Read Biblija - Pe Baltitko Romani čib (Romanes) 2019 Baltic Romani Bible Džiibén 48 Bible Online

Džiibén 48 - Biblija - Pe Baltitko Romani čib (Romanes) 2019 Baltic Romani Bible bible

Džiibén 48

¹Paló (poslie) davá Jozáske phendlé: “Ĥáda, tyró dad isyn nasvaló.” I jov lyjá pésa dujén péskire čhavén: Manasijas i Jefriemos.

²Jakovóske phendlé: “Ĥáda, tyró čhavó Joza (Iosifo) džála ke tu.” Izrailjo skedyjá péskiri zor i besciá pe čhuibén.

³I phendiá Jakovo Jozáske: “Devél Sarezorjákiro sykadyjá mánge dre Luza, pe Xanaanóskiri phuv, i bahtiakirdiá man,

⁴i phendiá mánge: “Ĥáda, Me dáva túke but čhavorén i javéla but but tumen, i Me keráva adiáke, so tútyr vydžána but manušýtka nácyi, i Me dáva paló (poslie) túte daja phuv tyré rodóske, sob (kaj) jone viéčnes te javén xulanca.”

⁵I akaná duj tyré čhavé, savé bijándyne pe Jegiptóskiri phuv, angíl dová, syr me javdjom ke tu dro Jegípto, jone isyn miré; Jefriémo i Manásija, syr Ruvimo i Simieono (Siemjono) javéna miré;

⁶čhavé tyré, savé bijandjona paló lénde, javéna tyré; jone tel péskire-pšalengiro lav javéna te ginenpe dre paš léngire mekné mištypnástyr.

⁷Kiéli me gijom Miesopotamijatyr, pe Xanaanóskiri phuv myjá mánde Rahíl', pe drom, na dogii vari-kicý ke Jefrafa, i me garadjom la odój pe drom ke Jefrafa, so kakaná isyn Vifliejémo.”

⁸I dykhciá Izrailjo Jozáskire čhavén, i phendiá: “Kon isyn adavá?”

⁹I phendiá Joza péskire dadéske: “Dalé isyn miré čhavé, savén Devél dyjá mánge adái.” O Jakovo phendiá: “Lýdža pašyledýr len ke me, i me bahtiakirava len.”

¹⁰Izrailjoskire jakhá phuripnastyr fujes dykhné; jov na mogindiá šukár te dykhél. Joza lydžijá pašyledýr len ke jov, i čamudia jov len, i oblyja len.

¹¹I phendiá Izrailjo Jozáske: me i na dumindjom te dykháv tyró muj, ĥáda, Devél sykadiá mánge i tyrén čhavén.”

¹²I lydžijá len krig Joza léskire čangendyr, i kerdiá šerésa léske ke phuv.

¹³I lyjá Joza dujén, Jefriemos dro čačó péskiro vast proti zérvo (liévo) i Izrailjoskiro, a Manasijas dro zérvo (liévo) proti Izrailjoskiro čačó (pravo), i lydžijá vastésa pašyledýr len ke jov.

¹⁴Ne Izrailjo protyrdyjá péskiro čačó (pravo) vast i čhudiá Jefriemoske pe šeró, usajékh so odová sys tyknedyršo, a zérvo (liévo) pe šeró Manasijaste. Pefromi jov čhudiá adiáke péskire vastá, na dykhí pe dová, so Manásija sys anglatunó.

¹⁵I bahtiakirdiá Joza, i phendiá: “Devél, angíl Savéste psirdé miré dadá, Avraámo i Isaáko, Devél, Savó rakhéla man dolé dyveséndyr, syr me bijandyjom, adadyvés,

¹⁶O Jangólo, savó vyrakhcia man kažnoné čoripnástyr, mek te bahtiakirél adalé terné manušén; mek te javél pe lénde dynó miro lav i lav miré dadéngiro Avraámoskiro i Isaakoskiro, i mek te javél len but maškír phuv.”

¹⁷I dykhciá Joza, so léskiro dad čhudiá péskiro čačó (pravo) vast pe šeró Jefriemoske; i na pir iló léske sys davá. I lyjá jov péskire-dadéskiro vast, sob (kaj) te piričhuvel les Jefriemóskire šerestyr pe Manasijáskiro šeró,

¹⁸i phendiá Joza péskire dadéske: “Na adiáke, miro dádo, pal-dová so adavá čhavó isyn anglatunó, čhuv pe léskiro šeró čačó (pravo) tyró vast.

¹⁹Ne léskiro dad na zakamdiá i phendiá: “Me džinóm (džináv), mro čháva, džinóm, i léstyr vydžána manušá, i jov javéla baró; ne léskiro tyknedýr pšal javéla baredýr léstyr, i léstyr vydžála bari manušýtko nacyja (narodo).”

²⁰I bahtiakirdiá Izrailjo dro dová dyvés len, rakirí: “Túsa javéna te bahtiakirenpe manušá Izrailjostyr, rakirí: ‘Mek te kerél túke Devél, syr Jefriemoske i Manasijaske’.” I čhudiá Jefriemos vučedýr Manasijastyr.

²¹I phendiá Izrailjo Jozáske: “Ĥáda, me meráva: i Devél javéla tuménca, i riskiréla tumen pale pe tumaré-dadengiri phuv;

²²i me dáva túke butýr angíl tyré pšalénde, jekh phuvjákiro kotér [sklono-ju.o.], savó me lyjom Amoriejéngire vasténdyr miré kurtalása i lukosa.”