Read Biblija - Pe Baltitko Romani čib (Romanes) 2019 Baltic Romani Bible Džiibén 43 Bible Online

Džiibén 43 - Biblija - Pe Baltitko Romani čib (Romanes) 2019 Baltic Romani Bible bible

Džiibén 43

¹Bokh jaciá baredýr pe phuv.

²I kiéli jone xané saró maró, savó jandlé Jegiptóstyr, tedy léngiro dad phendiá lénge: “Džán nevéstyr, kinen aménge nábut xabén.”

³I phendiá léske Juda: “Odová manúš pharés prirakhcia amen: ‘Na javén ke me, kóli tumaró pšal na javéla tuménca’.

⁴Kóli bičhavesa aménca amaré pšalés, tedy džása i kinasa túke xabén,

⁵a kóli na bičhavesa, tedy na džása, pal-dová so odová manúš phendiá aménge: ‘Na javén ke me, kóli tumaró pšal na javéla tuménca’.”

⁶Izrailjo phendiá: “Vaš so tumé kerdé mánge dasaví xolý, so phendlé odoléske manušéske, so tuménde isyn pšal?”

⁷Jone phendlé: “Odová manúš phuciape pal aménde i pal amaró ródo, rakirdiá: ‘Ci džidó isyn tumaró dad? Ci isyn tuménde pšal?’ Ame i rosphendiam léske pir léskire phučibena. Ci mogindiam (saštyndiam) ame te džinas, so jov phenéla: ‘Janén tumaré pšalés?’

⁸O Juda phendiá Izrailjoske, péskire dadéske: “Mek terné-beršengire manušés mánca, i ame uštasa i džása, i javása džidé i na merasa i ame, i tu, i amaré čhavé;

⁹me otphenava pal léste, miré vasténdyr phučesa les. Kóli me na janáva les ke tu, i na čhuváva les angíl tyró muj, tedy me jačavape angíl túte bangó dre saré džiibnáskire dyvesá;

¹⁰kóli ame te na tyrdasas časo, spsirasas by duj móly.”

¹¹Léngiro dad, o Izrailjo, phendiá lénge: “Kóli adiáke, tedy, ĥáda, so kerén: len pésa dalé phuvjákire barjakirdé (plódy), i lydžán dro počastunko odoléske manušéske: vari-kicý bal'zamo i vari-kicý avgín (meda), aromaty i ladano, fistaški i mindalitka peĥendá (oriehi);

¹²len i javír rup dre tumaré vastá; a rup, savó pale čhudo dre tumaré goné, otdén pale tumaré vasténca: saštý (moginéla) te javél, davá jone na dodykhne;

¹³i len tumaré pšalés, i, uštén, džán nevéstyr ke odová manúš;

¹⁴O Devél, Sarezorjákiro, mek te del tuménge te lathén láska odolé manušéste, sob (kaj) jov te otmekél tumen i javirés tumaré pšalés i Vieniaminos, a mánge, kóli trej te javav bi čhavorengiro, tedy mek me jačavape bi čhavorengiro.”

¹⁵I odolé manušá lyné dalé počastúnki (dáry), i dre duj móly rup lyné dre péskire vastá, i Vieniaminos, uštyné, i giné dro Jegípto i javné ke Joza.

¹⁶O Joza, syr dykhciá maškír lénde Vieniaminos, to phendiá péskire kheréskire ráske: “Lýdža adalé manušén dro kher, i začhin vari-so masestyr, i keráv, pal-dová so dro paš-dyvés adalé manušá javéna mánca te xan.”

¹⁷I kerdiá odová manúš, syr phendiá o Joza, i odová manúš lydžijá kodolén manušén dro Jozaskiro kher.

¹⁸I manušá adalé strahádyne, so lydžiné len dro Jozaskiro kher, i phendlé: “Davá isyn pal rup, savó čhudo sys angledýr dre amaré goné, zalydžine amen, sob (kaj) te priphandenpe ke ame i te perén pe aménde, i te len amen dro pishariben (rabstvo) i te zamarén oslen.”

¹⁹I podginé jone ke Jozáskire-kheréskiro raj, i lyné te rakirén léske pašýl kheréskire vudará,

²⁰i phendlé: “Šun, amaró rajo, angledýr sámas te kinas xabén,

²¹i kerdiápe, so kiéli ame javdiám te rat'kiras i otčhakirdiam amaré goné, — ĥáda, sys kažnonéste rup dre léskiro gonó, amaró rup pir saró léskiro, i ame otdasa les pale péskire vasténca;

²²a, sob (kaj) te kinas xabén ame jandiam javír rup dre amaré vastá, ame na džinása, kon amaró rup čhudiá dre amaré goné.”

²³Jov phendiá: “Na duminen, na darén; tumaró Devél i tumaré-dadéskiro Devél dyjá tuménge klado dre tumaré goné; tumaró rup dogijá ke me.” I jandiá ke jone Simieonos (Siemienos).

²⁴I odová manúš lydžijá adalé manušén dro Jozaskiro kher, i dyjá paní lénge, i jone obmorde péskire ĥerá; i dyjá xabén léngire oslénge (miegar'jénge).

²⁵I jone skedyné počastúnki (dáry) ke Jozaskiro javiben dro paš-dyvés, pal-dová so šundlé, so odój javéna te xan maró.

²⁶I javdiá Joza kheré; i jone jandlé léske dro kher počastúnki, savé sys pe léngire vastá, kerdé šerésa léske ke phuv.

²⁷Jov phuciape léndyr pal sastypen, i phendiá: “Ci sastó isyn tumaró phuró dad, pal savéste tumé rakirdé? Ci isyn džidó jov?”

²⁸Jone phendlé: “Sasto isyn tyró pishári, amaró dad; džidó.” I bandine jone i kerdé šerésa ke phuv.

²⁹I ĥazdyjá Joza péskire jakhá, i dykhciá Vieniaminos, péskire pšalés, péskire-dákire čhavés, i phendiá: “Ci adavá isyn tumaró tyknedýr pšal, pal savéste tumé mánge rakirdé?” I phendiá: “Mek te javél Devléskiri láska túsa, čhavó miro!”

³⁰I sýges gijá léndyr Joza, pal-dová so zahačíia láska ke léskiro pšal, i jov nábut so na zarondia, i zagijá jov dre andratuný štúba, i rondiá odój.

³¹I obmordia péskiro muj, vygijá, lyjá pes dre vastá i phendiá: “Poden xabén.”

³²I podyne léske léskiro, i lénge léngiro, i Jegiptianenge, savé xané lésa, xabén féni (tóka) vaš lénge: pal-dová so Jegiptianenge naštý (na moginénas) te xan Judenca, pal-dová so davá isyn magiripén vaš Jegiptianenge.

³³I bešné jone angíl léste, anglatuné-rodoskiro pir léskiro anglatunó ródo, i tyrnedyr pir léskiro ternypen, i divindlépe adalé manušá jekh angíl javiréste.

³⁴I léstyr bičhavenas lénge xabén, i Vieniaminoske xabén sys dre pandž móly butýr, syr kažnonéske léndyr. I piné, i šukár matine jone lésa.