Read Biblija - Pe Baltitko Romani čib (Romanes) 2019 Baltic Romani Bible Džiibén 33 Bible Online

Džiibén 33 - Biblija - Pe Baltitko Romani čib (Romanes) 2019 Baltic Romani Bible bible

Džiibén 33

¹Ĥazdyja Jakovo jakhá, i dykhciá, i, ĥáda, džála Isávo, i lésa štaršelá manušá. I jov roskerdiá pe paš Lijakiren čhavén, Rahiliakiren i dujén dynaricakiren (slugicengiren).

²I čhudiá dynaricakiren i léngire čhavén angíl, Lija i lákire čhavén palál pal lénde, a Rahilia i Jozas (Iosifos) palál.

³A kokoró gijá angíl lénde, i kerdiá šerésa (klonindiape) ke phuv eftá (bitrinéngiro deš) móly, podgií ke péskiro pšal.

⁴Isávo prastándyja ke jov gil (pe strieč), i oblyja les, i pyjá léske pe men, i čamudia les, i jone rondlé.

⁵I dykhciá Isávo i dykhciá romnién i čhavén, i phendiá: “Kon isyn adalé túte?” Jakovo phendiá: “Čhavé, savén Devél dyjá tyré pisharíske.”

⁶I podginé dynaricy i léngire čhavé, i kerdé šerésa ke phuv;

⁷podgíia i Lija i lákire čhavé, i kerdé šerésa ke phuv. I pe kónco (pe jagóro) podginé Joza (Iosifo) i Rahíl', i kerdé šerésa ke phuv.

⁸I phendiá Isávo: “Vaš so túke davá célo taboro (lod), savó me strenindjom?” I phendiá Jakovo: “Sob (kaj) te javél tangipén i láska dre miré-raskire jakhá.”

⁹O Isávo phendiá: “Míro pšála, mánde isyn but; mek te javél tyró túte.”

¹⁰Jakovo phendiá: “Nad, kóli vaš mánge isyn (te javél) láska dre tyré jakhá, prilé miro počastunko (dáro) miré vastéstyr; pal-dová so me dykhcjom muj tyró sýrby vari-kon dykhciá Devléskiro muj, i tu ilésa sánas ke me;

¹¹prilé miro bahtiakiribén, savó me jandjom túke; pal-dová so Devél dyjá mánge, i mánde isyn saró.” I mangdiá les: i odová lyjá počastunko.

¹²I phendiá: “Ĥazdasape ame dro drom i džása; i me angíl túte džáva.”

¹³Jakovo phendiá léske: “Miro raj džinéla, so čhavoré isyn nazorale (zlomka), a kherítka murdalá (skoto) déna ciucia (thud) léngire tyknenge; kóli te trades les jekh dyvés, tedy muljola saró skoto;

¹⁴mek miro raj te džal angíl péskire pishariste, a me džáva pe nábut, syr džála skoto, savó isyn angíl mánde, i syr džána čhavé, i me javáva dro Sieiro ke miro xulái.”

¹⁵I phendiá Isávo: “Me mekava vari-kicý manušén túsa, savé isyn pašýl mánde.” Jakovo ž phendiá: “Ke so davá? Mánge jekh trej te javél láska dre miré-raskire jakhá!”

¹⁶I risijá Isávo dre dová-pac' dyvés péskire dromésa dro Sieiro.

¹⁷A Jakovo gijá dro Sokhofo [Sukkot-ju.o.] i čhudiá péske kher, i vaš péskire kheritkoné murdalénde (skoto) kerdiá šátry. Odoléstyr jov dyjá dolé štetoske lav: Sokhofo.

¹⁸Jakovo, risii Miesopotamijatyr, bahtales javdiá dre fóro Sihiémo, savó isyn pe Xanaanóskiri phuv, i terdijá angíl fóro.

¹⁹I jov kindia paš félda, pe saví čhudiá péskiri šátra, Jemoroskire čhavéndyr, Sihiemoskire dadéstyr, pal šel ĥaspria (moniety).

²⁰I odój čhudiá altárjo; i prikhardia jov lav Ráskire-Devléskiro (Jahvaskiro) Izrailjoskire Devléskiro [El' — Elohie — Israel'-ju.o.]