Read Biblija - Pe Baltitko Romani čib (Romanes) 2019 Baltic Romani Bible Džiibén 18 Bible Online

Džiibén 18 - Biblija - Pe Baltitko Romani čib (Romanes) 2019 Baltic Romani Bible bible

Džiibén 18

¹I sykadyjá léske Raj Devél pašýl dembitko vešoro ke Mamrié, kiéli jov sys beštó angíl zagiibén dre šátra, dro dyvesýtko xačkiribén.

²Jov ĥazdyjá péskire jakhá, i dykhciá, i, ĥáda, trin muršá sys terdé mamúj léste. Syr dykhciá jov len, to prastándyja te pirilel len zagiibnastyr dre šátra, i kerdiá šerésa (klonindiape) ke phuv,

³i phendiá: “Rajo Baró! Kóli mánge te javél láska, me mangáva bahtalypén angíl Tyré jakhá, na prodža mamúj Tyré dynariste;

⁴i janéna nábut paní, i obmorena tumaré ĥerá; i otkinjon tumé tel dalé kaštá (drevy),

⁵a me janáva maró, i tumé zoraliakirena tumaré ile; korigedýr (pozžedýr) džána péske; adiáke syr tumé, džána mamúj tumaré dynariste.” Jone phendlé: “Adiáke ker, syr tu rakirésa.”

⁶I Avraámo sýges gijá, ke Sárra dre šátra, i phendiá: “Sygnedyr rozlydža trin saty fedyršo jaržó, ker posno maró, syr rostasavesa xumer (ciasto).”

⁷I prastándyja Avraámo ke ĥurto murdalénca, i lyjá naj fedyršones guruvóres, i dyjá terné-beršengireske, i odová sýges lyjá te keravel les.

⁸I lyjá jov ksil i thud, i keradia guruvóres, i čhudiá davá angíl lénde; a kokoró terdó sys pašýl lénde tel kašt. I jone xané.

⁹I phendlé léske: “Kaj isyn Sárra, tyrí romný?” Jov otphendiá: “Adái, isyn dre šátra.”

¹⁰I jekh léndyr phendiá: “Me nevéstyr (nevés) dre davá-pac' beršeskiro časo javáva ke tu, i, ake, tyré romniáte Sarrate javéla čhavó.” Sárra pašýl zagiibén dre šátra šundiá les pal léste.

¹¹Avraámo i Sárra sys phuré dre beršá; i dová, so trej te javél džuvliénde, Sarrate pirijaciá.

¹²I Sárra zasandiape dre péste: “Ci mánge, kiéli me phurijom, te javél daja baht, i xuláj miro isyn phuró.”

¹³I phendiá Devél Avraamóske: “Sóstyr salape Sárra, i phendiá ‘Naúšto me, čačes, mogináva te bijanav, kiéli me phurijom?’”

¹⁴“Ci isyn vari-so te javél pharó vaš Ráske-Devléske? Dro phendló časo Me javáva ke tu pe javír berš, i Sarrate javéla čhavó.”

¹⁵Sárra na priĥalyjape, a phendiá: “Me na sandjompe.” Pal-dová so joj strahadyja. Ne Jov phendiá: “Nad, tu sandianpe.”

¹⁶I odolé manušá uštyné, i odothýr giné ke Sodómo, Avraámo gijá len te prolydžal.

¹⁷I Raj Devél phendiá: “Ci garavava Me Avraamostyr, so kamám te keráv!

¹⁸Avraamostyr, čačes, vydžána zoralé manušá, i dre léste bahtiakirenape saré phuvjákire-manušýtka nácyi,

¹⁹pal-dová so Me les vykedyjom vaš davá, sob (kaj) jov te priphenel péskire čhavénge i péskire kheréske, so javéla paló léste, te psirén Ráskire-Devléskire dromésa, te kerén čačipén i séndo; i keréla pe Avraamoste Raj Devél dová, so phendiá pal léste.”

²⁰I Raj Devél phendiá: “Gódla dro Sodómo i Gomóra isyn bari, i pharó isyn drieván léngiro grého;

²¹džáva Me i dykháva, ci adiáke jone keréna grého, pal savó gódla pal lénde, džála ke Me, ci nad, udžinava.”

²²I risiné manušá odothýr, i giné dro Sodómo; Avraámo usá sys terdó angíl Raste-Devléste.

²³I podgíia Avraámo, i phendiá: “Naúšto Tu xasiakiresa čačuné manušés khetané zlydnitkonésa?

²⁴Haj (moža) te javél dro davá fóro pandždešá manušá, savé patiána? Naúšto Tu xasiakiresa, i na potanginesa (ná požalinesa) davá štéto vaš pandždeše manušénge, savé patiána?

²⁵Naštý te javél, sob (kaj) Tu te kerés adiáke, sob (kaj) Tu te xasiakires čačuné manušés khetané zlydnitkonesa, sob (kaj) dová-pac' te javél čačuné manušésa; so i zlydnitkonesa; naštý te javél Tútyr! Sendári saré phuvjákiro te kerél na pir čačipén?”

²⁶O Raj Devél phendiá: “Kóli Me lathava dro fóro Sodómo pandždešá manušén, savé patiána, to tedy Me zrakháva saró davá štéto vaš lénge.”

²⁷Avraámo phendiá dro otphenybén: “Ĥáda, me prilyjom duma te rakiráv Baré-Ráske, me som práho i práska (pieplo):

²⁸saštý (moginéla) te javél, so ke pandždešá čačuné manušén, nauhtylla (nádosi) pandžen, naúšto, so kóli nauhtylla pandž manušá, to Tu xasiakiresa saró fóro?” Jov phendiá: “Na xasiakiráva, kóli odój lathava štardešapandž manušén.”

²⁹Avraámo duredýr Lésa rakirdiá, i phendiá: “Saštý te javél, so odój lathenape štardešá manušá.” Jov phendiá: “Na keráva dová i, kóli odój lathenape štardešá manušá.”

³⁰I phendiá Avraámo: “Me mangáva, Rajo Baró, te na xoliasos, so me javáva te rakiráv: saštý te javél, so odój lathenape trijánda manušá?” Jov phendiá: “Na keráva, kóli odój lathenape trijánda.”

³¹Avraámo phendiá: “Ĥáda, me prilyjom duma te rakiráv Ráske-Bareske: saštý te javél, so odój lathenape biš manušá? Jov phendiá: “Na xasiakiráva vaš bišenge.”

³²Avraámo phendiá: “Mek te na xoliasol Baró Raj, so me phenáva iščo (inké) jékhvar: saštý te javél, so odój lathenape deš manušá? Jov phendiá: “Na xasiakiráva vaš dešenge.”

³³I Raj Devél gijá, pirijaciá te rakirél Avraamosa, a Avraámo risijá pe péskiro štéto.