Read Biblija - Pe Baltitko Romani čib (Romanes) 2019 Baltic Romani Bible Džiibén 38 Bible Online

Džiibén 38 - Biblija - Pe Baltitko Romani čib (Romanes) 2019 Baltic Romani Bible bible

Džiibén 38

¹I adiáke sys dre dová časo (cýro): o Juda gijá krig péskire pšaléndyr, i jaciá te dživél pašýl jekhéste Odolamitianinoste, saveskiro lav sys Xirá.

²I dykhciá odój Juda jekha-Xananejaninoskirja čha, savjákiro lav sys Šúa, i lyjá la, i zagijá ke joi.

³Joj zapharija, i bijandiá čhavés; i jov dyjá léske lav: Iro.

⁴I javír mólo zapharija, i bijandiá čhavés, i jov dyjá léske lav: Onano.

⁵I tríto mólo bijandiá čhavés, i dyjá léske lav: Šelá. Juda sys ke Xiezivo, kiéli joj bijandiá les.

⁶I lyjá Juda romniá Iroske, anglatuné péskire čhavéske; lav lákiro sys Famár'.

⁷Anglatunó Judáskiro Iro, na sys lačhó Devléske, i Devél les muliakirdiá.

⁸I phendiá Juda Onanoske: “Zadžá ke tyré-pšaleskiri romný, le la paloróm syr diévirjo (salo), i čhuv pale, tyré-pšaleskiro ródo.”

⁹Onano džindiá, so ródo na javéla léske, i, paldavá, kiéli jov džálas ke léskire-pšaleskiri romný, to vyčhuvelas sal (siemjo) pe phuv, sob (kaj) te na del ródo léskire pšaléske.”

¹⁰Davá sys xolý angíl Raste-Devléste, pal dová so jov kerdiá; i Jov muliakirdiá i les.

¹¹I phendiá Juda Famarjáke, péskire borjake: “Dživ pivliása (udovasa) dre tyré-dadéskiro kher, paka (angíl dová, syr) podbarjola miro čhavó Šelá.” Pal-dová so jov phendiá: “Te na merél i jov adiáke-pac', syr myné léskire pšála.” Famar' gijá i lyjá te dživél dre péskire-dadéskiro kher.

¹²Progijá (nakhcia) but časo, i myjá Šuoskiri čhaj, Judaskiri romný. Juda štylyi, gijá dre Famna ke manúš, savó občhinela výlna pe léskire bakrende, kokoró i léskiro drúgo (mal) Xira, Odolamitianino.

¹³I phendlé Famarjake: “Ĥáda, tyró sastro džála dre Famna, te občhinel výlna pe péskire kheritkoné murdalénde (bakrende).”

¹⁴I zlyjá joj péstyr pivliakiro (udovakiro) uribén, učhakirdiá pes cergicasa, i začhakirdiape, besciá pašýl Jenaimoskiri pórta (vráty), so sys pe drom dre Famna. Paldavá so joj dykhciá, so Šelá vybarija, i joj na sys dyný léske dre romniáte.

¹⁵I dykhciá la Juda, i gindia la pal biladžakuné džuvliáte, pal-dová so joj učhakirdiá péskiro muj.

¹⁶Jov podgíia ke joi, i phendiá: “Te zadžav me ke tu.” Pal-dová so jov na džindiá, so joj sys léskiri bori. Joj phendiá: “So tu désa mánge, kóli zadžasa ke me?”

¹⁷Jov phendiá: “Me bičhaváva túke buznores (kozljonkos) stadatyr.” Joj phendiá: “Ci désa tu mánge symadý (zalogo), paka bičhavesa?”

¹⁸Jov phendiá: “Saví symadý te dav túke?” Joj phendiá: “Tyrí angrusty čergonorjasa (piečatka), i tyrí kustýk, i tyró destó (trost'), savó isyn dro tyró vast.” I dyjá jov láke, i zagijá ke joi; i joj iaciá pharí léstyr.

¹⁹I, uštyjá, i gijá joi, zlyjá péstyr cergica, i uridiape dre péskire-pivliakiri (udovakiri) ídia.

²⁰E Juda bičhadiá buznores (kozljonkos) pir péskire maleste Odolamitianinoste, sob (kaj) te lel symadý (zalogo) džuvliakire vasténdyr, ne jov na lathiá la.

²¹I phuciá odolé štetoskire manušéndyr: “Kaj isyn biladžakuny džuvlý, saví sys dro Jenaimo pašýl drom?” Ne jone phendlé: “Adái, na sys biladžakuny džuvlý.”

²²I risijá jov ke Juda, i phendiá: “Me na lathjom la; i manušá dolé štetoskire phendlé: “Adái, na sys biladžakuny džuvlý.”

²³Juda phendiá: “Mek joj te lel len péske, sob (kaj) manušá te na len te sanpe améndyr; ĥáda, me bičhadjom dales buznores; ne tu na lathian la.”

²⁴Progijá (nakhcia) pašýl trin čhoná, i phendlé Judáske: “Famar', tyrí bori, zagijá dro bléndo, i ĥáda, joj isyn peraly blendostyr.” Juda phendiá: “Vylydžan la, i mek joj te javél shačkirdy.”

²⁵Ne kiéli lydžiné la, joj bičhadiá te phenén lákire sastreske: “Me jacjom peraly odoléstyr, koneskire isyn dalé priedmiety.” I phendiá: “Phenén te džinén, konéskiri daja antrusty černorjasa (piečatka), i kustýk i destó (trost').”

²⁶Juda pridžindia priedmiety, i phendiá: “Joj isyn čačunedyr mándyr, pal-dová so me na dyjom la Šelaske, miré čhavéske.” I jov na džinelas la butýr.

²⁷I kiéli jej bijanelas, to jaciá džindló, so blizniaty (dujore) sys dre lákiri ločoví (utroba).

²⁸I kiéli joj bijanelas, to sykadyjá vast, i lyjá phuri, saví babinelas, i priphandia léske pe vast loló thav, phendiá: “Adavá vygijá angledýr.”

²⁹Ne jov riskirdiá péskiro vast; i ĥáda, vygijá léskiro pšal. I joj phendiá: “Syr tu skedyjan péske zor te vydžas? I dynó léske lav: Fariéso.

³⁰Paló davá vygijá léskiro pšal lolé thavinasa pe vast. I dynó léske lav: Zara [Zarah-ju.o.].