Read Biblija - Pe Baltitko Romani čib (Romanes) 2019 Baltic Romani Bible 2 Kralip 16 Bible Online

2 Kralip 16 - Biblija - Pe Baltitko Romani čib (Romanes) 2019 Baltic Romani Bible bible

2 Kralip 16

¹Kiéli Davído nábut zgija bergakire vučipnástyr, streninelaspe léske o Siva, dynári Miefivosfiejoskiro, duje oslenca tel zenia (sjodly) gruzosa, i pe lénde dujšelá maré, šel pučki ziumo, šel pučki inžyro i gonó moliasa (vinosa).

²I phendiá králi Sivaske: “Vaš so davá túte?” I otphendiá Siva: “Osly isyn vaš kralískiro kher te trades, a maró i barjakirdé (plódy) vaš xabén terné manušénge, a mol vaš pibén manušénge, savé jačéna bi zorjakiro pe čhučí phuv.”

³I phendiá králi: “Kaj isyn čhavó tyré-xulaskiro?” I otphendiá Siva kralíske: “Ĥáda, jov jaciápe dro Jerusalimo i rakiréla: ‘Kakaná kher Izrailjoskiro riskiréla mánge kralipén miré dadéskiro.”

⁴I phendiá králi Sivaske: “Ĥáda, túke saró, so isyn Miefivosfiejoste.’ I otphendiá Siva, kloniny: “Mek me te lathav láska dre jakhá miré xuláskire kralískire!”

⁵Kiéli dogijá králi Davído ke Bahurimo, ĥáda, vygijá odothýr manúš Saulóskire kheréskire rodóstyr, pir lav Siemiejo[4], Gieraskiro čhavó; jov gijá i kosciape,

⁶i čhurdyjá barénca pe Davidóste i pe saré Davidóskire-kralískire pishar'jende; saré manušá i saré murškané sys pir čačí i pir zérvo kralískiri rig.

⁷Adiáke rakirdiá Siemiejo, košyi les: “Džá krig, dža peske, zamaribnari i prahari!”

⁸Raj Devél riskirdiá pe túte saró rat Saulóskire kheréskiro, zamiést savéste tu jacián kralísa, i otdyjá Raj Devél kralipén dre Aviesalomoskire vastá, tyré čhavéskire; i ĥáda, tu san dre bída, pal-dová so tu san ratpibnaskiro.”

⁹I phendiá Avieso, Saruiaskiro čhavó, kralíske: “Sóske košela davá muló džukel xulás mires, kralís? Džáva me, i zlava léstyr šeró.”

¹⁰I phendiá králi: “So mánge i tuménge, Saruiaskire čhavé? Mek jov te košelpe, pal-dová so Raj Devél phendiá léske te košel Davidós. Kon moginéla te phenél: ‘Sóske tu adiáke kerésa?’

¹¹I phendiá Davído Aviesaske i sarénge péskire dynar'jénge: Ĥáda, kóli miro čhavó, savó vygijá miré maséndyr, rodéla di (džiibén) miro, to butýr te kerél Vieniamitianinoskiro čhavó; jačkiren les, mek jov te košelpe, pal-dová so Raj Devél phendiá léske.

¹²Moginéla te javél, so Raj Devél dykhela pe miro teliakiriben, i otdéla Raj Devél mánge lačhipnása pal adadyvesatuno léskiro košybén.”

¹³I gijá Davído i léskire manušá péskire dromésa, a Siemiejo gijá pir bergákiro zgiiben, rigátyr leskirjatyr, gijá i kosciape, i čhurdyjape barénca pe léskiri rig i pylosa.

¹⁴I javdiá králi i saré manušá, savé sys lésa, khinyi, i otkinyja odój.

¹⁵Aviesalómo i saré Izrailjoskire manušá javné dro Jerusalimo, i Ahitofieljo lénca.

¹⁶Kiéli Xusijo Arhitianino, mal Davidóskiro, javdiá ke Aviesalómo, to tedy phendiá Xusijo Aviesalomoske: “Mek te dživél králi, mek te dživél králi!”

¹⁷I phendiá Aviesalómo Xusijoske: “Dasaví isyn tyrí láska ke tyró drúgo (mal)! Sóske tu na gíian tyré malesa?”

¹⁸I phendiá Xusijo Aviesalomoske: “Nad, konés vykedyjá Raj Devél i adalé manušá i saró Izrailjo, odolesa i me som, i jačavape lésa.

¹⁹I pir saró konéske me javáva te dynarinav? Ci na léskire čhavéske? Syr dynarindjom me dadéske tyréske, adiáke Me javáva te dynarinav i túke.”

²⁰I phendiá Aviesalómo Ahitofieljoske: “Den godypén, so aménge te kerás.”

²¹I phendiá Ahitofieljo Aviesalomoske: “Zadžá ke tyré-dadéskire naložnicy, savén jov jačkirdiá te rakhén péskiro kher; i šunéna saré Izrail'tiáni, so tu kerdianpe nalačhesa vaš tyré dadéske, i zoraljona sarengire manušéngire vastá, savé isyn túsa.”

²²I čhudé vaš Aviesalomoske šátra pe stréha (čhakín), i zagijá Aviesalómo ke naložnicy, léskire-dadéskire, angíl jakhá saré Izrailjoskire.

²³Godypén Ahitofieloskiro, savó jov délas dre dolé dyvesá gindiape, syr kóli by vari-kon phuciape uphenybén Devléstyr. Dasavo sys kažno (sváko) godypén Ahitofieloskiro, syr vaš Davidóske, adiáke i vaš Aviesalomoske.