Read Biblija - Pe Baltitko Romani čib (Romanes) 2019 Baltic Romani Bible 2 Kralip 11 Bible Online

2 Kralip 11 - Biblija - Pe Baltitko Romani čib (Romanes) 2019 Baltic Romani Bible bible

2 Kralip 11

¹Pirdál berš, dre dová dyvés, kiéli vydžána králja dro maribnýtko drom (pohodo), to Davído bičhadiá Ioavos i péskire dynar'jén lésa i saré Izrail'tianén; i jone domardé Amonitianen, i lyné Ravva, Davído jaciápe dro Jerusalimo.

²Jekhvar tel bel'vél', Davído uštyjá čhuibnastyr, i džálas péske pe stréha (pe bérga) kralískire-kheréskiri, i dykhciá strehatyr džuvliá, saví kommpinelape (nandjóla)[3]; a odoiá džuvlý sys drieván šukár.

³I bičhadiá Davído manušén te udžinén, kon sys adáia džuvlý? I phendlé léske: “Davá isyn Virsávija, Jeliamoskiri čhaj, Urijáskiri-Xietejaninoskiri romný.”

⁴Davído bičhadiá dynar'jén te len la, i joj iavdiá ke jov, i jov sutia lása. Kiéli joj vyžužakirdiape péskire magiribnastyr, to risijá dro péskiro kher.

⁵Daja džuvlý jaciá pharí, i bičhadiá zvies' (zan) Davidóske, rakirí: “Me som pharí.”

⁶I bičhadiá Davído te phenén Ioavoske: “Bičháv ke me Urijas Xietejaninos.”

⁷I javdiá ke jov Urija, i rosphuciape léstyr Davído, i pal Iovoste, i pal réndy manušénde, i pal maribnaskiro giiben.

⁸I phendiá Davído Urijaske: “Džá kheré i obmor péskire ĥerá.” I vygijá Urija kralískire kheréstyr, a palál pal léste lydžiné i kralískiro xabén.

⁹Ne Urija sys sutó pašýl kralískire-kheréskiri pórta saré péskire xuláskire dynar'jénca, i na gijá dro péskiro kher.

¹⁰I rosphendlé Davidóske, rakirí: “Na gijá Urija dro péskiro kher.” I phendiá Davído Urijaske: “Ĥáda, tu javdián droméstyr: sóske tu na gíian dro péskiro kher?

¹¹I phendiá Urija Davidóske: “Kovčego, i Izrailjo, i Juda isyn dre šátry, i xuláj miro Ioávo, i pishárja miré xuláskire isyn pe félda, a me zadžavas dre péskiro kher te xav, i te pjáv, i te sovav péskire romniása! Sovlahava me tyré džiibnasa i tyré-deskire džiibnasa, so davá me na keráva.”

¹²I phendiá Davído Urijaske: “Jačpe adáj i pe davá dyvés, a atasiá me otmekáva tut.” I jaciápe Urija ke Jerusalimo pe davá dyvés ke atasiá.

¹³I khardiá les Davído, i xaja Urija angíl léste, i pija, i paniakirdia les Davído. Ne bel'velié Urija gijá te sovél pe péskiro čhuibén péskire xuláskire pishar'jénca, a dro péskiro kher na gijá.

¹⁴Pe zlóko (rankosa) Davído čhindiá lyl Ioavoske, i bičhadiá les Urijasa.

¹⁵Dre lyl jov čhindiá adiáke: “Čhuvén Urijas doj, kaj javéla zoraló maribén, i otdžan léstyr, sob (kaj) jov te javél zamardo i te merél.”

¹⁶Pal-dová, so kiéli Ioávo lelas fóro, tedy jov čhudiá Urijas pe dasavo štéto, pal savó džindiá, so odój javéna murškané manušá.

¹⁷I vyginé manušá foróstyr, i mardépe Ioavosa, i pyné vari-kicý manušéndyr, Davidóskire dynar'jéndyr (slugéndyr); sys zamardo adiáke-pac' i Urija Xietejanino.

¹⁸I bičhadiá Ioávo te rosphenén pal saró maribnaskiro giiben.

¹⁹I priphendiá manušéske, savés pribičhade, rakirí: “Kiéli tu rosphenesa kralíske pal saró maribnaskiro giiben,

²⁰i dykhésa, so králi xoliasóla i phenéla túke: ‘Sóske tumé adiáke pašýl podginé ke fóro te marénpe? Naúšto tumé na džindlé, so vantatyr javéna te čhurdén pe tuménde?

²¹kon zamardiá Avimieliehos, Jerovaaloskire čhavés? Ci na džuvlý čhurdyjá pe léste vantatyr žernoskiro kotér, i jov myjá dro Tievieco? Sóske tumé pašýl podginé ke vánta?” Tedy i phen: ‘I pishári tyró Urija Xietejanino adiáke-pac' myjá.’

²²I gijá manúš, savó sys bičhadó, i javdiá, i rosphendiá Davidóske pal saró, vaš so bičhadiá les Ioávo, pal saró maribnaskiro giiben.

²³Tedy manúš, savó sys bičhadó, phendiá Davidóske: “Pirizorjakirde amen odolé manušá, i vyginé ke ame pe félda, i ame tradyjam len ke zagiibén dre vudará;

²⁴tedy dyné kar'je vantatyr pe pishar'jende tyrende, i myné vari-savé kralískire pishar'jendyr; myjá adiáke-pac' i tyró pishári Urija Xietejanino.

²⁵Tedy phendiá Davído manušéske, savés pribičhade: “Adiáke phen Ioavoske: ‘Mek te na ladžakirel tut pal davá réndo, pal-dová so kurtála marela javír mólo adoles, javír mólo odales; zorjakir maribén tyró proti fóro i rozmar les. Adiáke podrikir les.’”

²⁶I šundiá romný Urijáskiri, so myjá Urija, lákiro rom, i rondiá pal péskire romeste.

²⁷Kiéli progijá časo te obrovel les, to Davído bičhadiá i lyjá la dre péskiro kher, i joj iaciá léskire romniása, i bijandiá léske čhavés. I sys davá nálačho réndo, savó kerdiá Davído, dre jakhá Ráskire-Devléskire.