Read Biblija - Pe Baltitko Romani čib (Romanes) 2019 Baltic Romani Bible 2 Kralip 10 Bible Online

2 Kralip 10 - Biblija - Pe Baltitko Romani čib (Romanes) 2019 Baltic Romani Bible bible

2 Kralip 10

¹Syr progijá vari-kicý časo, myjá Amonitianengiro králi, i jaciá pe štéto liéskiro léste kralísa léskiro čhavó Anono.

²I phendiá Davído: “Keráva me lačhipén Anonoske, Naasovoskire čhavéske, pal lačhó réndo, savó kerdiá mánge léskiro dad.” I bičhadiá Davído péskire dynar'jén te rakirén pir iló Anonoske pal léskire dadéste, i javné Davidóskire dynárja pe Amonitianengiri phuv.

³Ne thagárja Amonitianengiro phendlé Anonoske, xuláske peskireske: “Naúšto tu duminesa, so Davído pal patýv ke dad tyró pribičhadia ke tu peskiren manušén te urakiren tut? Ci na vaš davá, sob (kaj) te obdykhel fóro, i te vydykhel dre léste, i paló (poslie) davá te rozmarel les, pribičhadia Davído dynar'jén peskiren ke tu?”

⁴I lyjá Anono dynar'jén Davidoskiren, i občhindia kažnonestyr léndyr paš čhora (broda), i občhindia ídi léngire pe paš, ke trušula, i otmekhcia len.

⁵Kiéli rosphendlé pal davá Davidóske, tedy jov bičhadiá ke jone pe strieč, adiáke syr jone sys drieván ladžakirdé. I priphendiá králi te phenén lénge: “Jačénpe dro Jerihóno, paka otbarjona čhora (brody) tumaré, i tedy risjon.”

⁶I dykhné Amonitiani, so jone kerdépe vergenca vaš Davidóske; i bičhadé Amonitiani te len pal lové Siriicen Biefo-Riefovostyr i Siriicen Suvatyr biš tysjoncy pezal, kralíste Mahaste tysjonco manušén, i Istovostyr dešudúj tysjoncy manušén.

⁷Kiéli šundiá pal davá Davído, tedy bičhadiá Ioavos saré murškané xaladenca.

⁸I vyginé Amonitiani, i terdiné pašýl pórta ke maribén, a Siriicy Suvakire, i Riehovoskire, i Istovakire, i Maahakire terdiné rigasa pe félda.

⁹I dykhciá Ioávo, so vergéngire xaladé sys čhudé proti léste i angíl, i palál, i vykedyjá xaladén saréndyr fedyršonen dro Izrailjo, i čhudiá len proti Siriicende;

¹⁰palatuny paš manušén otdyjá tel zor Aviesaske, péskire pšaléske, sob (kaj) jov te čhuvél len proti Amonitianende.

¹¹I phendiá Ioávo: “Kóli Siriicy javéna te pirizorjakiren man, tu désa vast mánge; a kóli Amonitiani tut léna te pirizorjakiren, to me javáva ke tu te dav vast;

¹²iav murškanó, i javása te terdjovas tvardes pal amaré manušénde i pal fórja amaré Devléskire, a Raj Devél keréla, so Léske javéla trej.”

¹³I vygijá Ioávo i manušá, savé sys léste, pe maribén Siriicenca, i jone prastándyne léstyr.

¹⁴Amonitiani, dykhí, so Siriicy našéna, prastándyne Aviesastyr, i giné dre fóro. I risijá Ioávo Amonitianendyr i javdiá dro Jerusalimo.

¹⁵Siriicy, dykhí, so Izrail'tiáni domardé len, skedynépe khetané.

¹⁶I bičhadiá Adraazaro i khardiá Siriicen, savé sys pal reka (len'), i javné jone ke Jelamo; a Sovako, xaladéngiro barydyró, Adraazaroskiro, rikirdia zor pe lénde.

¹⁷Kiéli rosphendlé pal davá Davidóske, tedy jov skedyjá sarén Izrail'tianén, i pirigija Iordáno, i javdiá ke Jelamo. Siriicy terdiné proti Davidóste, i mardépe lésa.

¹⁸I prastándyne Siriicy Izrail'tianendyr. Davído domardiá Siriicende eftašelá maribnýtka vurdyná i štardešá tysjoncy uklisté pe grénde manušén; zamardiá xaladéngire barydyrés Sovakos, savó odój i myjá.

¹⁹Kiéli saré králja, savé sys poddyne Adrazaroske, dykhné, so jone Izrail'tianie domarle len, tedy kerdé ramánjo (miro) Izrail'tianenca i poddynepe lénge. A Siriicy (Sirijani) darándyne butýr te den vast Amonitianenge.