Read Biblija - Pe Baltitko Romani čib (Romanes) 2019 Baltic Romani Bible Džiibén 14 Bible Online

Džiibén 14 - Biblija - Pe Baltitko Romani čib (Romanes) 2019 Baltic Romani Bible bible

Džiibén 14

¹Davá sys adiáke: kiéli dživdiá Amrafielo, Sienaaroskiro (Šinoaroskiro[13]) králi, o Arioho, Jelasaroskiro králi, Kiedorlaomiero, Jelamoskiro králi, i Tidalo, Goimengiro králi,

²to giné jone maribnása pe Bieraste, Sodomóskire kralíste, pe Biršaste, Gomorakire kralíste, Šynavoste, Admaskire kralíste, Šemievieroste, Cevoimoskire kralíste, i pe Bielaskire kralíste, savó akaná isyn Sigoro (Coaro).

³Jone saré javné khetané pe Sidimoskiro dólo, kaj akaná isyn Londo mórjo (derjáv).

⁴Dešudúj berš jone sys slúgi (dynárja) Kiedorlaomieroste, a pe dešutrito berš ĥazdyné jone búnto.

⁵Pe dešuštarto berš javdiá Kiedorlaomiero i králja, savé sys lésa, i zamardé Riefaimen dro Ašterof-Karnaimo, Zuzimen dro Gamo, Emimen dro Šav-Kiriafaimo,

⁶i Xoriejen pe bérga léngiri Sieiro, ke El-Farano, so isyn pašýl čhučí phuv.

⁷I kiéli risiné jone odothýr, jone javné ke Mišpato, savó isyn Kadiéso, i rozmarde Amalikitianengiri sarí rig, i adiáke-pac' Amoriejen, savé dživdé ke Xacacon-Famaro.

⁸I vyginé Sodomoskiro králi, Gomorakiro králi, Admaskiro králi, Cevoimoskiro králi i Bielaskiro králi, savó isyn Sigoro (Coaro); i lyné te marénpe lénca pe Sidimoskiro dólo,

⁹Kiedorlaomierosa, Jelamoskire kralísa, Tidalosa, Goimengire kralísa, Amrafielosa, Sienaaroskire kralísa, Ariohomosa, Jelasaroskire kralísa, — štar králja proti pandžende.

¹⁰Dro Sidimoskiro dólo but sys smolakire ĥanbiniá (jamy). Sodomoskiro i Gomorakiro králja, meknepe te našén, pyné dre lénde; a palatuné (posliédnia) našné dre bérgi.

¹¹Odolé, kon pirizorjakirde, lyné Gomorakiro i Sodomoskiro majonko (mištypén), i saró léngiro xabén, i giné péske.

¹²I Lotos lyné, Avramoskire plimienikos, savó dživdiá ke Sodómo, i majonko léskiro, i giné péske.

¹³I jekh manúš, savó jaciápe džidó, javdiá, i rosphendiá Judoske Avramoske, savó tedy dživdiá pašýl dembitko vešoro Mamrié, Amorejaninos, Eškoloskire pšalés i Anieroskire pšalés, savé sys dro dorakiribén Avramosa.

¹⁴Avrámo, syr šundiá, so léskiri seménca lyné dro pliéno, skedyjá peskiren dynar'jén, savé bijándyne dro léskiro kher, trinšelá dešuohto manušén, i tradyjá vergén ke Dano;

¹⁵i jov rozmardiá len pe otriády, i jov, i léskire dynárja pyné pe lénde ratý, i rozmardiá len, i tradyjá len ke Xova, so isyn pir zérvo (liévo) rig Damaskostyr;

¹⁶i riskirdiá Lotos i saró léskiro majonko, i péskiri seménca, i saró léskiro mištypén riskirdiá, adiáke-pac' džuvlién i manušén.

¹⁷Kiéli jov risijá pale paló Kiedorlaomieroskiro i kral'jengiro rozmariben, savé isys lésa, to Sodomoskiro králi vygijá angíl léste pe dólo Šavié, so isyn akaná kralískiro dólo;

¹⁸i Salimoskiro králi, Mielhisedeko, vylydžijá maró i mol (vino). Jov sys rašáj Naj Vučedyreskiro Devléskiro,

¹⁹i bahtiakirdiá jov i phendiá: “Te javél bahtaló Avrámo Devléstyr, Naj Vučedyrestyr, Baré Rástyr pe bolybén i pe phuv.

²⁰Te javél barjakirdó Devél, Naj Vučedyreskiro, Savó otdyjá vergén dre tyré vastá.” Avrámo saréstyr dyjá léske déšto paš.

²¹I phendiá Sodomoskiro králi Avramoske: “De mánge manušén, a majonko le péske.”

²²Ne Avrámo phendiá Sodomakire kralíske: “Ĥazdava miro vast ke Naj Vučedyreskiro Raj Devél (Jahvá), Devél, Savó isyn phuvjákire i bolybnáskiro Baró Raj.

²³So me na lavá ni thav, ni ĥeritkonendyr simiroro saré tyrestyr, sob (kaj) tu te na phenés: ‘Me barvaliakirdjom Avramos’,

²⁴apríč doléstyr, so xané terné-beršengire manušá, i apríč pašátyr, saví isyn manušénge, savé mánca psirdé; Eniéro, Eškólo i Mamrié, mek jone te len péskiri paš.”