré skotoskire čhupnar'jende i tyrende; pal-dová so ame sam seménca.

⁹Ci na sarí phuv isyn angíl túte? Le péskiri paš i džá. Kóli tu džása pe zérvo (liévo) rig, to me pe čačí (pravo) rig; a kóli tu pe čačí rig, tedy me pe zérvo.”

¹⁰Loto ĥazdyjá péskire jakhá i, ake, dykhciá sarí Iordanoskiri okruga (saví sys angíl dová, syr Raj Devél xasiakirdiá Sodómo i Gomóra), sarí ke Sigoro čhuvelaspe paniésa, syr Ráskire-Devléskiri únta (sado), syr Jegiptóskiri phuv.

¹¹Tén'ci vykedyjá péske Loto saré Iordanoskire štéty; i gijá Loto pe vastóko. I roskerde jone péskire pašá jekh jekhestyr.

¹²Avrámo jaciá te dživél pe Xanaanóskiri phuv; a Loto jaciá te dživél dre okrugakire fórja, i čhudiá péskire šátry ke Sodómo.

¹³Manušá, savé dživdé ke Sodómo, sys fuj i drieván grehítka angíl Raste-Devléste.

¹⁴I phendiá Raj Devél Avramoske paló dová, syr Loto otgijá léstyr: “Ĥazde péskire jakhá, i dalé štetóstyr, pe savó tu san akaná, podykh pe paš-rat, i pe paš-dyvés, i pe vastóko i pe zapado;

¹⁵pal-dová so sarí phuv, saví tu dykhésa, Me dáva túke i tyré rodóske pe viéki,

¹⁶i sozdáva Me tyré rodóstyr but but manušén, syr phuvjákiro práho; kóli vari-kon saštý (moginéla) te piriginel phuvjákiro práho, tedy i ródo tyró javéla zgindlo;

¹⁷uštý, džá pir daja phuv dre lákiro dlengipén i buĥlypén, pal-dová so Me dáva la túke.”

¹⁸I piričhudia Avrámo péskiri šátra, i gijá, i jaciá te dživél pašýl dembitko vešoro Mamrié, so isyn dro Xievróno; i odój kerdiá altárjo Ráske-Devléske.