Read Biblija - Pe Baltitko Romani čib (Romanes) 2019 Baltic Romani Bible Džiibén 32 Bible Online

Džiibén 32 - Biblija - Pe Baltitko Romani čib (Romanes) 2019 Baltic Romani Bible bible

Džiibén 32

¹I gijá Jakovo péskire dromésa, i pirilyne les Devléskire Jangóly.

²Jakovo dykhciá len, i phendiá: “Davá isyn Devléskiro taboro (lod).” I dyjá lav dolé štetoske: Mahanaimo.

³I bičhadiá Jakovo angíl péste manušén ke péskiro pšal Isávo pe Sieiroskiri phuv, pe Edómo štéto,

⁴i priphendiá lénge, rakirí: “Adiáke phenén miré xuláske Isavoske: ‘Ĥáda, so rakiréla tyró pishári Jakovo: Me dživdjom Lavanoste, i dživdjom péske davá časo,

⁵i isyn mánde guruva i osly (miegárja) i tyknó skoto (bakré), pisharicy (rabyni) i pishárja (raby); i me bičhadjom manušés te phenél pal mánde miré xuláske, sob (kaj) te lathav láska angíl tyré jakhá.’”

⁶I manušá, savé sys bičhadé te phenén, risiné ke Jakovo, i phendlé: “Ame psirdiam ke tyró pšal Isávo; jov džála muial ke tu (pe strieč), i lésa isyn štaršelá manušá.”

⁷Jakovo drieván strahadyja i pyjá dre dar, i manušén, savé sys lésa, jov roskerdiá pe paš, i tyknó i baró skoto i vierbliuden, pe duj tabuny.

⁸I phendiá: “Kóli Isávo peréla maribnása pe jekh tabuno i les rozmarla, tedy palatunó (posliednjo) tabuno saštý (moginéla) te zrakhelpe.”

⁹Jakovo phendiá: “Miré dadéskiro Avraamóskiro Devél i Devél miré dadéskiro Isaakoskiro, Rajo Dévla, Savó phendiá mánge: “Risjon pe tyrí phuv, kaj tu bijandyjan, i Me javáva te pomoginav túke!

¹⁰Me na som mol saró lačhipén i tangipén, savé Tu kerdián Tyré pisharíske; pal-dová so me miré khijasa pirigijom davá Iordáno; a akaná mánde isyn duj tabuny.

¹¹Zrákh man miré-pšaléskire vastéstyr, Isavóskire vastéstyr, pal-dová so me darava léstyr, sob (kaj) jov, syr javéla, te na zamarél man i da lákire čhavorenca.”

¹²Tu phendián: “Me javáva te dav vast (te pomoginav) túke, i tyré — čhavéngiro ródo keráva, syr morjoskiro (derjavéskiro) práho, savó te na gines, pal-dová, so les but.”

¹³I dre daja rat Jakovo rat'kirdia odój. I lyjá doléstyr, so léste sys, dro počastunko Isavoske, péskire pšaléske:

¹⁴dujšelá buznien (kozen), biš buznen (kozlen), dujšelá bakrien, biš bakrén,

¹⁵trijánda vierbliudicen, savé došenape, léngire khurorenca štardešá gurumnien, deš guruvén, biš oslicen, deš oslen.

¹⁶I péskire pishar'jénge jov dyjá dre vastá kažno stada peskirenca (rozdiél'nes), i phendiá péskire dynar'jénge: “Džán angíl mánde, i jačkiren štéto stadatyr ke stada.”

¹⁷I priphendiá anglatuneske, i phendiá: “Kiéli miro pšal Isávo dykhelape túsa i phučela tútyr, rakirí: “Konéskiro tu san?” i “Karik džása?” i “Konéskiri isyn daja stada angíl túte?”,

¹⁸to tu phen: ‘Tyré-pishariskiro Jakovóskiro, davá isyn počastunko, bičhadó miré xuláske Isavoske; ĥáda, i jov kokoró isyn pal aménde’.

¹⁹Dová-pac' jov priphendiá i javireske i tritoneske, i sarénge, savé giné pal stády, rakirí: “Adiáke phenén Isavoske, kiéli dykhenape lésa;

²⁰i phenén: ‘Ĥáda, i tyró pishári Jakovo džála pal aménde’. Paldavá jov phendiá kokoró dre péste: ‘Kovliakirava me les počastunkenca (darenca), savé džána angíl mánde; i korigedýr (pozže) dykháva léskiro muj; saštý (moginéla) te javél, so jov priléla man.’”

²¹I giné počastúnki angíl léste; a jov doiá rat rat'kirdia dro taboro / lod (stáno).

²²I uštyjá jov dre doiá rat, i lyjá dujén péskire romnién, i dujén péskire pisharicen, i peskiren dešujékh čhavén, pirigija pir paní Javoko brodosa.

²³I lyjá len, i pirilydžija pir thadypen panieskiro, i saró, so léste sys.

²⁴I jaciápe Jakovo jekhdžinó. I sprobinelas zorja Vari-Kon lésa, paka lyjá te šerinelpe dyvés;

²⁵i odová Vari-Kon, dykhí, so Jov na léla upralypén pe Jakovoste, čiladiá léskiri ĥerój, kaj isyn stjogno (stac') i dukhadia Jakovoskiri ĥerjakiri phabaj (sustavo), kiéli Jakovo sprobinelas zorja Lésa.

²⁶I phendiá: “Otmek Man; pal-dová so jaciá zlokico.” O Jakovo phendiá: “Na otmekáva Tut, angíl dová, syr Tu bahtiakiresa man.”

²⁷I phendiá: “Syr isyn tyró lav?” Jov phendiá: “Jakovo.”

²⁸I phendiá: “Akaná lav túke javéla na Jakovo, a Izrailjo; pal-dová so tu sprobindian zorja Devlésa, i tu manušén pirizorjakiresa.”

²⁹I Jakovo phuciá léstyr, rakirí: “Phen Tyró lav, me mangáva.” Ne Jov phendiá: “Vaš so tu phučesa pal Miro lav?” I bahtiakirdiá les odój.

³⁰I dyjá Jakovo dolé štetoske lav: Pienuelo [Peni-El'-ju.o.], pal-dová so rakirdiá jov: “Me dykhcjompe Devlésa muj ke muj, i zrakhciape miro džiibén.”

³¹I uštyjá kham, kiéli jov džálas pašýl Pienuelo; i langandyja jov pe péskiro stjogno.

³²Paldavá i akaná Izrailjoskire čhavé na xána žyly, savé isyn pe phabaj (sustavo) stjognoskiri, pal-dová so, Kon sprobindia zorja, čiladiá žyly pe Jakovóskiro stjogno dre phabaj.