Read Biblija - Pe Baltitko Romani čib (Romanes) 2019 Baltic Romani Bible Džiibén 40 Bible Online

Džiibén 40 - Biblija - Pe Baltitko Romani čib (Romanes) 2019 Baltic Romani Bible bible

Džiibén 40

¹I sys adiáke pale dolé réndy, so Jegiptóskire-kralískiro barydyró vinočerpijo (kučikari) i barydyró xliebodaro (pekaibnari) jačné bangé angíl péskire xulaste, Jegiptóskire kralíste.

²I rosholiasyja faraóno pe dujende péskire kralískire barydyrende, pe vinočierpijoste (kučikariste) i pe xliebodaroste (pekaibnariste),

³i otdyjá len dre kica (tiemnica) stregar'jéngire ráske, dro bešyben, dro štéto, kaj sys beštó Joza.

⁴Raj stregar'jéngiro čhudiá ke jone Jozas, i jov dynarindiá lénge. I sys jone tel rakhibnar'jénde vari-kicý časo.

⁵Jekhvar Jegiptóskire-kralískire kučikári i pekaibnári, savé sys zaphandle dro bešyben, dykhné suné, kažno péskiro sunó, dujénge dre jekh rat, kažnonéske sunó péskire značynybnasa.

⁶I javdiá ke jone Joza pe zlóko (ránko), dykhciá len, i ĥáda, jone strahádyne péske.

⁷I phuciá jov faraonóskire barydyrendyr, savé sys lésa dre kica (tiemnica) xulaskiri, rakirí: “Sóske adadyvés tuménde isyn smutna (smentna) muiá?”

⁸Jone phendlé léske: “Ame dykhciam suné; a te piriphenen len nane konéske.” O Joza phendiá lénge: “Ci davá isyn na Devléstyr isyn piriphenyben (značinyben)? Rosphenén len mánge.”

⁹I rosphendiá barydyr kučikari péskiro sunó Jozáske, i phendiá léske: “Me dykhcjom suné, ĥáda, vinagradoskiro (drakhákiro) xrústo sys angíl mánde;

¹⁰pe xrústo sys trin randiá. Jov rozbarijape, sykadyjá pe léste luludí (cveto), vybarine i vyspieindle pe léste múri;

¹¹i faraonóskiro tahtáj sys mánde dro vast; me lyjom múri, vytasadjom len dro faraonóskiro tahtáj (čaša), i podyjom faraonóske tahtáj dre vastá.”

¹²I phendiá léske Joza: “Ĥáda, isyn léskiro značinyben: trin randiá — dalé isyn trin dyvesá;

¹³pir trin dyvesá faraóno ĥazdéla tyró šeró, i riskiréla tut pe tyró štéto, i tu podesa faraonóske dro léskiro vast tahtáj (čaša), syr ĥaredyr, kiéli tu i sánas léste kučikarisa,

¹⁴priripir man, kiéli šukár javéla túke, i, me mangáva tut, ker mánge lačhó réndo, i phen pal mánde faraonóske, i vylydža man dalé kheréstyr,

¹⁵pal-dová so man čorde Judéngire phuvjátyr; adiáke-pac' i adáj ničí na kerdjom, pal so te čhurdén man dro bešyben.”

¹⁶Barydyró pekaibnari dykhciá, so piriphendia jov lačhés, i phendiá Jozáske: “Me adiáke-pac' dykhcjom suné: ĥáda, pe šeró mánde sys trin korzíny (khudé);

¹⁷dre upratuno khudo sys liubo faraonóskiro xabén, so kerdiá manúš, savó pekela; i čirikliá kliuindle les khudestyr pe miro šeró.”

¹⁸I phendiá Joza: “Ĥáda, léskiro značynyben: trin khudé — dalé isyn trin dyvesá,

¹⁹pir trin dyvesá faraóno léla krig tyró šeró tútyr, i ublavela tut pe kašt (drévo), i čirikliá javéna te kliuinen tyró mas tútyr.”

²⁰Pe tríto dyvés, savó sys faraonóskiro bijanypnytko dyvés, kerdiá jov svénko vaš sarénge péskire dynar'jénge (slugenge), i priripirdia pal barydyršone kučikariste (vinočierpijoste) i pekaibnariste (xliebodaroste), maškír péskire dynar'jende;

²¹i riskirdiá barydyršone kučikaris pe léskiro štéto, i jov podyja tahtáj faraonóske dro vast,

²²a barydyršone pekaibnaris ubladia, syr piriphendia o Joza lénge.

²³I na priripirdia kučikari pal Jozaste, ne bistyrdia les.