Read Biblija - Pe Baltitko Romani čib (Romanes) 2019 Baltic Romani Bible Džiibén 30 Bible Online

Džiibén 30 - Biblija - Pe Baltitko Romani čib (Romanes) 2019 Baltic Romani Bible bible

Džiibén 30

¹I dykhciá Rahíl', so joj na bijanéla čhavén Jakovóske, i Rahíl' dyjá jakhalo péskire pheniake, i phendiá Jakovóske: “De mánge čhavén; a kóli na adiáke, to me meráva.”

²Jakovo xoliásyja pe Rahiliate i phendiá: “So me som Devél, Savó na dyjá túke čhavén?”

³Joj phendiá: Ĥáda, isyn mirí dynárica Vala; zadžá ke joi; mek joj te bijanél pe miré čangá, sob (kaj) i mánde te javél látyr čhavé.”

⁴I dyjá joj Vala, peskirjá dynarka léske romniása; i zagijá ke joj Jakovo.

⁵Vala jaciá pharí, i bijandiá Jakovóske čhavés.

⁶I Rahíl' phendiá: “Obsendindia man Devél, i šundiá mirí zan (glos), i dyjá mánge čhavés.” Paldavá dyjá léske lav: Dano.

⁷I nevéstyr jaciá pharí i bijandiá Vala, Rahiliakiri dynárica, javire čhavés Jakovóske.

⁸I Rahíl' phendiá: “Baré zorjása me probindjom zorja péskire pheniasa i pirizorjakirdjom la.” I dyjá léske lav: Niefalimo.

⁹Lija dykhciá, so joj pirijaciá te bijanél, i lyjá peskirjá dynarka Ziel'fa, i dyjá la Jakovóske romniása.

¹⁰I Ziél'fa, Lijakiri dynárica, bijandiá Jakovóske čhavés.

¹¹I Lija phendiá: “Jaciá butýr.” I dyjá léske lav: Gado.

¹²I Lijakiri dynárica Ziél'fa bijandiá javire čhavés Jakovóske.

¹³I phendiá Lija: “Baht mánge; paldavá javéna te kharén man džuvliá “bahtaliasa.” I dyjá léske lav: Asiro.

¹⁴Ruvimo gijá dro dová časo, kiéli ukedenas maró feldatyr, i lathiá mandragorytka phabá pe félda, i jandiá len péskire dáke Lijake. I Rahíl' phendiá Lijake: “De mánge tyré čhavéskire mandragory.”

¹⁵Ne joj phendiá láke: “Naúšto nauhtylla (nádosi) túke dová, so tu zakedyjan miré romes, so tu kamésa te zakedes i mandragory miré čhavéskire?” Rahíl' phendiá: “Adiáke mek jov te pasjol daja rat túsa, pal tyré-čhavéskire mandragory.”

¹⁶Jakovo javdiá bel'velié feldatyr, i Lija vygijá gil (pe strieč) léske, i phendiá: “Zadžá ke me; pal-dová so me tut kindjom pal miré-čhavéskire mandragory.” I pasijá jov lása dre daja rat.

¹⁷I šundiá Devél Lija, i joj iaciá pharí, i bijandiá Jakovóske pandžtone čhavés.

¹⁸I phendiá Lija: “Devél dyjá mánge pale, pal-dová so me dyjom peskirjá dynárica péskire romeske.” I dyjá léske lav: Isaharo.

¹⁹I nevéstyr Lija jaciá pharí, i bijandiá Jakovóske šovtone čhavés.

²⁰I phendiá Lija: “Devél mánge dyjá naj fedýr mištypén; akaná javéla te dživél mánde miro rom, pal-dová so me bijandjom léske šoven čhavén.” I dyjá léske lav: Zavulono.

²¹Korigedýr (pozžedýr) joj bijandiá čha: i dyjá láke lav: Dina.

²²I lyjá te priripirel Devél pal Rahiliate, i šundiá la Devél, i otčhakirdiá lákiri ločoví (per).

²³Joj iaciá pharí, i bijandiá čhavés, i phendiá: “Devél zlyjá mirí ladž.”

²⁴I dyjá léske lav: Iosifo (Joza) i phendiá: “Raj Devél déla mánge i javirés čhavés.”

²⁵Korigedýr (pozžedýr) doléstyr, syr Rahíl' bijandiá Iosifos (Jozas), Jakovo phendiá Lavanoske: “Mek man, i me džáva pe péskiro štéto i pe péskiri phuv;

²⁶otdé miré romnién i čhavén, pal savénde me dynarindjom túke, i me džáva; pal-dová so tu džinésa mirí butý, saví me kerdjom túke.”

²⁷I phendiá Laváno léske: “Kóli me te lathav láska angíl tyré jakhá, me lyjom pe jakh, so pal túte Raj Devél bahtiakirdiá man.”

²⁸I phendiá: “Phen, kicý te pleskirav, i me dáva.”

²⁹I phendiá Jakovo léske: “Tu džinésa, syr me dynarindjom túke, i savé jačné tyré kherítka murdalá angíl mánde;

³⁰pal-dová so nábut sys kherítka murdalá túte angíl mánde, a akaná jaciá but; Raj Devél bahtiakirdiá tut miré javibnasa; kiéli me javáva te keráv butý vaš péskiro kher?”

³¹I phendiá Laváno: “So te dav túke?” Jakovo phendiá: “Na de mánge ničí. Kóli jekh mánge kerésa, so me phenáva, tedy me nevéstyr javáva te čaravav i te rakhav tyré bakrén.

³²Me adadyvés prodžava pir saró tyré-bakrengiro ĥurto (stada); otle léndyr raznone krapinkenca i piatnenca skoto, saró kaló skoto bakriendyr, adiáke-pac' piatnenca i krapinkenca buzniéndyr (kozendyr). Dasavo skoto javéla mánge syr mazúri (nagrada).

³³I javéla te rakirél pal mánde angíl túte miro čačipén dro časo, savó javéla, tu javésa te dykhés pe mazúri (nagráda) mirí. Kažno buzniéndyr na krapinkenca i na piatnenca, i bakriendyr, savé isyn nakale, davá javéla sýrby čordo mánde.”

³⁴Laváno phendiá: “Mištó, mek te javél pir tyró lav.”

³⁵I otlyja dro dová dyvés buznen krapinkenca i piatnenca, i sarén buznien krapinkenca i piatnenca, pe savénde sys vari-kicý parnypen, i sarén kalen bakrén, i otdyjá len pe péskire-čhavéngire vastá;

³⁶i sykadiá dlengipén maškír péste i Jakovoste pe triné-dyvesýtko drom. Jakovo rakhciá Lavanoskiro tyknó skoto, savó jaciápe.

³⁷Jakovo lyjá jale (sviaža) topoljoskire randjorja mindaljostyr i javorostyr, i vyčhindia pe lénde parné dromore, zlyjá ke parnypen kora (čalka), saví sys pe randjorja,

³⁸i čhudiá randjorja vyčhinybnasa angíl skoto dre panitka čaraibnytka (koryty), karik skoto javélas te p'jél, i kaj javi te pjol, pharjolas angíl randjorja.

³⁹I pharjolas skoto angíl randiá, i bijandjolas (lotjolas) skoto riabo, i krapinkenca, i piatnenca.

⁴⁰I otlyja Jakovo bakrorén i čhudiá mósa skoto ke riabo i ke saró kaló Lavanoskiro skoto; i rikirdia péskire ĥurty (stády) dre rig, i na čhudiá khetané len Lavanoskire skotosa.

⁴¹Kažno mólo, kiéli pharjolas zoraló skoto, Jakovo čhuvelas randjorja dre čaraibnytka (koryty) angíl skotoskire jakhá, sob (kaj) jov te pharjol angíl randjorja.

⁴²A kiéli pharjolas nazoralo skoto, tedy jov na čhudiá. I Lavanoske jačelaspe nazoralo skoto, a zoraló Jakovóske.

⁴³I kerdiápe davá manúš drieván barvaló, i sys léste but tykné kherítka murdalá (tyknó skoto), i dynaricen, i dynar'jén, i vierbliuden, i oslen.