Read Biblija - Pe Baltitko Romani čib (Romanes) 2019 Baltic Romani Bible Džiibén 19 Bible Online

Džiibén 19 - Biblija - Pe Baltitko Romani čib (Romanes) 2019 Baltic Romani Bible bible

Džiibén 19

¹I javné duj Jangóly bel'velié dro Sodómo, kiéli Loto sys beštó pašýl pórta (vráty) dro Sodómo. Loto dykhciá len, i uštyjá te pirilel len i kerdiá šerésa (klonindiape) ke phuv,

²i phendiá: “Rajale miré! Zadžán dre tumaré-dynariskiro kher, i rat'kiren, i vymoren tumaré ĥerá, i uštén tasiárles (ránes), i džán péskire dromésa.” Ne jone phendlé: “Nad, ame rat'kirasa javrí.”

³Jov drieván zoralés zrakirelas len; i jone giné ke jov, i javné dro léskiro kher. Jov kerdiá lénge baró skamínd, i pekcia posno maró; i jone xané.

⁴Jone iščo (inké) na pasine te soven, syr manušá dalé foróstyr, Sodomliani, ternestyr ke phuró, saré manušá saré foróskire rigéndyr, podginé ke kher trusciál (krugosa).

⁵I jone vykharde Lotos, i rakirdé léske: “Kaj isyn manušá, savé javné ke tu te rat'kiren? Vylydža len ke ame; sob (kaj) ame te džinas len.”

⁶Loto vygijá ke jone ke zagiibén, i čhakirdia pal péste vudár,

⁷i phendiá: “Mangav tumé, pšalále miré, na kerén čoripén;

⁸ĥáda, mánde isyn duj čhaja, savé na sys paloróm; fedýr len, me vylydžava ke tumé, kerén lénca, so tuménge isyn pir godý; adalé manušénge na kerén ničí, adiáke syr jone javné ke me tel kheréskiri stréha (čhakín).”

⁹Ne jone phendlé: “Jav adarík.” I phendlé: “Ĥáda, manúš, savó javdiá te dživél adái, i kaméla te sendiakirél? Akaná ame fujedýr kerása túsa, syr lénca.” I drieván prijačenas ke davá manúš, ke Loto, i podginé, sob (kaj) te phagiren vudár.

¹⁰Tedy odolé manušá ĥazdyné péskire vastá, i zalydžine Lotos ke pe dro kher, i phandle vudár;

¹¹a manušén, savé isys angíl zagiibén dro kher, korjakirde, barestyr ke tyknó, adiáke, so jone zamenčindlepe, rodyi zagiibén.

¹²Odolé manušá phendlé Lotoske: “Kon isyn butýr túte adái? Ci ziatjo (džamutro), ci tyré čhavé, ci tyré čhaja, i sob (kaj) te na javél dre fóro túte, sarén vylydža dalé štetóstyr,

¹³pal-dová so ame xasiakirasa davá štéto; paldavá so bari godlyma isyn pe manušénde, savé dživéna adáj ke Raj Devél, i Raj Devél bičhadiá amen te xasiakiras les.”

¹⁴I vygijá Loto, i rakirdiá péskire ziatienca (džamutrenca), savé lenas pal péste léskire čhajén, i phendiá: “Uštén, vydžán dalé štetóstyr; pal-dová so Raj Devél xasiakiréla davá fóro.” Ne léskire ziatienge zdyjape, so jov salape.

¹⁵Kiéli jaciá te dyvesjol, e Jangóly lyné te sygniakiren Lotos, i rakirdé: “Uštý, le tyrja romniá i dujén tyrén čhajén, savé isyn túte, sob (kaj) tut te na xasiakiras pal bizlado dro fóro.”

¹⁶I syr jov ĥará jačelaspe pe štéto, tedy odolé manušá, pir Ráskire-Devléskiro tangipén ke jov, lyné les pal vast, i leskirja romniá, i dujén léskire čhajén, i vylydžiné les, i čhudé les pal fóro.

¹⁷Kiéli len vylydžiné javrí, tedy jekh léndyr phendiá: “Zrákh péskiro di, na dykh palál, i nikaj te na terdjos pašýl davá dólo; zrakhpe pe bérga, sob (kaj) te na xasjos túke.”

¹⁸Ne Loto phendiá lénge: “Nad, Rajo Baró.”

¹⁹“Ĥáda, Tyró pishári lathiá tangipén angíl Tyré jakhá, i baró isyn Tyró lačhipén, savó Tu kerdián mánge, so zrakhcián miro džiibén; ne me naštý (na mogináva) te garadjovav pe bérga, sob (kaj) te na lathel man bída i mánge te na merav;

²⁰ĥáda, pašyledýr me te prastav dro davá fóro; prastava me odorík jov ža tyknó, i javéla zrakhno miro džiibén.”

²¹I phendiá Jangólo léske: “Ĥáda, pir tyró iló Me keráva davá: na čilavava fóro, pal savó tu rakirésa.

²²Sygnedyr, džá odorík; pal-dová so Me naštý (na mogináva) te keráv réndo, paka tu javésa odorík.” Paldavá i davá fóro kharéna: Sigoro.

²³Kham ĥazdyjápe pe phuv, i Loto javdiá dro Sigoro.

²⁴I čhudiá Raj Devél pe Sodómo i Gomóra bryšýnd dzeveliátyr (sieratyr) i jag bolybnástyr Rástyr-Devléstyr,

²⁵i čiladiá xasibnasa Raj Devél davá fóro, i saró, so isyn pašýl davá dólo, i adalé-for'jéngire saré manušén, i dová, so barija pe phuv.

²⁶Ne Lotoskiri romný risijá palál pal léste, i jaciá londeskire stylbosa.

²⁷I uštyjá Avraámo tasiárles (ránes) pe sámo zlokico (ránko) i gijá pe štéto, kaj sys terdó angíl Raste-Devléste,

²⁸i podykhciá pe Sodómo i Gomóra, i pe saró štéto, so sys pašýl, i dykhciá: ĥáda, thuv (dymo) ĥazdélape phuvjátyr, syr thuv bovestyr.

²⁹I sys adiáke, kiéli Devél xasiakirelas saré pašatuné fórja, Devél priripirdia pal Avraamoste, i vybičhadia Lotoskire-čhavéngiro ródo odolé štetóstyr, kaj Jov xasiakirelas fórja, ke savé dživdiá Loto.

³⁰I vygijá Loto Sigorostyr, i lyjá te dživél dre ĥiebár (pieščera) pe bérga, i lésa sys léskire duj čhaja: pal-dová so jov darandyja te dživél ke Sigoro. I dživdiá pe bérga, i léskire duj čhaja lésa.

³¹I phurydyršo phen phendiá tyknedyršonake: “Dad amaró isyn phuró; i nane pe phuv manušés, savó te zadžál ke ame, syr davá kerélape pir sarí phuv;

³²i jav, adiáke matiakirasa amaré dadés, i pirisovasa lésa, i bijanasa čhavén amaré dadéstyr.”

³³I dre doiá rat jone mat'kirde péskire dadés; i zagijá phuredyršo phen i sys suty péskire dadésa: a jov na džindiá, kiéli joj pasijá i kiéli uštyjá.

³⁴Pe javír dyvés phuredyršo phen phendiá tyknedyršonake: “Ĥáda, me tasiá sómas suty miré dadésa: mat'kirasa les i dre daja rat; i tu džá i sov lésa, i bijanasa amaré dadéstyr čhavén.”

³⁵I dre daja rat mat'kirde jone péskire dadés; i gijá tyknedyršo phen i sys suty lésa: i jov na džindiá, kiéli joj pasijá i kiéli uštyjá.

³⁶I duj Lotoskire čhaja zapharine péskire dadéstyr,

³⁷i phuredyršo phen bijandiá čhavés, i dyjá léske lav: Moávo. Jov akaná isyn Moavitianengiro dad.

³⁸I adiáke-pac' tyknedyršo phen bijandiá čhavés, i dyjá léske lav: Bien-Ammi. Jov akaná isyn Amonitianengiro dad.