Read Biblija - Pe Baltitko Romani čib (Romanes) 2019 Baltic Romani Bible Džiibén 46 Bible Online

Džiibén 46 - Biblija - Pe Baltitko Romani čib (Romanes) 2019 Baltic Romani Bible bible

Džiibén 46

¹I gijá Izrailjo (Jakovo) sarésa, so léste sys, i javdiá dre Virsávija, i jandiá svénto dyibén (žértva) Devléske péskire dadéskire Isaakoskireske.

²I phendiá Devél Izrailjoske ratý dro sunó: “Jákovie! Jakovie!” Jov phendiá: “Ĥáda, me som.”

³O Devél phendiá: “Me, som Devél, tyré dadéskiro Devél; na dar, džá dro Jegípto, pal-dová so Me sozdáva tútyr bari manušýtko nacyja,

⁴Me džáva túsa dro Jegípto, Me i lydžáva tut pale. O Joza péskire vastésa učhakiréla tyré jakhá.”

⁵Jakovo gijá Virsavijatyr; i lydžiné Izrailjoskire čhavé Jakovós, péskire dadés, i péskire bijatén, i péskire romnién pe maribnýtka vurdená, savé bičhadiá faraóno, sob (kaj) te janén les.

⁶Jone lyné péskire kheritkoné murdalén (skoto) i péskiro mištypén, savó sys lénde pe Xanaanóskiri phuv, i javné dro Jegípto, — Jakovo i saró léskiro ródo lésa.

⁷Peskiren čhavén i ŭnuken pésa, peskiren čhajén i ŭnučken, i saró péskiro ródo jandiá jov pésa dro Jegípto.

⁸Ĥáda, sys Izrailjoskire-čhavéngire lavá, savé javné dro Jegípto: Jakovo i léskire čhavé. Jakovóskiro anglatunó čhavó sys Ruvimo.

⁹Ruvimóskire čhavé sys: Xanoho i Falu, Xiecrono i Xarmi.

¹⁰Simieonoskire čhavé sys: Iiemuilo i Iamino (Jamino), i Ogado, Iahino, i Coharo, i Sáulo, Xananejankakiro čhavó.

¹¹Lievijoskire čhavé sys: Girsono, Kaafo i Mierari.

¹²Judáskire čhavé sys: Iro i Onano, i Šelá, i Fariéso, i Zaro; ne Iro i Onano myné pe Xanaanóskiri phuv. Fariesoskire čhavé sys: Jesromo i Xamulo.

¹³Isaharoskire čhavé sys: Fola i Fuva, Ióvo i Šymrono.

¹⁴Zavulonoskire čhavé sys: Sieriedo i Jelono, Iahlieilo (Jahlieilo).

¹⁵Adalé sys Lijakire čhavé, savén joj bijandiá Jakovóske dre Miesopotamija, i léskire čhasa Dinasa. Sarén léskire čhavén i čhajén sys trijánda trin manušá.

¹⁶Gadóskire čhavé sys: Cyfiono i Xagi, Šuni i Ecbono, Jeri, Arodi i Arieli.

¹⁷Asiroskire čhavé sys: Imna, Išva, Išvi, Bria, i Sierah, léngiri phen. Brijaskire čhavé: Xieviero i Malhiilo.

¹⁸Davá sys Ziel'fakire čhavé, savjá Laváno dyjá Lijake, péskire čhake; joj bijandiá len Jakovóske dešušov dijá.

¹⁹Rahiliakire čhavé, Jakovóskire romniakire sys: Joza (Iosifo) i Vieniamino.

²⁰I bijándyne Jozaste pe Jegiptóskiri phuv Manásija i Jefriémo, savén bijandiá léske Asieniefá, Potifaroskiri čhaj, Iliopol'skone-žriecoskiri.

²¹Vieniaminóskire čhavé sys: Béla i Biehiéro, i Ašbiélo; Gierá i Naamáno, Ehií i Róšo, Mupímo i Xupímo, i Árdo.

²²Adalé sys Rahiliakire čhavé, savé bijándyne Jakovostyr, saró pe saró dešuštar dijá.

²³Danoskiro čhavó sys: Xušymo.

²⁴Niefalimoskire čhavé sys: Iahceilo (Jahceilo) i Guni, i Iiecero, i Šyliémo.

²⁵Adalé sys Valakire čhavé: savjá dyjá Laváno péskire čhake Rahiliake; joj bijandiá len Jakovóske sarén eftá manušén.

²⁶Sarén manušén, savé javné Jakovosa dro Jegípto, savé vyginé léskire trušulendyr (črieslendyr), apríč čhavénde Jakovóskire romniéndyr, sys sarén šovdešá šov dijá.

²⁷Jozáskire čhavé, savé bijándyne léstyr dro Jegípto, sys duj dijá. Sarén Jakovóskire kheréskire manušén, savé javné dre Jegípto, sys eftadešá.

²⁸O Jakovo bičhadiá Judas angíl péste ke Joza, sob (kaj) jov te sykavél drom dro Giesiémo. I javné jone pe Giesiemoskiri phuv.

²⁹O Joza dyjá andré péskiro maribnýtko vurdén, i tradyjá muial (pe strieč) Izrailjoske, péskire dadéske, dro Giesiémo, i, dykhciá les, pyjá léske pe men, i ĥará (dlúges) rondiá léste pe men.

³⁰I phendiá Izrailjo Jozáske: “Merava me akaná, dykhí tyró muj, pal-dová so tu san džidó.”

³¹I phendiá Joza péskire pšalénge i péskire-dadéskire kheréske: “Me džáva, i phenáva faraonóske: ‘Miré-dad pšála i miré-dadéskiro kher, savé sys pe Xanaanóskiri phuv, javné ke me’.

³²Adalé manušá isyn bakréngire čhupnárja, pal-dová so jone zalenape kheritkoné murdalénca; tyknó i baró péskiro skoto, i saró, so lénde sys, jandlé jone.”

³³Kóli faraóno kharéla tumen i phenéla: ‘Savó tumaró zalyiben (zajomka)?’

³⁴to tumé phenén: ‘Ame, tyré pishárja sam terné beršéndyr i ke (žýko) davá časo, dykhasas ame pal kheritkoné murdalénde, i ame, i amaré dadá, sob (kaj) tumé te mekén te dživén pe Giesiemoskiri phuv.” Pal-dová so vaš Jegiptianenge isyn magiripén kažno manúš, savó sys čhupnári (pastuho) bakrengiro.