Read Biblija - Pe Baltitko Romani čib (Romanes) 2019 Baltic Romani Bible Džiibén 31 Bible Online

Džiibén 31 - Biblija - Pe Baltitko Romani čib (Romanes) 2019 Baltic Romani Bible bible

Džiibén 31

¹I šundiá Jakovo Lavanoskire-čhavéngire lavá, savé rakirdé: “Jakovo lyjá péske saró, so sys amareste dadéste, i amaré-dadéskire mištypnástyr kerdiá saró davá barvalypén.”

²I Jakovo dykhciá Lavanoskiro muj, i ĥáda, jov na sys dasavo ke jov, syr sys tasiá.

³I Raj Devél phendiá Jakovóske: “Risjov pe tyré-dadengiri phuv, kaj tu bijandyjan; i Me javáva túsa.”

⁴I bičhadiá Jakovo, i khardiá Rahilia i Lija pe félda, ke péskiri tykné-kheritkoné-murdalengiri stada,

⁵i phendiá lénge: “Me dykháva tumaré-dadéskiro muj, so jov ke me isyn na dasavo, syr sys tasiá; ne miré-dadéskiro Devél sys mánca;

⁶tumé džinéna kokoré, so me saré zorjátyr dynarindjom tumaré dadéske,

⁷a tumaró dad xohadia man i deš móly piriparudia mirí mazúri (nagrada). Ne Devél na dyjá léske te kerél čoripén mánge.”

⁸Kiéli jov phendiá: ‘So kherítka murdalá (skoto) krapinkenca javéla túke dre mazúri,’ tedy saró skoto lyjá te bijandjol krapinkenca. A kiéli jov phendiá: “Riaba javéna túke dre mazúri, tedy saró skoto bijandiá riaba.”

⁹I Devél otlyja tumaré dadéstyr skoto, i dyjá mánge.

¹⁰Jekhvar dre dasavo časo, kiéli skoto pharjola, me poddykhcjom, i dykhcjom dro sunó, i ĥáda, buzne (kozly), ĥazdynépe pe buzniénde, riaba krapinkenca i piatnenca.

¹¹Devléskiro Jangólo phendiá mánge dro sunó: “Jakovo!” Me phendjom: “Ĥáda, me som.”

¹²Jov phendiá: “Gazde tyré jakhá i podykh: saré buzne, savé ĥazdynépe pe skoto, riaba krapinkenca i piatnenca, paldavá Me saró dykháva, so Laváno keréla túsa;

¹³Me som Devél, Savó sykadyjá túke dro Viefíljo, kaj tu čhudián jeliejo (olivítko dzet) pe ripiribnytko stýlbo (pomniko), i kaj tu Mánge dyján lav; akaná, uštý, vydža dalé phuvjátyr i risjov pe tyrí phuv, kaj tu bijandyjan.”

¹⁴Rahíl' i Lija phendlé dro otphenybén léske: “Ci isyn vari-saví paš ci meknó mištypén aménge dro amaré-dadéskiro kher?

¹⁵Ci na pal peskirende jov amen ginéla? Pal-dová so jov bikindia amen, i prohaia amaró rup;

¹⁶pir saró barvalypén, savó otlyja Devél amaré dadéstyr, isyn amaró i amaré čhavéngire, i adiáke saró ker, so Devél phendiá túke.”

¹⁷Tén'ci uštyjá Jakovo, čhudiá pe vierbliudende péskire čhavén i romnién,

¹⁸i lyjá pésa saró péskiro barvalypén i saró péskiro skoto, savó jov doresciá, léskiro barvalypén, savó jov lyjá péske dre Miesopotamija, sob (kaj) te džal ke Isaáko, péskiro dad, pe Xanaanóskiri phuv.

¹⁹I syr Laváno gijá te podčhinel péskiro tyknó skoto (bakrén), tedy Rahíl' čordia ídoly, savé sys lákire dadéste.

²⁰Jakovo čordia Lavanostyr Aramejaninoste iló, pal-dová so jov na phendiá léske, so džála.

²¹I gijá jov léstyr sarésa, so léste sys; i uštyi, pirigija reka (len') i gijá ke bérga Galaádo.

²²Pe tríto dyvés Lavanoske phendlé, so Jakovo gijá léstyr.

²³Tedy jov lyjá pésa sarén peskiren semencen, i tradyjape pal léste eftá dyvesá, i dotradyja les pe bérga Galaádo.

²⁴I Devél javdiá ke Aramejanino Laváno ratý dro sunó, i phendiá léske: “Rakhpe, na rákir Jakovóske ni lačhipén, ni čoripén.”

²⁵I dotradyja Laváno Jakovós; a Jakovo čhudiá péskiri šátra pe bérga, i Laváno čhudiá šátra péskire semencasa pe bérga Galaádo.

²⁶I Laváno phendiá Jakovóske: “So tu kerdián? Vaš so tu xohadian man i lydžijan pésa miré čhajén, syr pliennonen, savén léna kurtalása.

²⁷Sóske tu čorahanés nastian, i ĥaradyjan mándyr, i na phendián mánge? Me otmekavas tut skamindesa i gilienca, timpanosa i guslienca;

²⁸tu na dyján mánge te čamudav péskire ŭnuken i čhajén; na god'vares tu kerdián.

²⁹Isyn dre miro vast zor te keráv tuménge čoripén; ne tyré-dadéskiro Devél tasiá rakirdiá ke me i phendiá: ‘Rakhpe, na rákir Jakovóske ni lačhipén, ni čoripén.’

³⁰Ne mek tu gíian mándyr, pal-dová so tu drieván zakamdian te javes dre tyré-dadéskiro kher: palsó tu čordian miré devloré?”

³¹Jakovo otphendiá Lavanoske i phendiá: “Me darandyjom (dardjompe), me dumindjom, sob (kaj) tu te na otles péskire čhajén mándyr,

³²konéste tu lathesa tyrén devloré, odová na javéla džidó. Angíl amarí seménca phučpe, so mánde isyn, i le péske.” Jakovo na džindiá, so Rahíl' len čordia.

³³I psirdiá Laváno dre Jakovoskiri šátra, i dre Lijakiri šátra, i dre dujé-dynaricengiri šátra, ne na lathiá. I vygijá Lijakire šatratyr, zagijá dre Rahiliakiri šátra.

³⁴Rahíl' lyjá idolen, i čhudiá len tel vierbliudoskiri zen (sidjolka), i bestiá pe lénde. I Laváno obrodyja sarí šátra, ne na lathiá len.

³⁵Joj phendiá péskire dadéske: “Mek te na xoliasol miro xulái, so me naštý (na moginav) angíl túte te uštav; pal-dová so mánde isyn džuvlitko.” I jov rodyja, ne na lathiá ídoly.

³⁶Jakovo xoliásyja, i lyjá te košelpe Lavanosa. I lyjá Jakovo te rakirél, i phendiá Lavanoske: “Saví isyn mirí bang, savó isyn miro grého, so tu tradesape pal mánde?

³⁷tu piridykhcian mánde saró, so tu lathian saréstyr, so isyn tyré kheréstyr? Sykáv adáj angíl miré semencate i tyrende; mek jone te rossendiakiren amen dujén.

³⁸Ĥáda, biš berš me sómas ke tu; bakré i buzne (kozly) tyré na vyčhurdyne; tyré gurtostyr (stadatyr) bakrén me na xajom;

³⁹zahanes, ci rozriskirde riskiribnáskire murdalesa (zvierjosa) me ke tu na jandjom; davá sys by mirí uriéža (ubytko); tu mándyr rodesas, ci dyvesé so xasjolas, ci ratiákiro;

⁴⁰me menčyndjompe dyvesé xačkiribnastyr, a ratý šylypnastyr; i soiben miro našelas miré jakhéndyr.

⁴¹Dasavé miré biš berš sys dro tyró kher. Me dynarindjom túke dešuštar berš pal tyré dujénde čhajénde i šov berš pal tyré kheritkoné murdalénde; a tu deš móly parudian mirí mazúri (nagrada).

⁴²Kóli te na javél mánca miré-dadéskiro Devél, Avraamóskiro Devél i Isaakoskiri dar; to tu akaná man nisosa otmekesas. Devél dykhciá miro pharó džiibén i miré-vastengiri pharí butý ke pritasaiben; i sykadiá tyrí bang pal mánde.”

⁴³I otphendiá Laváno i phendiá Jakovóske: “E čhaja — miré čhaja; čhavé — miré čhavé; skoto — miro skoto, i saró, so tu dykhésa, davá isyn miro: ci saštý (mogináva) me akaná vari-so te keráv miré čhajénca i léngire čhavénca, savén jone bijandle?

⁴⁴Akaná kerása dorakiribén pal ramánjo (miro) me i tu, i davá javéla dophenybnasa maškír mánde i túte.”

⁴⁵I lyjá Jakovo bar, i čhudiá les dro ripiribnytko stýlbo (pomniko).

⁴⁶I phendiá Jakovo péskire semencake: “Keden bará.” Jone lyné bará, i kerdé bérgica; i xané odój pe bérgica.

⁴⁷I khardiá les Laváno: Iiegar-Sagadufa [Jegar-Sagaduta-ju.o.]; a Jakovo khardiá les Galaádo [Gal'-Edo-ju.o.].

⁴⁸I phendiá Laváno: “Adadyvés daja bérgica maškír mánde i túte isyn sýrby jakhítko (svidietieljo). Paldavá i léske dynó lav: Galaádo,

⁴⁹adiáke-pac' kharélape: Micpa, doléstyr, so phendiá Laváno: “Mek te dykhél Raj Devél pe mánde i pe túte, kiéli ame javása dur jekh jekhestyr.

⁵⁰Kóli tu javésa fujes te kerés miré čhajenca, cji, kóli tu lésa (te les tu) butýr miré čhajendyr javire romnien, usajékh kóli nane manušés maškír aménde, ne dykh, Devél isyn jakhítko maškír mánde i túte.”

⁵¹I phendiá Laváno Jakovóske: “Ĥáda, isyn daja bérgica i, ĥáda, isyn ripiribnytko stýlbo, savó me čhudjom maškír mánde i túte;

⁵²daja bérgica isyn jakhítko, i davá ripiribnytko stýlbo (pomniko) isyn jakhítko, so ni me na piridžava ke tu pal daja bérgica, ni tu na piridžasa ke me pal daja bérgica i pal davá ripiribnytko stýlbo, vaš čoripén.

⁵³Avraamóskiro i Nahoroskiro Devél, mek te javél sendarisa maškír aménde, léngire-dadéskiro Devél.” Jakovo sovlahadiá péskire dadéskire Isaakoskire darása.

⁵⁴I začhindiá i jandiá Jakovo svénto dyibén (žértva) pe bérga, i khardiá péskire semencen te xan maró; i jone xané maró i rat'kirde pe bérgica.

⁵⁵I Laváno uštyjá tasiárles pe zlóko (rankosa) i čamudia péskire ŭnuken i čhajén, i bahtiakirdiá len, i gijá, i risijá Laváno pe péskiro štéto.