Read Biblija - Pe Baltitko Romani čib (Romanes) 2019 Baltic Romani Bible Džiibén 21 Bible Online

Džiibén 21 - Biblija - Pe Baltitko Romani čib (Romanes) 2019 Baltic Romani Bible bible

Džiibén 21

¹I kerdiá patýv Raj Devél Sarrake, syr Jov phendiá; i kerdiá Raj Devél Sarrake adiáke, syr rakirdiá.

²Sárra jaciá pharí, i Avraamóske dre baré léskire beršá bijandiá čhavés dre dová časo, pal savó rakirdiá léske Devél;

³i Avraámo dyjá péskire čhavéske lav, savó bijándyja léste, savés bijandiá léske Sárra: Isaáko [Ichoko-ju.o.];

⁴i Avraámo občhindia Isaakos, péskire čhavés, pe ohtóto (bidujéngiro déšto) dyvés, syr Devél léske priphendiá.

⁵Avraamóske sys šel berš, kiéli léstyr bijándyja Isaáko, léskiro čhavó.

⁶I phendiá Sárra: “Devél kerdiá saben mánge, kon šunéla pal mánde, javéla te salpe.”

⁷I phendiá: “Kon phenéla Avraamóske: Sárra javéla te čaravel čhavorén kolynesa? Pal-dová so dro léskiro phuripen i me čhavés bijandjom.”

⁸Čhavoró vybarija, i otlyne les kolynestyr; i dro dová dyvés, kiéli Isaáko sys otlyno kolynestyr, Avraámo kerdiá baró svénko.

⁹I dykhciá Sárra, so Jegiptiankakire-Agarijakiro čhavó, savés joj bijandiá Avraamóske, salape.

¹⁰I phendiá joj Avraamóske: “Trade adalja pisharica (rabynia) i lákire čhavés; pal-dová so na javéla te prilel meknó mištypén adalé-pisharicakiro čhavó khetané miré čhavésa Isaakosa.”

¹¹I davá sykadyjá Avraamóske drieván na pir iló vaš léskire čhavéske.

¹²Ne Devél phendiá Avraamóske: “Na piridživ pal tyré čhavéste i pisharicate; dre saró, so phenéla túke Sárra, kande la; pal-dová so pir Isaakoste javéla dynó túke tyré-čhavéngiro ródo;

¹³i pisharicakire čhavestyr Me sozdáva manušýtko nacyja, pal-dová so i léstyr javéla tyré-čhavéngiro ródo.”

¹⁴Avraámo uštyjá tasiárles (ránes) pe zlóko, i lyjá maró; cypitko gonó paniésa, i dyjá Agarijake, čhudiá láke pe psiké, i čhavés i otmekciá la. Joj gijá, i zablendyndiape pe čhučí phuv Virsávija;

¹⁵i dro gonó na jaciá paní, i jačkirdiá joj čhavés tel jekh xrústo (kusto),

¹⁶i gijá, durál bestiá, pe adakici dur, syr maribnýtko bust (striela) vurniala. Pal-dová so joj phendiá: “Na kamám čhavéskiro meribén te dykháv.” I joj besciá proti léste, i ĥazdyjá ĥodla, i rondiá.

¹⁷I šundiá Devél čhaveskiri zan (glos); i Devléskiro Jangólo bolybnástyr khardiá zoralés Agarja, i phendiá láke: “So túsa, Agárie? Na andyrša, Devél odothýr šundiá zan čhaveskiri, kaj jov isyn;

¹⁸uštý, ĥázde čhavés, i le les paló vast; pal-dová so léstyr Me sozdáva bari manušýtko nacyja.”

¹⁹I Devél otčhakirdiá láke jakhá, i joj dykhciá ĥanýng paniésa, i gijá, i pherdiakirdiá gonó paniésa, i paniakirdia čhavés.

²⁰I Devél sys čhavésa; i jov vybarija, i lyjá te dživél pe čhučí phuv; i jaciá te del kar'je lukostyr.

²¹Jov dživdiá pe čhučí phuv Farano; i léskiri daj lyjá léske romniá Jegiptóskire phuvjátyr.

²²I sys dre dolé dyvesá: Avimieliého Fiholosa, péskire barydyrésa pe xaladénde, phendiá Avraamóske: “Túsa Devél dro saró isyn, so tu te na keresas;

²³i akaná sovlahá mánge adáj Devlésa, so tu na kerésa bibáht ni mánge, ni miré čhavéske, ni ŭnukoske miréske; i, syr me šukár i sómas túsa, adiáke i tu javésa te kerés mánca i phuvjása, pe saví tu dživesa syr gostjo.”

²⁴I Avraámo phendiá: “Me sovlahava.”

²⁵I Avraámo sykadiá bang Avimieliehoske pal ĥanýng paniésa, savó otlyne Avimieliehoskire pishárja.

²⁶I phendiá Avimieliého: “Na džinóm, kon davá kerdiá, i tu na phendián mánge; me pal davá i na šundjom ke davá časo.”

²⁷I lyjá Avraámo bakrén i guruvén, i dyjá Avimieliehoske, i jone dujdžiné kerdé zaviéto pal malypen (družba).

²⁸I Avraámo čhudiá eftá (bitrinéngiro deš) lačhé bakror'jén tykné gurtostyr.

²⁹I phendiá Avimieliého Avraamóske: “Vaš so adáj dalé eftá bakrorja, savén tu čhudián?”

³⁰Jov phendiá: “Eftá bakror'jén adalen le miré vastéstyr, sob (kaj) jone te javén mánge dophenybnasa, so me vyĥanadjom daja ĥanýng.”

³¹Paldavá i khardiá jov davá štéto: Virsávija, adáj jone dujdžiné sovlahade.

³²Adiáke jone kerdé zavieto dre Virsávija. I uštyjá Avimieliého, i Fiholo, léskiro barydyró pe xaladénde, i risiné jone pe Filistimijakiri phuv.

³³I Avraámo čhudiá te barjon dembitko veladín (rošča) pašýl Virsávija, i mangdiápe odój Ráske-Devléske, Viečnone Devléske.

³⁴I Avraámo dživdiá pe Filistimijakiri[14] phuv, syr gostjo, but dyvesá.