Read Biblija - Pe Baltitko Romani čib (Romanes) 2019 Baltic Romani Bible 2 Kralip 23 Bible Online

2 Kralip 23 - Biblija - Pe Baltitko Romani čib (Romanes) 2019 Baltic Romani Bible bible

2 Kralip 23

¹Ĥáda, isyn palatuné (posliednia) lavá Davidóskire, Jesiejoskire-čhavéskire, phenybén muršeskiro, savó sys čhudo vučés, pomakhibnaskires Devleskires Jakovoskires i gudlé-bagaibnaskires Izrailjostyr:

²Ráskire-Devléskiro dúho rakiréla dre mánde, i lav Léskiro sys pe čib mánde.

³Phendia Devél Izrailjoskiro, i rakirdiá pal mánde bérga Izrailjoskiri: “Jav xulása pe manušénde, jav čačunó, xulain darása (darjasa) Devleskirjasa.

⁴I syr pe zlóko (pe ránko), kiéli dyviesjola, syr džála upré kham pe bioblokengiro bolybén, savó ziainela paló (poslie) bryšýnd, syr barjola čhar phuvjátyr,

⁵ci na adiáke isyn kher miro Devléste? Pal-dová so dorakiribén viéčno čhudiá Jov mánca, tvardo i naparudo. Ci na adiáke džála Léstyr saró zrakhibén miro i saró lačhipén miro?

⁶A nalačhé manušá javéna, syr vyčhurdyno xrústo suv'jenca, savó na léna vastésa;

⁷ne kon čilavéla les, odová léla sastýr, ci čhurdypnytkone-bustiakire destesa, i jagása xačkirena les pe štéto.

⁸Ĥáda, isyn lav murškanengire Davidóste: Isbosiefo Ahamanitianino, šeraló trinendyr; jov ĥazdyjá péskiro čhurdypnytko bust pe ohtošela manušénde, i zamardiá len pal jekh mólo.

⁹Pal léste Jelizáro, čhavó Dodoskiro, Ahohoskire-čhavéskiro, triné murškanendyr, savé sys Davidosa, kiéli jone košybnasa vykharde Filistimlianen, savé skedynépe pe maribén.

¹⁰Izrail'tiáni vyginé proti lénde, i jov terdijá, i mardia Filistimlianen ke dová, so vast léskiro khinyja i prilipnindia ke kurtála. I dyjá Raj Devél dro dová dyvés bari zbierdyma (pobieda), i manušá giné pal léste vaš dová jekh, sob (kaj) te obkeden mulen.

¹¹Pal léste Šama, čhavó Agiejoskiro, Gararitianino. Kiéli Filistimliáni skedynépe dre Firija, kaj sys félda, so sys počhudy dre phuv čečevicasa, i manušá prastándyne Filistimlianendyr:

¹²tedy jov terdijá maškír félda, i zrakhciá la, i muliakirdiá Filistimlianen. I dyjá tedy Raj Devél bari zbierdyma (pirizorjakiriben).

¹³Trin adalé murškané trijandendyr šeralendyr giné i zaginé dro časo ukedyibnytko ke Davído dre ĥiebár (pieščera) Odolamo, kiéli but Filistimliáni sys terdé pe Riefaimoskiro dólo.

¹⁴Davído sys tedy pe štéto zoralé tynénca, a otriado Filistimlianengiro — dro Vifliejémo.

¹⁵I zakamdiá Davído te p'jel, i phendiá: “Kon paniakirela man paniésa Vifliejemoskire ĥanyngatyr, so sys pašýl pórta?”

¹⁶Tedy trin adalé murškané manušá promardepe pirdál Filistimlianengiro stáno (lod), i pherdé paní Vifliejemoskire ĥanyngatyr, so sys pašýl pórta, i lyné i jandlé Davidóske. Ne jov na zakamdiá te p'jel les i vyčhudiá les dre sláva Ráske-Devléske,

¹⁷i phendiá: “Zrákh man, Dévla, sob (kaj) me te keráv davá! Ci davá isyn na rat adalé manušéngiro, savé psirdé darása (darjasa) pal péskiro džiibén?’ I na zakamdiá les te p'jel. Ĥáda, so kerdé dalé trin muršarja!

¹⁸I Aviesa, Ioavoskiro pšal, Saruiaskiro čhavó, sys trinendyr šeralesa; jov zamardiá péskire čhurdyibnytkone bustiasa trinšelá manušén i sys dre sláva odolé trinende.

¹⁹Trinendyr jov sys patyvaledyr i sys barydyrésa, ne odolé trinenca na rovnindiape.

²⁰O Vaneja, Iodajoskiro čhavó, muršari, baró pir réndy, Kavceilostyr; jov muliakirdiá dujén Ariiloskire Moavitskone čhavén; jov gijá i zamardiá ščeres (lievos) dro rovo (xohói) dro ivitko časo;

²¹i jov zamardiá jekhe Jegiptianinos, šeralé manušés; dro Jegiptianinoskiro vast sys čhurdyibnytko bust, a jov gijá ke jov kaštesa, i otlyja čhurdypnytko bust Jegiptianinoskire vastéstyr, i domardiá les léskire bustiasa:

²²ĥáda, so kerdiá Vaneja, Iodajoskiro čhavó, i jov sys dre sláva triné murškané manušénde;

²³jov sys slavutnedyr trijandendyr, ne odolenca trinenca na rovnindiape. I čhudiá les Davído pašatunesa fandarisa (spolnitiljosa) pe péskire priphenybená.

²⁴Asailo, Ioavoskiro pšal — sys maškír adalé trijánda manušénde; Jelhano, Dodoskiro čhavó, Vifliejemostyr,

²⁵Šama Xaroditianino, Jeliko Xaroditianino,

²⁶Hierieco Paltitianino, Iro, Ikiešaskiro čhavó, Fiekoitianino,

²⁷Jevijeziero Anafofianino, Miebunajo Xušatianino,

²⁸Calmono Ahohitianino, Magarajo Nietofatitianino,

²⁹Hielievo, Baanoskiro čhavó, Nietofatitianino, Itajo, Ribajoskiro čhavó Givatyr Vieniaminóskire čhavéndyr,

³⁰Vaneja Pirafonianino, Idajo Nahlie-Gaašostyr,

³¹Avi-Albono Arbatitianino, Azmavieto Barhamitianino,

³²Jelijahba Šaalbonianino; Jašenoskire čhavéndyr, Ionafáno,

³³Šama Gararitianino, Ahiamo, Šararoskiro čhavó, Araritianino,

³⁴Jelifielieto, Ahasbajoskiro čhavó, Magahatoskire-čhavéskire, Jeliamo, Ahitofieljoskiro čhavó, Gilonianino,

³⁵Hiecrajo Karmilitianino, Paarajo Arbitianino,

³⁶Igalo, Nafanoskiro čhavó, Cobatyr, Bani Gaditianino,

³⁷Celieko Amonitianino, Naharajo Bierotianino, manúš, savó lydžalas mardýtko (oružyjo) Ioavoskiro, Saruiaskire čhaveskiri,

³⁸Iro Itritianino, Gariebo Itritianino,

³⁹Urijo Xietejanino. Saré sys trindeša (trijánda) eftá.