Read Biblija - Pe Baltitko Romani čib (Romanes) 2019 Baltic Romani Bible Džiibén 2 Bible Online

Džiibén 2 - Biblija - Pe Baltitko Romani čib (Romanes) 2019 Baltic Romani Bible bible

Džiibén 2

¹Adiáke sys sozdyne bolybén i phuv i saró svéto.

²I končyndia Devél Péskire réndy (diély) ke eftáto (bitrinéngiro déšto) dyvés, savé Jov kerélas i pe eftáto dyvés Jov otkhinyja saré Péskire rendéndyr (dielendyr), savé Jov kerdiá.

³Devél bahtiakirdiá eftáto (bitrinéngiro déšto) dyvés i osvencyndia les, pal-dová so dre davá dyvés otkhinyja Jov saré Péskire rendéndyr, savé Jov sozdyjá i kerdiá.

⁴Ake, isyn lav, syr jačné bolybén i phuv, kiéli sys sozdyne jone, dre dová časo (cýro), kiéli Raj Devél (Jahvá), Devél sozdyjá phuv i bolybén,

⁵I kažno feldytko xrústo (kusto), savó angledýr na sys pe phuv, i kažno feldytko čar, saví angledýr na barija; pal-dová so Raj Devél, Devél angledýr na bičhadiá bryšýnd pe phuv, i na sys manušés, sob (kaj) te kerél butý pe phuv;

⁶ne phuvjátyr ĥazdyjápe paro, i paniakirdia pir sarí phuv.

⁷I Raj Devél, Devél phuvitkone prahostyr sozdyjá manušés, i phurdyja dre léskire ruthunia (nozdri) dúho (fáno) džiibnáskiro i jaciá manúš džidé diesa.

⁸I Raj Devél počhudia dro Edemo pe vastóko únta (sado)[2]; i mekciá odój manušés, savés Jov sozdyjá.

⁹I Raj Devél kerdiá adiáke, sob (kaj) te barjol phuvjátyr kažno kašt (drévo), šukár vaš jakhá i lačhó vaš xabén, i maškirál únta sys džiibnytko kašt, i kašt, savó déla džinybén pal fuipén i lačhipén.

¹⁰Edemostyr thadelas reka (len'), saví paniakirdia únta; i odothýr rozdžalaspe pe štar réki (leniá).

¹¹Jekha khardé Fisono (Pišono): joj thadéla pir sarí Xavilaskiri phuv, doiá phuv, kaj isyn suvnakái;

¹²i dolé-phuvjákiro suvnakáj isyn lačhó; odój isyn bdalaho i onikso bar.

¹³I javirja reka (len') khardé Gihono; joj thadéla pir sarí Kušoskiri phuv.

¹⁴Tritona reka (len') khardé Xidekiéljo (Tigro); joj thadéla angíl Asirija. Štárto reka (len') isyn Jevfrato.

¹⁵I lyjá Raj Devél, Devél manušés, i mekciá te dživél les dre Edemoskiri únta (sado), sob (kaj) jov te barjakirel i te rakhél la.

¹⁶I priphendiá Raj Devél, Devél manušéske, phení: “Dre únta kaštéstyr (drevostyr) tu javésa te xas;

¹⁷a kaštéstyr, savó déla džinybén pal fuipén i lačhipén, léstyr na xa; pal-dová dre davá dyvés dro, dro savó tu xasa léstyr barjakirdó (plódo), tu merésa.”

¹⁸I Raj Devél, Devél phendiá: “Nalačhes manušéske te javes jekhdžineske, Ame sozdasa pomogibnaskires (pomošnikos) pir léste.”

¹⁹O Raj Devél, Devél phuvjátyr vyčhudiá saré feldytkone murdalén (žyvotnonen) i sarén bolybnytkone čiriklién, i jandiá ke manúš, sob (kaj) jov te dykhél, syr jov kharéla len, i sob (kaj), syr manúš kharéla kažno džidó di, dasavo lav te jačélpe léske.

²⁰I dyjá lav (khariben) manúš kažnoné kheritkoné murdaleske i bolybnáskire čiriklienge i feldytkone murdalénge; ne vaš manušéske pomogibnaskiro na lathiape (lastiape), na pir léste.

²¹I kerdiá Raj Devél, Devél adiáke, so zoraló soiben pyjá pe manušéste; i, kiéli zasucia jov, to Raj Devél, Devél lyjá jekh léskiro pašvaro, i odová štéto začhakirdia ločasa (plotiasa).

²²I Raj Devél, Devél sozdyjá pašvarestyr džuvliá, savó Jov lyjá manušéstyr, i jandiá la ke manúš.

²³I phendiá manúš: “Ĥáda, davá isyn kokalo miré kokalendyr i loč (plot') miré ločatyr; joj iavéla te kharelpe džuvliása (romniása): pal-dová so sys lyny romestyr.”

²⁴Paldavá manúš mekéla péskire dadés i da, i prijačela ke péskiri romný, i jone javéna jekh loč.

²⁵I sys dujdžiné nange, Adamo i léskiri romný, i jone na ladžandyne.