Read Biblija - Pe Baltitko Romani čib (Romanes) 2019 Baltic Romani Bible Džiibén 41 Bible Online

Džiibén 41 - Biblija - Pe Baltitko Romani čib (Romanes) 2019 Baltic Romani Bible bible

Džiibén 41

¹Syr gijá duj berš o faraóno dykhciá suné: ĥáda, jov sys terdó pašýl reka (len');

²i ĥáda, vyginé rekátyr (leniátyr) eftá (bitrinéngiro deš) gurumnia, lačhé i masune, i čaradepe pe trostnikitko čar (triščyna).

³Tén'ci, ake, paló lénde vyginé rekátyr (leniátyr) javír eftá gurumnia, šuké, i terdiné pašýl dolé gurumniénde, pe brégo reka (len');

⁴i shane šuké gurumnia eftá (eftane) gurumnién lačhen i thulen. I uštyjá faraóno,

⁵i zasutia nevéstyr, i dykhciá suné javír: ĥáda, pe jekh ĥerój (stiebljo) ĥazdynépe eftá kolosy (givlinia) zoralé i lačhé;

⁶ne ĥáda, paló (poslie) lénde vybarine eftá kolosy, sane i sys vyšut'kirde vastočnone balvaliasa;

⁷i shane sane kolosy (givlinia) eftá zoralé i pherdé kolosy. I uštyjá faraóno, i ĥalyjá, so davá sys sunó.

⁸I sys adiáke: zlokosa (pe ránko) pyjá léskiro dúho (fáno), i bičhadiá jov, i khardiá sarén Jegiptóskire magén (čovahanen) i sarén léskire tanukén (mudriecen), i rosphendiá lénge faraóno péskiro sunó; ne nikón na sys, kon by te piriphenel les faraonóske.

⁹I lyjá te rakirél barydyr kučikari faraonóske, i phendiá: “Grehi miré priripirava me adadyvés;

¹⁰syr faraóno xoliásyja pe péskire pishar'jende, i otdyjá man i barydyršone pekaibnaris (xliebodaros) tel rakhibnar'jende dro kher, kaj stregar'jéngiro raj;

¹¹i dre jekh rat jov i ame dykhciam suné, i dro kažno sunó sys javír značynyben.

¹²I sys odój aménca ternó Judo, pishári stregar'jengire ráske; ame rosphendiam léske amaré suné, i jov aménge kažnonéske piriphendia;

¹³i syr jov rosphandia značynyben aménge, adiáke i sys: me som riskirdo pe miro štéto, a odová sys ublado.”

¹⁴I bičhadiá faraóno, i khardiá Jozas (Iosifos). I sýges lydžiné javrí les bešybnastyr. Jov podčhindiape i muradiape i parudia péskiri ídia, javdiá ke faraóno.

¹⁵Faraóno phendiá Jozáske: “Me dykhcjom suné, i nane nikonés te piriphenel les, a pal túte me šundjom, so tu džinésa te piriphenes suné.”

¹⁶I phendiá Joza faraonóske: “Davá saró isyn na miro; Devél déla otphenybén dro lačhipén faraonóske.”

¹⁷I phendiá faraóno Jozáske: “Me dykhcjom suné: ĥáda, terdó me som pe brégo rekakiro (leniakiro);

¹⁸i ĥáda, vyginé rekátyr (leniátyr) eftá gurumnia, thule i lačhé, i čaradepe dre trostnikitko čar;

¹⁹ne ĥáda, paló lénde vyginé eftá javír gurumnia, šuké, vydycjonas syr nasvale, drieván nalačhé pir masá; me na dykhcjom pe sarí Jegiptóskiri phuv dasaven šuken, syr jone sys;

²⁰i shane šuké gurumnia anglatunen thulen gurumnién;

²¹i zaginé thule dro léngiro per, ne na sys bicialó, so jone zaginé dro léngiro per: jone sys adiáke-pac' šuké, syr i angledýr. I me uštyjom.

²²I me dykhcjom javír suné: “Ĥáda, pe jekh rand' ĥazdynépe eftá kolosy (givlinia), pherdé i lačhé;

²³ne ĥáda, paló lénde vybarine eftá kolosy (givlinia) sane, i sys vyšut'kirde vastočnone balvaliasa;

²⁴i shane sane kolosy (givlinia) eftá lačhé kolosy (givlinia). Me rosphendjom davá magenge (čovahanenge), ne nikón na mogindiá (na dyjá ráda) te piriphenel mánge.”

²⁵I phendiá Joza (Iosifo) faraonóske: “Sunó faraonóskiro isyn jekh: so Devél keréla, to dová Jov sykavéla faraonóske:

²⁶eftá lačhé gurumnia, davá isyn eftá berš; i eftá lačhé kolosy, davá isyn eftá berš: sunó jekh;

²⁷i eftá šuké gurumnia, savé vyginé paló dolende, davá eftá berš, adiáke-pac' i eftá sane kolosy, so sys vyšut'kirde vastočnone balvaliasa, adalé eftá berš-bokh.

²⁸Ĥáda, sóske me phendjom faraonóske: so Devél keréla, dová Jov sykadiá faraonóske.

²⁹Ĥáda, javéna eftá berš, so pir sarí Jegiptóskiri phuv javéla saró but;

³⁰ne paló lénde javéna eftá berš bokh, i bistrelape saró dová, so sys pe Jegiptóskiri phuv but, i bokh bogakirela phuv,

³¹i bicialó na javéla anglatunó butypen (dostatko), so sys pe phuv, pirdál bokh, saví javéla, pal-dová so joj iavéla drieván pharí.

³²A dová, so sunó dykhciá faraóno duj móly, davá isyn, so davá Devléskiro lav isyn čačunó, i so syg Devél keréla davá.

³³I paldavá akaná, mek te vykedel faraóno muršés god'vares i godes, i mek te čhuvél les pe Jegiptóskiri phuv.

³⁴Mek te priphenel faraóno te čhuvén pe phuv dykhibnaskiren (nadziratielien), i te skedén dre eftá barvalé beršá, kiéli javéna, pándžto paš Jegiptóskire phuvjátyr;

³⁵mek jone te len kažno maró dalé-lačhengire beršengiro, kiéli jone javéna, i skedéna dre fórja maró vaš xabén tel faraonóskiro džinybén, i mek te rakhén;

³⁶i javéla davá xabén te pasjol vaš phuv pe eftatone-bokhakire beršá, savé javéna pe Jegiptóskiri phuv, sob (kaj) phuv te na xasjol bokhátyr.”

³⁷Davá sys pir iló faraonóske i sarénge léskire dynar'jénge.

³⁸I phendiá faraóno péskire dynar'jénge: “Ci lathasa ame adasaves, syr jov isyn, manušés, dre savéste te javél Devléskiro Dúho (Fáno)?”

³⁹I phendiá faraóno Jozáske (Iosifoske): “Adiáke syr Devél otčhakirdiá túke saró davá, i nane adasaves god'vares i godes, syr tu san;

⁴⁰to tu javésa pe miro kher, i tyré lavéske javéna te rikirenpe saré miré manušá; jekhe priestolosa (tronosa) me javáva baredýr tútyr.”

⁴¹I phendiá faraóno Jozáske: “Ĥáda, me čhuváva tut pe sarí Jegiptóskiri phuv.”

⁴²I zlyjá faraóno péskire vastéstyr angrusty čergenorjasa (piečatka), i uridia la pe Jozaskiro vast; uridia les dre visonytko ídia, čhudiá léske pe men suvnakuný zandirori (cepočka);

⁴³i phendiá te lydžán les pe javír péskire maribnytkoné vurdenendyr (koliesnicendyr) i te den gódla angíl léste: “Bangiakiren čang”! I čhudiá les pe sarí Jegiptóskiri phuv.

⁴⁴I phendiá faraóno Jozáske: “Me som faraóno, i bi-tyré laveskiro nikón na ĥazdéla ni péskiro vast, ni ĥerój, pe sarí Jegiptóskiri phuv.”

⁴⁵I dyjá faraóno Jozáske lav: Cafnaf-Panieaho [Cafnat-Panieah-ju.o.]; i dyjá léske dre romniáte Asieniefa [Asienat-ju.o.], Potifaroskirja čha, Iliopol'skone (Gieliopoliskone) žriecoskirja. I gijá Joza pir sarí Jegiptóskiri phuv.

⁴⁶E Jozáske bijanypnastyr sys trijánda berš, kiéli jov terdijá angíl faraonóskiro muj, Jegiptóskire kralíste. I gijá Joza faraonostyr, i gijá pir sarí Jegiptóskire phuv.

⁴⁷Phuv dre dalé lačhé eftá berš janelas jekhe zjornostyr (ziarkatyr) pir burnyk (žmienia).

⁴⁸I skedyjá jov eftá-beršengiro kažno maró, savé but bijandjonas pe Jegiptóskiri phuv, i čhudiá maró dre fórja; dre kažno fóro čhudiá feldakiro maró, savó sys pašýl léste.

⁴⁹I skedyjá Joza drieván but maró, syr morjoskiro (derjavéskiro) práho adiáke, so pirijaciá te ginel, pal-dová so naštý sys te piriginel.

⁵⁰Angíl bokhalé beršá Jozaste bijándyne duj čhavé, savén bijandiá Asieniefa, Potifaroskiri čhaj, Iliopol'skone-žriecoskiri.

⁵¹I dyjá lav Joza péskire anglatuné čhavéske: Manásija [Menašše-ju.o.], pal-dová so jov rakirdiá: “Devél dyjá mánge te bistrav saré bidy miré i saró miré-dadéskiro kher.”

⁵²A javireske dyjá lav: Jefriémo, pal-dová so jov rakirdiá: “Devél man sozdyjá buté čhavorenca pe phuv, kaj man pritasavéna.”

⁵³I proginé lačhé eftá beršá, savé sys pe Jegiptóskiri phuv,

⁵⁴i jačné bokhalé eftá beršá, syr phendiá Joza. I pe saré phuvjá sys bokh; a pe sarí Jegiptóskiri phuv sys maró.

⁵⁵Ne kiéli i sarí Jegiptóskiri phuv lyjá te bokhaljol, tedy manušá lyné te rakirén pal maró faraonóske. I phendiá faraóno sarénge Jegiptianenge: “Džán ke Joza (Iosifo), i kerén, so jov tuménge phenéla.”

⁵⁶I sys pir sarí phuv bokh: i otkerdia Joza saré piraliá (žytnicy), i lyjá te biknel Jegiptianenge maró. Bokh jaciá baredýr pe Jegiptóskiri phuv.

⁵⁷I saré rigéndyr javénas manušá dro Jegípto te kinen Jozastyr maró; pal-dová so bokh jačelas baredýr pir sarí phuv.