Read Biblija - Pe Baltitko Romani čib (Romanes) 2019 Baltic Romani Bible Džiibén 4 Bible Online

Džiibén 4 - Biblija - Pe Baltitko Romani čib (Romanes) 2019 Baltic Romani Bible bible

Džiibén 4

¹O Adamo lyjá te dživél Jevasa syr romniása; i joj zapharija, i bijandiá Kainos[6], i phendiá: “Lathjom me manušés Rástyr-Devléstyr.”

²I javír mólo joj bijandiá léskire pšalés, Avieljos. I Avieljo sys bakrengiro čhupnári (pastuho), a Kaino obkerelas phuv.

³Syr progijá vari-savó časo, Kaino jandiá phuvjákire barjakirdé (plódy) syr dáro Ráske-Devléske.

⁴I Avieljo adiáke-pac' jandiá péskire pervoné bijanypnytkone ĥurtostyr i léngire čekenestyr (tukostyr). Raj Devél sykadiá patýv Avieljoske pe léskiro dáro.

⁵A Kainoske, i pe léskiro dáro, Jov na sykadiá patýv. O Kaino drieván xoliásyja, i kalyja mina pe léskiro muj.

⁶I phendiá Raj Devél Kainoske: “Sóske tu xoliasyjan? I sóske mina pe tyró muj kalyja?

⁷Kóli kerésa lačhipén, to sóske na ĥazdesa muj radypnasa? A kóli na kerésa lačhipén, tedy pašýl vudár isyn paštó grého (bizo), jov tyrdela tut ke pe, ne tu jav xulása pe léste.”

⁸I phendiá Kaino péskire pšaléske, Avieljoske: “Javén, pe félda.” I kiéli sys jone pe félda, Kaino ĥazdyjápe pe péskire pšaléste Avieljoste, i muliakirdiá les.

⁹I phendiá Raj Devél Kainoske: “Kaj isyn tyró pšal Avieljo?” Jov phendiá: “Me na džinóm (na džináv), so me som rakhibnari (storožo) péskire pšaléske?”

¹⁰I phendiá: “So tu kerdián? Tyré-pšaléskire rateskiri zan déla gódla phuvjátyr ke Me.

¹¹I akaná tu san prokošnó phuvjátyr, saví otčhakirdiá péskire uštá te prilel tyré-pšaleskiro rat tyré vastéstyr.

¹²Kiéli tu javésa te obkeres phuv, joj butýr na javéla te del vaš túke péskiri zor; tu javésa te garadjos i te psirés bi kheréskiro pe phuv.”

¹³I Kaino phendiá Ráske-Devléske: “Čoripén miro isyn drieván baró, sob (kaj) te bistres les.

¹⁴Ĥáda, kadalé dyveséstyr Tu tradesa man phuvjátyr, i Tyré móstyr me javáva te ĥaradjovav, i te psirav bi kheréskiro pe phuv; i javéla adiáke: kažno, kon mánca streninelape, muliakiréla man.”

¹⁵I phendiá léske Raj Devél: “Paldavá kažnonéske, kon Kainos muliakiréla, otdelape pale fuipnasa dre eftá (bitrinéngiro deš) móly.” I Raj Devél kerdiá Kainoske ĥiertýk (znamiénijo), sob (kaj) nikón, kon streninelape lésa, te na muliakirél les.

¹⁶I gijá krig Kaino Rástyr-Devléstyr; i lyjá te dživél pe Nodoskiri phuv, pe vastóko Edemostyr.

¹⁷I lyjá te dživél Kaino péskire romniása; i joj zapharija, i bijandiá Jenohos. I čhudiá jov fóro, i pir péskire čhavéskiro lav khardiá fóro: Jenoho.

¹⁸Jenohostyr bijándyja Irado; Iradostyr bijándyja Miehiaeljo[7]. Miehiaeljo dyjá pe svéto Mafusalos: Mafusalo dyjá pe svéto Lamiehos.

¹⁹I Lamieho lyjá péske dujén romnién: jekhakiro lav sys Ada i javirjakiro lav sys Cyla.

²⁰Ada bijandiá Iavalos (Javalos): jov sys dad manušénge, savé dživdé pe šátry kheritkoné murdalénca.

²¹Léskire pšalés khardé Iuvalo (Juvalo): jov sys dad sarengire-manušéngiro, savé bašade pe gusli i svirol'ka (sviriel').

²²Cyla adiáke-pac' bijandiá Tuvalkainos, savó sys faurnari (kovaljo) pe saré strumiénty sastyrestyr i xarkomátyr (miediatyr). I phen Tuvalkainoskiri sys Noiema [Naama-ju.o.].

²³I phendiá Lamieho péskire romnienge: “Ada i Cyla, šunén mirí zan, Lamiehoskire romniále! Šunén miré lavá: me muliakirdjom muršés i terné-beršengires (otrokos) pal péskiri dukhady (rana).

²⁴Kóli pal Kainoste otdelape pale fuipnasa dre eftá (bitrinéngiro deš) móly, to pal Lamiehoste dre eftadešá eftá móly.”

²⁵I lyjá te dživél Adamo péskire romniása javír mólo, i joj bijandiá čhavores, i dyjá léske lav Sifo, pal-dová so joj rakirdiá: “Devél čhudiá mánge javír siémjo, zamiést Avieljoste, savés muliakirdiá Kaino.”

²⁶I Sifoste adiáke-pac' bijándyja čhavó; i jov dyjá léske lav Jenoso [Enošo-ju.o.]; tén'ci manušá lyné te prikharen Devléskiro lav, kiéli mangnepe.