Read Biblija - Pe Baltitko Romani čib (Romanes) 2019 Baltic Romani Bible Džiibén 8 Bible Online

Džiibén 8 - Biblija - Pe Baltitko Romani čib (Romanes) 2019 Baltic Romani Bible bible

Džiibén 8

¹I priripirdia Devél pal Nojoste, i pal kažno džidó sozdyiben, i pal saré kheritkoné murdalénde (skoto), savé sys lésa dro kovčego; i ĥazdyjá Devél balvál pe phuv, i pirijaciá paní.

²I začhakirdepe xoripnaskire ĥanyngá i bolybnáskire fenštry (dudalia), i bolybnástyr pirijaciá te džal bryšýnd.

³Pani pe nábut risjolas phuvjátyr, i paló šel te pandžeša dyvesá paní jaciá te tyknjol.

⁴I dro eftáto (bitrinéngiro déšto) čhon, pe dešueftatone-čhonéskiro dyvés, pe Araratoskire bérgi terdijá kovčego.

⁵Pani saró časo tyknjolas ke déšto čhon; dro anglatunó dyvés deštone-čhonéskiro jačné dyc'le upralestyr bérgi.

⁶Pir štardešá dyvesá, Nojo otčhakirdiá fenštrori dro kovčego, saví jov kokoró kerdiá.

⁷I vymekcia korakos (voronos), savó vurniandyja, oturniandyja i risijá, paka vyšutija phuv paniéstyr.

⁸Adiáke-pac' jov otmekciá péstyr golumbos, sob (kaj) te dykhél, ci zgija paní phuvjátyr.

⁹Ne golumbo na lathiá (lastia) šuko štéto vaš péskire ĥerá, i risijá ke jov dro kovčego; pal-davá so paní sys uprál pir sarí phuv; i jov protyrdyjá péskiro vast, i lyi les, prilyjá ke pe dro kovčego.

¹⁰I promekcia javír eftá dyvesá; i nevéstyr (nevés) vymekcia golumbos kovčegostyr.

¹¹Golumbo ke jov risijá bel'veliakiro; i ĥáda, jalo (sviažo) olivítko patrín (listo) sys léste dro muj: i Nojo ĥalyjá, so paní gijá krig phuvjátyr.

¹²Jov promekcia javír eftá dyvesá, i vymekcia golumbos; i jov butýr na risijá ke jov.

¹³Šovšelá pérvo berš ke pérvo (anglatunó) dyvés, pervoné-čhonéskiro, vyšutija paní pe phuv; i Nojo otčhakirdiá stréha (čhakín) dro kovčego, i podykhciá, i ĥáda, phuv uprál jaciá šukí.

¹⁴I pe javír čhon, pe biš te eftáto-čhonéskiro dyvés, phuv vyšutija.

¹⁵I Devél phendiá Nojoske:

¹⁶“Vydža kovčegostyr tu, i tyrí romný, i čhavé tyré, i tyré-čhavéngire romniá túsa.

¹⁷Vylydža kažno džidó sozdyiben, savó isyn túsa, kažnoné ločatyr, čirikliéndyr, i kheritkoné murdaléndyr (skotóstyr), i saré gaden, savé polzynena pir phuv: mek jone te rozdžanpe pir phuv, i mek jone te bijanen tyknen i te javén len but pe phuv.”

¹⁸I vygijá Nojo, i léskire čhavé, i romný léskiri i lésa léskire-čhavéngire romniá.

¹⁹I kažno riskiribnáskiro murdál (zvierjo), i kažno capny (plazuno), i kažno čirikly, i saró, so polzynela pir phuv, pir ródo péskiro, vyginé kovčegostyr.

²⁰I kerdiá Nojo altárjo (žertvieniko) Ráske-Devléske; i lyjá kažnoné žužé kheritkoné murdalestyr (skotóstyr) i kažnoné žužé čirikliatyr, i jandiá céla xačkiribnaskire svénta dyibená pe altárjo.

²¹I sungadia Raj Devél gudló thuv (dymo) i phendiá Raj Devél dro Péskiro iló: “Me na javáva butýr te prokošav pal phuv manušés, pal-dová so manušéskiro iló isyn te kerél fuipén léskire ternypnastyr: i butýr Me na javáva te xasiakiráv saró, so isyn džidó, syr Me kerdjom.

²²Akaná dre saré dyvesá javéna te počhuven dre phuv i te ukeden, šyl i xačkiribén, ivant (zima) i lynaj (milaj), dyvés i rat na pirijačena.”