Read Biblija - Pe Baltitko Romani čib (Romanes) 2019 Baltic Romani Bible Džiibén 29 Bible Online

Džiibén 29 - Biblija - Pe Baltitko Romani čib (Romanes) 2019 Baltic Romani Bible bible

Džiibén 29

¹I uštyjá Jakovo pe ĥerá i gijá pe vastokoskire-čhavengiri phuv.

²I dykhciá: ĥáda, pe félda ĥanýng, i odój sys trin stády bakrén, savé sys pašté pašýl láte; pal-dová so dolé ĥanyngatyr paniakirde stády bakréngire. Pe ĥanyngakiro thadypen sys baró bar.

³Kiéli skedenaspe odorík saré gurty, ravenas krig bar ĥanyngakire thadypnastyr i paniakirde bakrén, paló davá nevés čhudé bar pe léskiro štéto.

⁴Jakovo phendiá lénge: “Miré pšalále! Katýr tumé san?” Jone phendlé: “Ame sam Xaranostyr.”

⁵Jov phendiá lénge: “Ci džinéna tumé Lavanos, Nahoroskire čhavés?” Jone phendlé: “Džinása.”

⁶Jov phendiá lénge: “Ci isyn sastó jov? Jone phendlé: “Sasto; i, ĥáda, léskiri čhaj, Rahíl', džála bakrenca.”

⁷I jov phendiá: “Áke, dyvés isyn baró; nane časo te skedes guruvén; paniakiren bakrén, i čaraven.”

⁸Jone phendlé: “Ame naštý (na moginasa), paka pritradena saró skoto (kheritkoné murdalén), i ravena krig bar ĥanyngatyr; tén'či ame javása te paniakiras bakrén.”

⁹Jov rakirdiá duredýr lénca, syr javdiá Rahíl' péskire dadéskire bakrenca, pal-dová so joj čaradia len.

¹⁰Kiéli Jakovo dykhciá Rahilia, Lavanoskirja čha, péskire-dákire pšaleskirja, to tedy podgíia Jakovo, radia krig bar ĥanyngatyr i paniakirdia Lavanoskire bakrén, péskire dákire i bakrén Lavanoskiren pšaleskiren.

¹¹I čamudia Jakovo Rahilia, i ĥazdyjá péskiri zan i zarondia.

¹²I phendiá Jakovo Rahiliake, so jov isyn seménca lákire dadéske, i so jov isyn Rieviekakiro čhavó. A joj prastándyja, i phendiá péskire dadéske.

¹³O Laváno, syr šundiá pal Jakovoste, péskire-pheniakire čhavéste; to prastándyja muial (gil) léske, oblyja les, i čamudia, i jandiá les dre péskiro kher; i jov rosphendiá Lavanoske davá saró.

¹⁴Laváno phendiá léske: “Čačes, tu san kokalo miro i loč (plot').” I dživdiá léste Jakovo saró čhon.

¹⁵I Laváno phendiá Jakovóske: “Naúšto tu bi pleskiribnaskiro javésa te dynarines (te služynes) mánge, pal-dová so tu san seménca? Phen mánge, sósa te pleskirav túke?”

¹⁶Lavanoste sys duj čhaja; phuredyršonakiro lav: Lija; tyknedyršonakiro lav: Rahíl'.

¹⁷Lija dykhciá fujes, a Rahíl' sys šukár stemása (stanósa) i sys šukár mósa.

¹⁸Jakovóske jaciá pir iló (jov pokamdia) Rahíl', i phendiá: “Me javáva te dynarinav túke eftá (bitrinéngiro deš) berš pal Rahiliate, tyré-tyknedyršone čhate.”

¹⁹Laváno phendiá: “Mánge isyn fedýr te otdav la pal túte, syr la te otdav pal savéste javiréste; dživ mánde.”

²⁰Jakovo dynarindiá pal Rahiliate eftá berš; ne jone sykadyne léske pal vari-kicý dyvesá, pal-dová so léske sys pir iló joi.

²¹I phendiá Jakovo Lavanoske: “De mirja romniá, pal-dová so mánge podgíia časo (cýro), sob (kaj) te zadžav ke joi.”

²²O Laváno khardiá sarén manušén dolé štetóstyr i kerdiá bjav.

²³Bel'veliasa jov lyjá peskirjá čha Lija i jandiá la ke jov; i zagijá ke joj Jakovo.

²⁴I Laváno dyjá peskirjá dynárica Ziel'fa péskire čhake Lijake.

²⁵I sys adiáke: pe tasiárla (rankostyr), ake, jov dykhciá, so davá sys Lija. I phendiá Lavanoske: “So da tu kerdián mánca? Ci na pal Rahiliate me dynarindjom túte? Pal so tu xohadian man?”

²⁶Laváno phendiá: “Naštý adiáke te kerás pe amaró štéto, sob (kaj) tyknedyršona čha te otdas paloróm angledýr phuredyršonatyr;

²⁷dživ kurko adaliasa; paló davá me dáva túke i odolja, pal dynaribén, savó tu javésa te dynarines nevéstyr javír eftá berš.”

²⁸Jakovo adiáke i kerdiá, i dživdiá kurko adaliasa. I Laváno dyjá Rahilia, peskirjá čha, léske dre romniáte.

²⁹I Laváno dyjá peskirjá dynárica (slugica) Vala péskire čhake Rahiliake.

³⁰Jakovo zagijá i ke Rahíl', i jov kamdiá butýr Rahilia, syr Lija; i sys jov dynarisa léste javír eftá (bitrinéngiro deš) berš.

³¹Kiéli Devél dykhciá, so jov drieván na kamdiá Lija, to otčhakirdiá láke ločoví (utroba), a Rahíl' sys bičhavorengiri.

³²Lija pharija i bijandiá čhavés, i dyjá léske lav: Ruvimo, pal-dová so joj phendiá: “O Raj Devél dykhciá miro pharó džiibén, akaná javéla miro rom te kamel man.”

³³I javír mólo joj iaciá pharí, i bijandiá čhavés, i phendiá: “O Raj Devél šundiá, so man rom na kaméla, i dyjá mánge javirés.” I dyjá léske lav: Simieono (Siemjono).

³⁴I tríto mólo jaciá pharí, i bijandiá čhavés, i phendiá: “Akaná priphandelape ke me miro rom; pal-dová so me bijandjom léske trinen čhavén.” Kodoléske tritoneske dynó lav: Liévijo.

³⁵I štárto mólo jaciá pharí, i bijandiá čhavés, i phendiá: “Akaná me barjakirava slavása Ras-Devlés.” Paldavá dyjá léske lav: Juda. I pirijaciá te bijanél.