Read Biblija - Pe Baltitko Romani čib (Romanes) 2019 Baltic Romani Bible Džiibén 49 Bible Online

Džiibén 49 - Biblija - Pe Baltitko Romani čib (Romanes) 2019 Baltic Romani Bible bible

Džiibén 49

¹I khardiá Jakovo péskire čhavén, i phendiá: “Skedénpe i me rosphenava tuménge, so javéla tuménca pe dyvesá; so javéna angíl:

²skedénpe i šunén, Jakovóskire čhavé, šunén, Izrailjo, tumaré dadés.

³Ruvimo, anglatunó miro! Tu san miro zoralypén i anglatunó miré zorjake, naj patyvaledyr pir mina i naj zoraledýr;

⁴ne tu san šumno, syr paní, tu na javésa te priphenes javirénge, pal-dová so tu gíian pe tyré-dadéskiro čhuibén; tu magirdian miro čhuibén.

⁵Pšála Simieono i Lievijo, léngire kurtaly na tanginena;

⁶dre léngire mysli mek te na dykhél miro di, i ke léngiro skedyibén mek te na javél mirí sláva, pal-dová so jone dre péskiri xolý zamardé manušés, i pir péskiro iló piričhindle guruveske žyly;

⁷mek te xasjol léngiri xolý, pal-dová so láte nane tangipén, i léngiri bari xolý, pal-dová so joj isyn na manušany; me roskerava pe pašá len te dživén pir Jakovoste, i rosčhuvava len pir Izrailjo.

⁸Juda! Javéna te šarén tut tyré pšála. Tyró vast javéla pe tyré-vergengiro dumo; túke keréna šerésa ke phuv tyré-dadéskire čhavé.

⁹Ternó ščer (liévo) Juda, doresybnastyr, syr jov zahala, miro čhavó, ĥazdélape jov. Pasijá jov, syr ščer (liévo) i syr ščeriha (l'vica): kon ĥazdéla les?

¹⁰Na otdžala Judastyr skipietro i zakonoskiro dyibnari léskire trušulendyr, ke davá časo, paka javéla Ramanjoskiro (Primiritieljo), i les javéna te kandén manušá.

¹¹Jov priphandela ke vinagradýtko (drakhítko) kaštoro péskire osljonkós (miegaricorés), i ke fedyršo vinagradýtko (drakhítko) kaštoro péskire oslicákire (miegaricákire) čhavés; morela dre mol (vino) péskiri ídia i dre grozdiéngiro rat péskiro uribén;

¹²hačona léskire jakhá moliátyr (vinostyr), i parné léskire dandá thudestyr.

¹³Zavulono javéla te dživél pašýl morjoskiro (derjavéskiro) brégo, kaj isyn terdé pármy[15] (korabli), i kónco (jagóro) léskiro ke Sidono.

¹⁴Isaharo isyn zoraló óslo (miegári), savó isyn paštó maškirál paniéskiro thadypen;

¹⁵i dykhciá jov, so otkhinyben sys lačhó, i so phuv sys šukár: i bandiakirdia péskire psiké vaš pharipén i lyjá te kerél butý dro pleskiriben.

¹⁶Dano javéla te sendinel péskire manušén, syr jekh Izrailjoskire rodycendyr (čangendyr);

¹⁷Dano javéla sapesa pe drom, saplyniasa pe drom, saví dukhavela greske ĥerój adiáke, so manúš, savó beštó uklisto, peréla pale.

¹⁸Pe tyró podrikiribén (pomošč) me rozginava, Rajo Dévla!

¹⁹Gados, manušá syr xaladé javéna te pritasaven, ne jov len otčhurdela pir piénty (khurjá).

²⁰Vaš Asiroske léskiro maró isyn drieván thulo, i jov javéla te doresel kralískire prismáki (frišmáki).

²¹Niefalimo isyn syr šukár olieniha, savó pir iló rakiréla.

²²Joza (Iosifo) isyn otbaripen lačhé vešeskiro, otbaripen pašýl džiibnáskiri ĥanýng; léskire randiá rozbarjonape pe vánta;

²³holiakirenas les, i dénas kar'je lukostyr dre léste i na mogindlé te dykhén pe léste manušá, savé dyné kar'je lukostyr;

²⁴ne jaciápe zoraló léskiro lúko, i zoralé isyn léskire-vastengire masá, zoralé Jakovóskire-Devléskire vasténdyr. Odothýr isyn Čhupnári i Izrailjoskiri tvárdyma,

²⁵tyré-dadéskire Devléstyr, Savó pomoginela túke, i Sarezorjakirestyr, Savó i bahtiakiréla tut vučipnástyr bolybnáskire bahtiakiribnasa, xoripnaskire bahtiakiribnasa, savó isyn paštó dro dólo, bahtiakiribnasa ciuciendyr (soscendyr) i ločoviátyr (utrobatyr),

²⁶tyré-dadéskire bahtiakiribnenca, savé isyn vučedýr bahtiakiribnastyr phurané bergendyr i lačhipnastyr viečnone bergicengiro. Mek te javén jone pe Jozaskiro šeró i pe tiemjo (gutup), savó sys vykedyno maškír péskire pšalénde.

²⁷Vieniamino isyn riskiribnáskiro ruv (januro)[16], pe zlóko (rankosa) javéla te xal dová, so jov uhtyléla i bel'veliasa javéla te roskerél (te dielinel) dová, so doreséla.”

²⁸Ĥáda, isyn saré Izrailjoskire dešudúj ródycy: i ĥáda, so lénge phendiá léngiro dad; i bahtiakirdiá len, i dyjá bahtiakiribén lénge, kažnonéske péskiro.

²⁹I priphendiá jov lénge, i phendiá lénge: “Me pričhuvavape ke péskire manušá; garavén man miré dadénca dre ĥiebár (pieščera), saví isyn pe Jefronoskire-Xietejaninoskiri félda,

³⁰dre ĥiebár (pieščera), saví isyn pe Mahpielaskiri félda, so isyn angíl Mamrie, pe Xanaanóskiri phuv, saví kindia Avraámo feldasa Jefronostyr Xietejaninostyr vaš péske vaš garaiben;

³¹odój garadé Avraamos i Sárra, leskirja romniá; odój garadé Isaakos i Rievieka, leskirja romniá; i odój garadé Lija;

³²daja félda i ĥiebár (pieščera), saví sys pe láte, sys kindly Xietiejéngire čhavéndyr.”

³³I pirijaciá Jakovo te rakirél péskire čhavénge, i čhudiá khetané péskire ĥerá pe čhuibén, i myjá, i pričhudiape ke péskire manušá.