Read Biblija - Pe Baltitko Romani čib (Romanes) 2019 Baltic Romani Bible Džiibén 17 Bible Online

Džiibén 17 - Biblija - Pe Baltitko Romani čib (Romanes) 2019 Baltic Romani Bible bible

Džiibén 17

¹Avramoske sys jeniadeša jeniá berš, i Raj Devél sykadyjá Avramoske i phendiá léske: “Me som Sarezorjákiro Raj Devél; psir angíl Mánde i jav bidošéngiro;

²'i Me keráva Zaviéto (dorakiribén) Miro maškír túte i Mánde, i Me drieván butedyrjakirava tyró ródo.”

³I pyjá Avrámo pe péskiro muj, a Devél duredýr rakirdiá lésa, i phendiá:

⁴“Áke, isyn davá Zaviéto Miro túsa; tu javésa dadésa butenge manušytkoné nacyiénge,

⁵i tu na javésa butýr te kharespe Avramosa, ne javéla túke lav: Avraámo; pal-dová so Me keráva tut dadésa vaš but manušýtka nácyi (narody).

⁶Me keráva adiáke, so tútyr drieván but manušá bijandjona, i tútyr vydžána but manušýtka nácyi, i králja javéna tútyr;

⁷i Me čhuváva Miro Zavieto maškír Mánde i túte i maškír tyré-čhavorengiro ródo paló túte dro léngiro ródo, dorakiribén pe viéko dro dová, so Me javáva tyró Devél,

⁸i Me dáva túke i tyré-čhavéngire rodóske paló túte Me dáva daja phuv, pir saví tu psiresa, sarí Xanaanóskiri phuv, syr tyró mištypén pe viéko; i Me javáva léngiro Devél.”

⁹I Devél phendiá Avraamóske: “Tu rakh Miro Zavieto, tu i tyré-čhavéngiro ródo paló túte dre léngire-rodengire stréčy (pokolienii).

¹⁰Davá isyn Miro Zavieto, savó tumé san bangé (musinena) te zrakhen maškír Mánde i tuménde i maškír tyré-čhavéngiro ródo pal túte: mek te javél tuménde občhindlo kažno murškanó bijáto;

¹¹občhinen jagóro (krajo) cypatyr pe tumarí loč (plot'): i davá javéla ĥiertýk (znamiénijo) pe Zavieto (dorakiribén) maškír Mánde i tuménde.

¹²Pe ohtóto (bidujéngiro déšto) dyvés bijanypnastyr, mek te javél občhindlo tuménde dre tumarí streč kažno murškanó bijáto, savó bijándyja dro kher i kindlo pal rup, vari-konéstyr čužonestyr, kon isyn na tyré rodóstyr.

¹³Kažnones trej te občhinen, kon bijándyja dro tyró kher, odová, kon i kindlo pal tyró rup, i javéla Miro Zavieto pe tumarí loč dorakiribnasa pe viéko.

¹⁴Naobčhindlo murš, savéste javéla naobčhindlo jagóro (krajo) pe léskiri loč, mek te xasjol davá di dalé manušéndyr, pal-dová so jov na zrakhciá Miro Zavieto.”

¹⁵I phendiá Devél Avraamóske: “Sara, tyrja romniá, na khar ‘Sara’; ne mek te javél lákiro lav: Sárra

¹⁶Me bahtiakirava la, i Me dáva túke látyr čhavés, Me bahtiakirava la, i javéna látyr manušýtka nácyi, manušéngire králja javéna látyr.”

¹⁷I pyjá Avraámo mósa, i zasandiape, i kokoró dre péste phendiá: “Naúšto (xaj) šele — beršytkoneste javéla čhavó. I jeniadešengiri Sárra, naúšto bijanéla?”

¹⁸I Avraámo phendiá Devléske: “Mek Izmailo te javél džidó angíl Túte!”

¹⁹I phendiá Devél: “Čačes, Sárra, tyrí romný, bijanéla túke čhavés, i tu désa léske lav: Isaáko (Ichako); i čhuváva Me Miro Zavieto lésa pe viéko, i léskire rodosa korigedýr (pozžedýr) léstyr.

²⁰I pal Izmailoste Me šundjom tútyr: “Ĥáda, Me bahtiakirava les, i Me keráva, so léstyr javéla baró ródo; i Me dáva džiibén butenge léskire rodóstyr, dešudúj thagárja bijandjona léstyr, i Me sozdáva léstyr baró narodo.

²¹Ne Miro Zavieto Me čhuváva Isaakosa, savés bijanéla Sárra túke dro davá-pac' časo pe javír berš.”

²²I Devél pirijaciá te rakirél Avraamosa; i gijá léstyr.

²³I Avraámo lyjá Izmailos, péskire čhavés, i sarén, kon bijándyja dro léskiro kher, i sarén, kon sys kindlo pal léskiro rup, sarén Avraamóskire-kheréskire muršén; i občhindia jagóro (krajo) pe léngiri loč (plot') dro dová-pac' dyvés, syr Devél phendiá léske.

²⁴Avraamóske sys jeniadeša jeniá berš, kiéli sys občhindly pe jagóro (pe krajo) léskiri loč.

²⁵A Izmailoske, léskire čhavéske, sys dešutrin berš, kiéli sys občhindly pe jagóro (pe krajo) léskiri loč.

²⁶Dro dová-pac' dyvés občhindlé sys Avraámo i Izmailo, léskiro čhavó,

²⁷i lésa občhindlé sys saré muršá léskire kheréstyr, savé bijándyne dro kher, i savé sys kindle javire-rodoskire manušéstyr pal rup.