Read Biblija - Pe Baltitko Romani čib (Romanes) 2019 Baltic Romani Bible Džiibén 44 Bible Online

Džiibén 44 - Biblija - Pe Baltitko Romani čib (Romanes) 2019 Baltic Romani Bible bible

Džiibén 44

¹I priphendiá Joza (Iosifo) péskire kheratuneske, i phendiá: “Čhuv adalé manušéngire goné xabnasa, adákicy but, kicý jone déna ráda te lydžán, i kažnoneskiro čhuv rup dre léskiro gonó,

²a miro tahtáj (čaša), rupuvó, čhuv dre gonó tyknedyreske, khetané rupésa, pal savó jov kindia maró.” I kerdiá odová manúš pir Jozaskiro lav, savó jov phendiá.

³Zlokosa (pe ránko), kiéli jaciá bicialó, adalé manušá sys otmekne, jone i léngire osly (miegárja).

⁴I syr jone nádur giné foróstyr, syr Joza phendiá péskire kheratuneske: “Džá, dotrade adalen manušén, i, kiéli dotradesa, to phen lénge: ‘Vaš so tumé zapleskirde čoripnasa pal lačhipén?’

⁵Ci davá nane tahtái, savéstyr p'jéla miro xulái? I jov drabakirela pe léste. Našukar tumé davá kerdé.”

⁶Jov dotradyja len, i phendiá lénge dalé lavá.

⁷Jone phendlé léske: “Vaš so amaró raj rakiréla dasavé lavá? Nad, tyré pishárja na keréna dasavo réndo (diélo).

⁸Ĥáda, isyn rup, savó ame lathiam dre amaré goné, ame pale túke jandiam rup Xanaanoskire phuvjátyr: syr aménge te čoras tyré-xuláskire kheréstyr rup ci suvnakái?”

⁹Konéste tyré pishar'jéndyr tu lathesa, odoléske meribén, i ame javása pishárja amaré ráske.”

¹⁰Jov phendiá: “Šukár, syr tumé phendlé, adiáke mek i te javél, konéste lathelape tahtáj (čaša), odová javéla mánge pisharisa, a tumé na javéna bangé.”

¹¹Jone sýges, kažno péske, zmekne pe phuv péskiro gonó, i kažno otčhakirdiá péskiro gonó.

¹²Jov obrodyja, lyjá phuredyršonestyr, i končyndia tyknedyršonesa; i lathiape tahtáj dro Vieniaminoskiro gonó.

¹³I roskušne jone péskire ídi, i, čhudiá kažno (sváko) pe osloste péskiro gonó, i risiné jone dro fóro.

¹⁴I javné Juda i léskire pšála dro Jozaskiro kher, savó sys kheré, i pyné angíl léste pe phuv.

¹⁵O Joza phendiá lénge: “So da tumé kerdé? Naúšto tumé na džindlé, so adasavó manúš, syr me, usajékh ĥaljola?”

¹⁶O Juda phendiá: “So aménge te phenas amaré ráske? So te rakiras? Sósa te jačaspe čačunenca (te opravdynaspe)? Devél lathiá tyré-pishar'jengiro čoripén: ĥáda, ame sam pishárja amaré xuláske, i ame, i odová, dre saveskire vastá lathiape tahtái.”

¹⁷Ne Joza phendiá: “Nad, me na keráva davá; odová, dre saveskire vastá lathiape tahtái, javéla mánge pisharisa, a tumé džán ramanjosa (mirósa) ke tumaró dad.”

¹⁸I podgíia ke jov Juda i phendiá: “De vólia tyré pisharíske te zaterdjol te phenáv lav miré ráske dre kaná, i na xoliasov pe tyré pishariste, pal-dová so tu san dová-pac', syr faraóno isyn.

¹⁹Miro raj phuciá peskiren pishar'jendyr, rakirdiá: ‘Ci isyn tuménde dad ci pšal?’

²⁰Ame phendiam amaré ráske, so aménde isyn phuró dad, i ternedyr čhavó, léskire-phuripnaskiro čhavó, saveskiro pšal myjá, a jov jaciápe jekh péskire datyr, i dadéske jov isyn drógo.

²¹Tu phendián tyré pishar'jénge: ‘Janén les ke me, sob (kaj) mánge te podykhav pe léste.’

²²Ame phendiam amaré ráske: ‘Terné-beršengiro na moginéla te jačkirel péskire dadés, tedy jov meréla’.

²³Ne tu pishar'jénge phendián: ‘Kóli na javéla tuménca tumaró tyknedýr pšal, tedy tumé na javéna ke me.’

²⁴Kiéli ame javdiám ke tyró pishári, ke amaró dad, tedy piriphendiam léske lavá miré raskire.

²⁵I amaró dad phendiá: ‘Džán nevéstyr, kinen aménge nábut xabén’.

²⁶Ame phendiam: ‘Naštý aménge te džas; a kóli javéla aménca tyknedýr amaró pšal, tedy džása; pal-dová so naštý te dykhas odolé-manušéskiro muj, kóli na javéla aménca amaré tyknedyršone pšalés.’

²⁷I phendiá aménge tyró pishári, amaró dad: ‘Tumé džinén, so mirí romný bijandiá mánge dujén čhavén;

²⁸iekh gijá mándyr, i me phendjom: ‘Jov, xaj, roskušno’; i me na dykhcjom les ke davá časo;

²⁹kóli i kadales léna miré jakhéndyr, i kerélape lésa bída, tedy lydžána tumé man miré syvone balenca dro liúno (ado)’.

³⁰Akaná, kóli me javáva ke tyró pishári, amaró dad, i na javéla aménca terné-beršengires, saveskire ilésa phandlo isyn léskiro iló,

³¹to, kiéli jov dykhéla, so nane terné-beršengires, jov meréla; i lydžána tyré pishárja, tyré pisharís, amaré dadés, dro liúno (ado).

³²Paldavá me, tyró pishári, lyjompe te otphenav pal terné-beršengireste miré dadéske, i phendjom: ‘Kóli na janáva les ke tu, tedy me jačavape bangó angíl miré dadéste dre saré džiibnáskire dyvesá.’

³³Adiáke mek me, tyró pishári, zamiést terné-beršengireste te jačavpe pisharisa mireste raste; a terné-beršengiro mek te džal péskire pšalénca:

³⁴pal-dová so syr me džáva ke péskiro dad, kóli terné-beršengires na javéla mánca? Mek fedýr me te dykháv, saví bída lathelas miré dadés.”