Read Biblija - Pe Baltitko Romani čib (Romanes) 2019 Baltic Romani Bible Džiibén 50 Bible Online

Džiibén 50 - Biblija - Pe Baltitko Romani čib (Romanes) 2019 Baltic Romani Bible bible

Džiibén 50

¹I Joza pyjá pe léskire-dadéskiro muj, i rondiá pe léste, i čamudia les.

²I phendiá Joza peskirenge dynar'jénge, sastypnar'jénge (uračenge) te bal'zaminen léskire dadés; i sastypnarja bal'zamindle Izrailjos.

³I progijá léske štardešá dyvesá, pal-dová so adákicy dyvesá trej vaš bal'zaminyben, i obrovenas les Jegiptiáni eftadešá dyvesá.

⁴Kiéli proginé (nakhle) roibnytka dyvesá pal léste, o Joza phendiá faraonóskire kheritkonenge: “Kóli me lathjom láska dre tumaré jakhá, tedy phenén faraonóske adiáke:

⁵‘Dad miro sovlahadiá man, phendiá: Ĥáda, me meráva; dre miro maĥilýtko (koplíca), savó me vyganadjom péske pe Xanaanóskiri phuv, odój garav man. I akaná me kamdjom te džav, i te garavav miré dadés, i te risjovav.’”

⁶I phendiá faraóno: “Džá i garav tyré dadés, syr jov zasovlahadia tut.”

⁷I gijá Joza te garavel péskire dadés. I giné saré lésa faraonóskire dynárja, léskire phurydyrá, i saré Jegiptóskire-phuvjákire phurydyrá,

⁸i saró Jozaskiro kher, i léskire pšála, i léskire-dadéskiro kher. Jekhe péskire čhavén i tykné i baré kheritkoné murdalén (skoto) jačkirdé pe Giesiemoskiri phuv.

⁹I lésa giné adiáke-pac' maribnýtka vurdená i manušá, adiáke so taboro (lod) sys drieván baró.

¹⁰I doginé jone ke Gorién-gaatada (givaobmaribnaskiri šúrna ke Atado) pašýl Iordáno, i rondlé odój baré roibnasa i drieván zoralés; i kerdiá Joza roibén pal péskire dadéste eftá dyvesá.

¹¹I dykhné Xananiéi odolé phuvjákire manušá roibén dro Gorien-gaatada, i phendlé: “Baró dasavo roibén isyn Jegiptianende! Paldavá dynó dalé štetoske lav: Jegiptianengiro roibén, so isyn pašýl Iordáno.

¹²I kerdé Jakovóskire čhavé lésa, syr jov rakirdiá lénge;

¹³i otlydžine léskire čhavé les pe Xanaanóskiri phuv i ĥaradé les dre ĥiebár (pieščera), pe Mahpieloskiri félda, saví Avraámo kindia feldasa vaš péske vaš garaiben Jefronoste Xietijaninostyr angíl Mamrie.

¹⁴I risijá Joza dro Jegípto, kokoró i léskire pšála, i saré, kon psirdiá lésa te garaven léskire dadés.

¹⁵I dykhné Jozaskiro pšála, so léngiro dad myjá, i phendlé: “So, kóli ame na javása dróga Jozáske, i jov zakaméla te othal pale aménge pal saró fuipén, savó ame léske kerdiám?”

¹⁶I bičhadé jone te phenén Jozáske: “Tyró dad angíl léskiro meribén dyjá lav, rakirí:

¹⁷Adiáke phenén Jozáske: ‘Me mangáva te primanges tyré pšalénge léngiro čoripén, i grého, adiáke syr jone kerdé túke fuipén. I akaná primáng tyré dadéskire Devléskire pishar'jengiro čoripén.’” Joza rondiá, kiéli léske rakirdé davá.

¹⁸Javné i kokoré léskire pšála, pyné angíl léste léngire mujenca, i phendlé: “Ĥáda, ame sam pishárja túke.”

¹⁹I phendiá Joza: “Na darén, pal-dová so me Devléstyr darava;

²⁰ĥáda, tumé kerdé mánge fuipén; ne Devél pirikerdia davá dre lačhipén, sob (kaj) te kerél dová, so akaná isyn: te zrakhes džiibén buté manušénge;

²¹i paldavá na darén: me javáva te čaliakirav tumen i tumaré čhavén.” I podrikirdia dúho (fáno) dre lénde, i rakirdiá pir léngiro iló.

²²I dživdiá Joza kokoró ke Jegípto i ke léskire-dadéskiro kher; o Joza dživdiá šel te deš berš.

²³I dykhciá Joza Jefriemóskire čhavén ke tríto ródo, adiáke-pac' Mahiroskire čhavén, Manasijáskire čhavés, savé bijándyne pe Jozáskire čangá.

²⁴I phendiá Joza péskire pšalénge: “Me meráva, ne Devél javéla te pomoginel, i vylydžala tumen dalé phuvjátyr pe phuv, pal saví Jov sovlahadiá Avraamóske, Isaakóske i Jakovóske.”

²⁵I zasovlahadia Joza Izrailjoskire čhavén, i phendiá: “Devél javéla te pomoginel tuménge i tumé vylydžan miré kokalý adathýr.”

²⁶I myjá Joza šel te deš berš. I bal'zamindle les, i čhudé dro Jegípto dro mulykano /ĥrobo [kovčego-r.s.]