Read Biblija - Pe Baltitko Romani čib (Romanes) 2019 Baltic Romani Bible Džiibén 42 Bible Online

Džiibén 42 - Biblija - Pe Baltitko Romani čib (Romanes) 2019 Baltic Romani Bible bible

Džiibén 42

¹I ĥalyjá Jakovo, so dro Jegípto isyn maró, i phendiá Jakovo péskire čhavénge: “So tumé san bešté i dykhéna?”

²I phendiá: “Ĥáda, me šundjom, so isyn maró dro Jegípto; džán odorík, i kinen aménge odothýr maró, sob (kaj) aménge te dživás i te na meras.”

³E deš Jozáskire pšála giné te kinen maró dro Jegípto,

⁴a Vieniaminos, Jozáskire pšalés, Jakovo na bičhadiá léskire pšalénca; pal-dová so phendiá: “Te na kerélpe lésa bída.”

⁵I javné Izrailjoskire čhavé te kinen maró, khetané javire manušénca, pal-dová so pe Xanaanóskiri phuv sys bokh.

⁶Joza sys raj pe doiá phuv; i jov biknelas maró saré phuvjákire manušénge. Jozáskire pšála javné, i kerdé šerésa (klonindlepe) ke phuv.

⁷I dykhciá Joza péskire pšalén, i ĥalyjá len; ne na sykadiá, so jov džinéla len, i rakirdiá lénca šylales, i phendiá lénge: “Katýr tumé javné? Jone phendlé: “Hanaanoskire phuvjátyr te kinas xabén.”

⁸O Joza ĥalyjá péskire pšalén, ne jone na ĥalyné les.

⁹I priripirdia Joza sunó, savó jov dykhciá pal lénde; i phendiá lénge: “Tumé san poddykhibnarja (špiony); tumé javné te vydykhen nazorale (zlomka) štéty dalé phuvjákire.”

¹⁰Jone phendlé léske: “Nad, xulájo amaró, tyré pishárja (raby) javné te kinen xabén;

¹¹ame saré sam čhavé jekheskire manušéskire, ame sam manušá čačuné, tyré pishárja isyn na poddykhibnarja.”

¹²Jov phendiá lénge: “Nad, tumé javné te vydykhen nazorale štéty dalé phuvjákire.”

¹³Jone phendlé: “Ame, tyré pishárja, sam dešudúj pšála; ame sam jekhe-manušéskire čhavé pe Xanaanóskiri phuv, i, ĥáda, tyknedýr akaná isyn amaré dadésa, a jekhés na jaciá.

¹⁴I phendiá lénge Joza: “Davá-pac' me i rakirdjom tuménge, rakirí: tumé san poddykhibnarja;

¹⁵ĥáda, syr tumé javéna sprobindle: me sovlahava faraonóskire džiibnasa, tumé na vydžána adathýr, kóli na javéla adarík tumaró tyknedýr pšal;

¹⁶bičhaven tuméndyr jekhés, i mek jov te janel tumaré pšalés, a tumé javéna zarikirde; i otčhakirelape, ci isyn čačipén tuménde; i kóli nad, tedy sovlahava faraonóskire džiibnasa, so tumé san poddykhibnarja.”

¹⁷I otdyjá len stregar'jénge pe trin dyvesá.

¹⁸I phendiá lénge Joza pe tríto dyvés: “Ĥáda, so kerén, i tumé jačénape džidé; pal-dová so me darava Devléstyr:

¹⁹kóli tumé san čačuné manušá, tedy mek tuméndyr jekh pšal te javél dro kica (tiemnica), kaj tumé san bešté; a tumé džán, lydžán maró vaš bokh tumaré sem'iakiri.

²⁰A tyknedyršone tumaré pšalés janén ke me, sob (kaj) te javén čačuné tumaré lavá, i, sob (kaj) tumé te na merén.” Adiáke jone kerdé.

²¹I rakirdé jone jekh jekhéske: “Čačunés amen sendiakirdia pharés Devél pal grého pal amaré pšaléste; ame dykhciam léskire iléskire mén'ki, kiéli jov mangdiá amen, ne ame na šundiám; pal-dová i jaciá aménge daja bída.”

²²Ruvimo lénge phendiá: “Ci na rakirdjom me tuménge: ‘Na kerén grého proti terné manušéste?’ Ne tumé na kandyné; ĥáda, léskiro rat pal léskiro rat javéla bibáht.”

²³A dová na džindlé jone, so Joza ĥaljola len; pal-dová so maškír lénde sys manúš, savó pirilydžalas (piričhuvelas).

²⁴I otgijá léndyr, i zarondia. I risijá ke jone, i rakirdiá lénca, i lyjá léndyr Simieonos (Siemjonos), phandia les angíl léngire jakhá.

²⁵O Joza priphendiá te čhuvén léngire goné marésa, a léngiro rup te riskirén kažnonéske (svakoneske) dro léskiro gonó, i te den lénge pésa pe drom. Adiáke i kerdó sys lénca.

²⁶Jone čhudé maró pe péskire oslende i giné odothýr.

²⁷I jekh léndyr otčhakirdiá péskiro gonó, sob (kaj) te del te xal pe rat péskire oslóske (miegaríske); i dykhciá dre péskiro gonó rup,

²⁸i phendiá péskire pšalénge: “Rup miro otdynó pale; ĥáda, jov mánde isyn dro gonó.” I lyjá te marélpe zoralés léngiro iló, i jone rakirdé darása jekh jekhéske: “So davá Devél kerdiá aménca?”

²⁹I javné ke Jakovo, péskiro dad, pe Xanaanóskiri phuv, i rosphendlé léske saró, so kerdiápe lénca:

³⁰“Huláj dolé phuvjákiro rakirdiá aménca šylales, i prilyjá amen pal dolé-phuvjákire poddykhibnar'jende.”

³¹I phendiam ame léske: ‘Ame sam čačuné manušá; ame na sámas poddykhibnarja;

³²ame sam dešudúj pšála, čhavé amaré dadéste; jekhés na jaciá, a tyknedýr pšal isyn akaná amaré dadésa pe Xanaanóskiri phuv.’

³³I phendiá aménge dolé-phuvjákiro xulái: “Ĥáda, syr me dodžinava, ci tumé san manušá čačuné: jačkiren mánde jekhés tumaré pšaléndyr; a tumé len maró vaš tumaré sem'iakiri bokh i džán,

³⁴ianén ke me tumaré tyknedyršone pšalés; i me dodžinava, so tumé na san poddykhibnarja, ne manušá san čačuné; Me otdáva tumaré pšalés tuménge, i tumé saštý (moginéna) te dživén pe daja phuv.”

³⁵Kiéli jone vyčhuvenas péskire goné, ĥáda, kažnonéste léskiro venzlo (pingljo) sys rupésa dro gonó. I dykhné jone péskire venzly rupésa, jone i léngiro dad, i strahádyne.

³⁶I phendiá lénge léngiro dad Jakovo: “Tumé otlyne mándyr čhavén Jozas nane, i Simieonos (Siemjonos) nane, i Vieniaminos te len kaména, — saró davá pe mánde!”

³⁷I phendiá Ruvimo péskire dadéske: “Zamar miré dujén čhavén, kóli me na janáva les ke tu; otdé les pe miré vastá; me janáva les túke.”

³⁸Jov phendiá: “Na džála miro čhavó tuménca; pal-dová so léskiro pšal myjá, i jov jaciápe jekh. Kóli kerélape lésa bída pe drom, dro savó tumé džána, tedy lydžána tumé miré syva balá tugasa dro liúno (ado) [maĥilytko (koplíca)-ju.o.].”