Read Biblija - Pe Baltitko Romani čib (Romanes) 2019 Baltic Romani Bible Džiibén 28 Bible Online

Džiibén 28 - Biblija - Pe Baltitko Romani čib (Romanes) 2019 Baltic Romani Bible bible

Džiibén 28

¹I khardiá Isaáko Jakovós, i bahtiakirdiá les, i priphendiá léske, i phendiá: “Na le péske Xanaanoskire-čhajendyr romniá.

²Uštý, džá dre Miesopotamija, dro Vafuiloskiro kher, tyré-dákiro dad, i le odothýr péske romniá, Lavanoskire čhajendyr, tyré-dákire pšalestyr;

³Mek Devél Sarezorjákiro, te bahtiakirél tut, mek te bijandjon but tútyr, i mek te javél tútyr but manušá, mek te javén tútyr but manušýtka nácyi (narody).

⁴I mek te del túke bahtiakiribén Avraamóskiro, i tyré-čhavéngire rodóske túsa, sob (kaj) tu te priles phuv syr meknó mištypén, pe saví tu sánas čúžo, saví Devél dyjá Avraamóske!”

⁵I otmekciá Isaáko Jakovós, i jov gijá dre Miesopotamija ke Laváno, Aramejaninoskire-Vafuiloskiro čhavó, ke Rieviekakiro pšal, Jakovoskiri i Isavoskiri daj.

⁶Isávo dykhciá, so Isaáko bahtiakirdiá Jakovós, i bičhadiá les dre Miesopotamija te lel odothýr péske romniá, i priphendiá léske, phení: “Na le Xanaanoskire čhajendyr romniá;”

⁷i syr Jakovo kandyjá péskire dadés i da, to gijá dre Miesopotamija.

⁸I dykhciá Isávo, so Xanaanoskire čhaja sys na pir iló léskire dadéske Isaakóske.

⁹I gijá Isávo ke Izmailo, i lyjá romniá péske Mahalafa, Izmailoskirja čha, Avraamóskire-čhavéskire, Navaifoskire (Nevaitofoskire) pheniá, uprál péskire javire romniendyr.

¹⁰Jakovo vygijá Virsavijatyr, i gijá dro Xarano,

¹¹i javdiá pe jekh štéto, i jaciápe odój te rat'kirel, pal-dová so besciá kham. I lyjá odolé štetóstyr jekh bar, i čhudiá péske tel šeró, i pasijá pe dová štéto.

¹²I dykhciá (dyjá) suné: ĥáda, stylba / uklaní (liesvíca) sys terdy pe phuv, a lákiro vučipén dodžála ke bolybén; i, ĥáda, Devléskire Jangóly ĥazdénape i džána telé pir láte.

¹³I ĥáda, Raj Devél sys terdó pe láte i rakirélas: “Me som Raj Devél (Jahvá), Devél Avraamóskiro, tyré-dadéskiro, i Isaakoskiro Devél. Phuv, pe saví tu san paštó, Me dáva túke i tyré-čhavéngire rodóske;

¹⁴i javéla baró tyró ródo, syr phuvjákiro práho; i tu javésa te dživés dur až ke mórjo (derjáv), i ke vastóko, i ke paš-rat, i ke paš-dyvés; i bahtiakirenape tútyr i tyré rodóstyr saré kherítka ródy (pliémi) pe phuv;

¹⁵i ĥáda, Me som túsa, i Me zrakháva tut, kaj by tu te na javes, karik by tu te na džas; i Me riskiráva tut pe daja phuv, Me na jačkirava tut, paka Me keráva saró pir dová, so Me túke phendjom.”

¹⁶Jakovo uštyjá péskire soibnastyr i phendiá: “Čačes, Ráj Devél isyn pe davá štéto; a me na džindjom!”

¹⁷I strahadyja i phendiá: “Syr darano isyn davá štéto! Davá nisó javír, syr Devléskiro Kher, a davá isyn bolybnaskiri pórta (vráty).”

¹⁸I uštyjá Jakovo tasiárles (ránes) pe zlóko, i lyjá bar, savó jov čhudiá péske tel šeró syr šerand, i čhudiá les syr ripiribnytko stýlbo (pomníko); i čhudiá upré pe léste jeliejo (olivítko dzet).

¹⁹I khardiá dová štéto: Viefil' [Bet-El'-ju.o.], a angledýr dolé-foróskiro lav sys: Luzo.

²⁰I dyjá Jakovo sovláh i phendiá: “So Devél te javél mánca, i Jov zrakhéla dre davá drom man, dre savó me džáva, i déla mánge te xav maró i ídia te urjavpe,

²¹i me dro ramánjo (miro) risjováva dre miré-dadéskiro kher, i javéla Ráj Devél miré Devlésa,

²²to davá bar, savó me čhudjom syr ripiribnytko stýlbo (pomníko), javéla Devléskire Kheresa; i saréstyr, so Tu, Dévla, désa mánge, me dáva Túke déšto paš.”