Read Biblija - Pe Baltitko Romani čib (Romanes) 2019 Baltic Romani Bible Džiibén 37 Bible Online

Džiibén 37 - Biblija - Pe Baltitko Romani čib (Romanes) 2019 Baltic Romani Bible bible

Džiibén 37

¹Jakovo dživdiá pe Xanaanóskiri phuv péskire dadéskiri, kaj jov sys čúžo manúš.

²Ĥáda, isyn Jakovóskiro džiibén. Jozáske (Iosifoske) sys dešuefta berš, jov rakhciá gurty kheritkoné murdalénca khetané pšalénca, péskire dadéskire romniéngire, Valakire i Ziel'fakire čhavénca. I rosphenelas Joza (Iosifo) nalačhi mavlýn (malva) pal lénde léskire dadéske.

³Izrailjoske Joza sys pir iló butýr saréndyr péskire čhavéndyr, pal-dová so jov sys léskire phuripnaskiro čhavó, — i jov kerdiá léske cviatytko uribén.

⁴I dykhné léskire pšála, so léngiro dad ĥazdéla les butýr léskire saréndyr pšaléndyr; i lyné te na dykhén pe léste laskasa, i na mogindlé te rakirén lésa ilytkes.

⁵I dykhciá (dyjá) Joza suné, i rosphendiá les péskire pšalénge; i jone butýr lyné les te na vyrikiren.

⁶Jov phendiá lénge: “Šunén sunó, savó me dykhcjom:

⁷Ĥáda, ame maškirál félda phandasa ĥarby (snopy); i ĥáda, miro ĥarbo uštyjá, i terdijá mamúj (rovnes); i ĥáda, tumaré ĥarby terdiné pašýl, i klonindlepe miréske ĥarboske.”

⁸I phendlé léskire pšála léske: “Naúšto tu javésa tu xulaines aménca? Ci naúšto tu, čačes, javésa te raines pe aménde?” I butedýr lyné te na vyrikiren les pal léskire suné i lavá.

⁹I dykhciá jov javír suné, i rosphendiá les péskire pšalénge, rakirí: “Ĥáda, me dykhcjom iščo (inké) sunó: ĥáda, kham, i čhon, i dešujékh čergeniá kloninenape mánge.”

¹⁰I jov rosphendiá péskire dadéske i pšalénge; i koscia les léskiro dad, i phendiá léske: “So da za suné, savé tu dykhcián? Naúšto me, i tyrí daj, i tyré pšála javása te kerás šerésa túke ke phuv?”

¹¹Pšale léskire dénas jakhalo léske, a léskiro dad zaripirdia davá lav.

¹²Léskire pšála giné te rakhén ĥurty kheritkoné murdalénca, péskire dadéskire dro Sihiemo.

¹³I phendiá Izrailjo Jozáske: “Ci na čaravena pšála tyré dro Sihiemo? Džá, me bičhaváva tut ke jone.” Jov otphendiá léske: “Ĥáda, me som.”

¹⁴I phendiá léske: “Džá, podykh, ci saste isyn tyré pšála, i ci saré kherítka murdalá (skoto) isyn, i jan otphenybén mánge.” I bičhadiá les Xievronoskire dolostyr; i jov javdiá dro Sihiemo.

¹⁵I lathiá les vari-savó manúš, psiri pe félda, i phuciá léstyr odová manúš, rakirí: “So tu rodesa?”

¹⁶Jov phendiá: “Me rodava miré pšalén; phen mánge, kaj jone čaravena péskire ĥurty?

¹⁷I odová manúš phendiá: “Jone giné adathýr, pal-dová so me šundjom, syr jone rakirdé: ‘Javén dro Dofano.’ I gijá Joza pal péskire pšalénde, i lathiá len dro Dofano.

¹⁸I dykhné les jone durál, angledýr syr jov podgíia ke jone, i lyné te duminen fuipén pe léste, sob (kaj) te zamarén les.

¹⁹I phendlé jekh jekhéske: “Ĥáda, džála odová, savó dykhéla suné!

²⁰Javén, akaná, i zamarasa les, i čhurdasa les dre vari-saví ĥanbín (rovo/hohói), i phenása, so riskiribnáskiro murdál (zvierjo) xaja les; i dykhasa, so javéla léskire sunendyr.”

²¹I šundiá davá Ruvimo, i zrakhciá les léngire vasténdyr, phení: “Na muliakirasa les.”

²²I phendiá lénge Ruvimo: “Na pročhuven rat, a čhurdén les dre ĥanbín (rovo/hohói), saví isyn pe čhučí phuv, a vastá na čhuvén pe léste.” Davá rakirdiá jov, sob (kaj) te zrakhél les léngire vasténdyr i te riskirél les ke léskiro dad.

²³Kiéli Joza javdiá ke péskire pšála, jone tyrdyne krig Jozastyr léskiro uribén, cviatytko psikitko (nakidka), saví sys pe léste,

²⁴i lyné les i čhurdyné dre ĥanbín; daja ĥanbín sys čhučí, paní dre láte na sys.

²⁵I jone bešné te xan maró, i, dykhné, ĥáda, džálas Galaadostyr karavano Izmail'tianengiro, léngire vierbliudy lydžánas stiraksa (aromaty), bal'zamo i ladano: džánas jone te lydžán davá dro Jegípto.

²⁶Juda phendiá péskire pšalénge: “Savó lačhipén javéla, kóli ame zamarasa amaré pšalés i garavasa léskiro rat?

²⁷Javén, biknasa les Izmail'tianenge, a amaré vastá mek te na javén pe léste; pal-dová so jov isyn amaró pšal, loč (plot') amarí.” Pšála les kandyné.

²⁸Tén'ci, kiéli džánas Madiamoskire kúpcy (tylgárja), jone tyrdyne Jozas javrí ĥanbiniatyr, ĥazdyné les i bikindle Jozas Izmail'tianenge pal biš rupuvé; a jone lydžiné Jozas dro Jegípto.

²⁹Ruvimo nevéstyr javdiá ke ĥanbín; i ĥáda, nane Jozas dre ĥanbín. I roskostia jov péskire ídi,

³⁰i risijá ke péskire pšála, i phendiá: “Terné-beršengires nane, a me karik keravape?”

³¹I lyné Jozaskiri ídia, i zamardé buznés (kozlos), i makhne ídia ratésa;

³²i počhude i cviatytko psikitko, i jandlé ke péskiro dad, i phendlé: “Ame lathiam davá; podykh, ci tyreskire-čhaveskiri daja ídia, ci nad.”

³³Jov ĥalyjá la, i phendiá: “Daja isyn ídia miré čhaveskiri, janúro (xiščno zviérjo) xaja les; čačó, Joza sys riskirdo pe koterá.”

³⁴I roskostia Jakovo péskire ídi, i čhudiá balytko gonó praskasa pe péskire pašvare, i obrovelas jov but dyvesá péskire čhavés.

³⁵I skedynépe saré léskire čhavé i čhaja, sob (kaj) te štyliakiren les; ne jov na kamdiá, sob (kaj) te podrikiren les, i phendiá: “Obrovibnasa džáva me ke miro čhavó dro liúno (pe dová svéto).” Adiáke rovelas léskiro dad pal léste.

³⁶Madianitiani bikindle les dro Jegípto Potifaroske, faraonóskire barydyréske, savó sys raj pe stregar'jénde (stražnikende).