Read Biblija - Pe Baltitko Romani čib (Romanes) 2019 Baltic Romani Bible Džiibén 27 Bible Online

Džiibén 27 - Biblija - Pe Baltitko Romani čib (Romanes) 2019 Baltic Romani Bible bible

Džiibén 27

¹Kiéli Isaáko jaciá phuró, i léskire jakhá jačné fujes te dykhén, jov khardiá péskire phurydyršone čhavés Isavos i phendiá léske: “Mro čháva!” Odová phendiá léske: “Ĥáda, me som.”

²Jov phendiá: “Ĥáda, me jacjom phuró, me na džinóm (na džináv) péskiro meribnytko dyvés;

³le akaná tyré častyra (orudii): kolčano tyró, lúko tyró, džá pe félda, i uhtyl (starav) mánge vešeskire čiriklién,

⁴i keráv mánge xabén, savó me kamám, i jan mánge te xas, sob (kaj) tut te bahtiakirél miro iló, angledýr syr me meráva.”

⁵Rieviéka šundiá, kiéli Isaáko rakirdiá péskire čhavéske Isavoske. I gijá Isávo pe félda te doresel i te janel vešeskire čiriklién (dič);

⁶a Rieviéka phendiá péskire čhavéske Jakovóske: “Ĥáda, me šundjom, syr tyró dad rakirdiá tyré pšaléske Isavoske:

⁷‘Jan mánge vešeskire čiriklién (dič) i keráv mánge xabén; me pirihava, i bahtiakirava tut angíl Raste-Devléste, angíl miro meribén.’

⁸Akaná, mro čháva, šun miré lavá, so me priphenava túke:

⁹džá dre stada i le odothýr mánge dujén lačhin'konen buznoren (kozljonken), i me keravava léndyr tyré dadéske xabén, savó jov kaméla,

¹⁰a tu janesa tyré dadéske, i jov pirihala, sob (kaj) te bahtiakirél tut angíl léskiro meribén.”

¹¹Jakovo phendiá Rieviekake, péskire dáke: “Isávo, miro pšal, isyn manúš balytko, a me som manúš bi balengiro;

¹²saštý (moginéla) te javél, so čilavéla man miro dad; i me dre léskire jakhá javáva syr xohaniuko, i keráva pe péste prokošybén, a na bahtiakiribén.”

¹³Léskiri daj phendiá léske: “Mek te javél pe mánde tyró prokošybén, mro čháva, šun miré lavá, i džá, jan mánge.”

¹⁴Jov gijá, i lyjá, i jandiá péskire dáke; i léskiri daj keradia xabén, savó xaja pir iló dad.

¹⁵I Rieviéka lyjá péskire phuredyršoneskire-čhaveskiri Isavoskiri fedýr ídia, saví sys láte dro kher, i uridia dre láte péskire tyknedyršone čhavés Jakovós;

¹⁶a léskire vastá i bi balengiri men občhudiá buzniengire (kozliatengire) cypasa;

¹⁷habén i maró, savó joj kerdiá, joj dyjá dre vastá péskire čhavéske Jakovóske.

¹⁸Jov zagijá ke péskiro dad i phendiá: “Miro dádo!” Odová phendiá: “Ĥáda, me som; kon tu san, miro čhavó?”

¹⁹Jakovo phendiá péskire dadéske: “Me som Isávo, anglatunó tyró čhavó; me kerdjom, syr tu mánge phendián; uštý, beš, i xa miré vešeskire čiriklién, sob (kaj) te bahtiakirél tyró iló man.”

²⁰I phendiá Isaáko péskire čhavéske: “Syr tu adiáke sýges lathian, miro čhavó?” Jov phendiá: “Pal-dová so tyró Raj Devél, Devél, bičhadiá pe drom mánge.”

²¹Isaáko phendiá Jakovóske: “Jav pašyledýr, me čilavava tut, miro čhavó, ci tu san, čačes, miro čhavó Isávo, ci nad?”

²²Jakovo podgíia ke péskiro dad Isaáko, i jov čiladiá les, i phendiá: “Zan (glos), syr Jakovoste; a vastá, syr vastá Isavoste.”

²³I jov na ĥalyjá les, pal-dová so léskire vastá sys, syr vastá Isavoste, léskire pšaléste, balenca; i bahtiakirdiá les,

²⁴i phendiá: “Ci tu san miro čhavó Isávo?” Jov otphendiá: “Me som.”

²⁵I phendiá Isaáko: “Pode mánge, me pirihava miré-čhavéskire vešeskire čiriklién (dič), sob (kaj) te bahtiakirél tut miro iló.” Jakovo podyja léske, i jov xaja; jandiá léske i mol (vino), i jov pija.

²⁶Isaáko, léskiro dad, phendiá léske: “Jav pašyledýr, čamude man, miro čháva.”

²⁷Jov podgíia i čamudia les. I sungadia Isaáko léskire dúho, i bahtiakirdiá les i phendiá: isyn “Ĥáda, dúho isyn miré čhavestyr, syr feldatyr khandypen, savó bahtiakirdiá Raj Devél;

²⁸mek te del túke Devél bolybnáskire pahlyniatyr (rosatyr) i phuvjákire thulypnastyr, i but maró i mol (vino);

²⁹mek te javén dynar'jénca túke manušýtka rasy, i mek te kerén šerésa pe phuv semency túke; jav xulása pe tyré pšalénde, i mek te kerén šerésa ke phuv túke tyré-dákire čhavé; a kon košela tut — javéla kokoró prokošnó; kon bahtiakiréla tut — javéla kokoró bahtiakirdó!”

³⁰I sys adiáke: syr féni (tóka) kerdiá Isaáko bahtiakiribén pe Jakovoste, i syr vygijá Jakovo péskire dadéstyr Isaakostyr, to Isávo, léskiro pšal, javdiá péskire staribnastyr (ohotatyr) pal vešeskire čirikliende.

³¹Keradia i jov adiáke-pac' xabén, i jandiá péskire dadéske, i phendiá péskire dadéske: “Uštý, mro dádo, i xa tyré-čhavéskire vešeskire čiriklién, sob (kaj) te bahtiakirél man tyró iló.”

³²Isaáko, léskiro dad, phendiá léske: “Kon tu san?” Jov phendiá: “Me som tyró čhavó, tyró anglatunó Isávo.”

³³I izdrandyja drieván Isaáko, i phendiá: “Kon ža adavá, savó jandiá mánge vešeskire čiriklién (dič), i me xajom saréstyr, angíl syr tu javdián, i me bahtiakirdjom les, jov i javéla bahtiakirdó.”

³⁴Isávo šundiá péskire dadéskire lavá, ĥazdyjá zoralý i drieván kirki ĥodla, i phendiá péskire dadéske: “Miro dádo! Bahtiakir i man.”

³⁵Ne jov phendiá: “Tyró pšal javdiá xohaibnasa i lyjá tyró bahtiakiribén.”

³⁶I phendiá jov: “Ci na paldavá léske dynó lav: Jakovo, so jov man duj móly oblydžija? Jov lyjá miro anglatunó bijanypén, i ĥáda, akaná lyjá miro bahtiakiribén.” I phendiá: “Naúšto tu na mekcian mánge bahtiakiribén?”

³⁷Isaáko otphendiá Isavoske: “Ĥáda, me čhudjom les xulása pe túte, i sarén léskire pšalén otdyjom dro pishariben (rabstvo) léske, me dyjom léske maró i mol (vino); so me te keráv vaš túke, miro čháva?”

³⁸Ne Isávo phendiá péskire dadéske: “Naúšto, miro dádo, túte isyn jekh bahtiakiribén? Bahtiakir i man, miro dádo!” I ĥazdyjá Isávo péskiri zan, i zarondia.

³⁹I phendiá Isaáko, léskiro dad, léske: “Ĥáda, phuvjákire thulypnastyr javéla džiibén tyró, i bolybnáskire pahlyniatyr, so isyn uprál.

⁴⁰I tu javésa te dživés tyré kurtalása, i tu javésa te dynarines (te služynes) tyré pšaléske; ne javéla časo, kiéli tu ĥazdesape pe léste i sčhurdesa léskiro ĥámo tre meniatyr.”

⁴¹I drieván lyjá te na kamel Isávo Jakovós pal bahtiakiribén, savésa léskiro dad les bahtiakirdiá; i phendiá Isávo dre péskiro iló: syg javéna roibnytka dyvesá pal miré dadéste: i me zamarava péskire pšalés, Jakovós.

⁴²I piridyne Rieviekake Isavóskire lavá, lákire-phuredyršoneskire čhavéskire; i joj bičhadiá, i khardiá péskire tyknedyršones čhavés Jakovós, i phendiá léske: “Ĥáda, Isávo, tyró pšal, kedelape te zamarél tut;

⁴³i akaná, miro čháva, kande miré lavá, uštý, naš ke Laváno, miro pšal, dro Xarano,

⁴⁴i dživ léste vari-savó časo, ke dová, syr prodžála xolý tyré pšaléste,

⁴⁵paka prodžála tyré-pšaleskiri xolý pe túte, i jov bistrela, so tu kerdián léske: tedy me bičhaváva, i me láva tut odothýr; vaš so mánge dro jekh dyvés te našavav dujén tumen?”

⁴⁶I phendiá Rievieka Isaakóske: “Me na kamám džiibén pal Xietoskire čhajende, kóli Jakovo léla čha paloróm Xietoskire čhajendyr, savé isyn adalé phuvjákire čhajendyr, tedy ke so mánge i džiibén?”