Read Biblija - Pe Baltitko Romani čib (Romanes) 2019 Baltic Romani Bible 2 Kralip 9 Bible Online

2 Kralip 9 - Biblija - Pe Baltitko Romani čib (Romanes) 2019 Baltic Romani Bible bible

2 Kralip 9

¹I phendiá Davído: “Ci jaciápe vari-kon Saulóskire kheréstyr? Me keravas léske lačhipén (tangipén) pal Ionafanoste.

²Dro kher Sauloskiro sys pishári, pir lav Siva; i khardé les ke Davído, i phendiá léske králi: “Ci san tu Siva?” I odová phendiá: “Me, pishári tyró.”

³I phendiá králi: “Ci isyn butýr vari-kon kheréstyr Sauloskirestyr? Me keravas léske lačhipén (tangipén) Devléskiro.” I phendiá Siva kralíske: “Isyn Ionafanoskiro čhavó, savó isyn langalo ĥerénca.”

⁴I phendiá léske králi: “Kaj isyn jov?” I phendiá Siva kralíske: “Ĥáda, jov isyn dro Mahiróskiro kher, Amieloskire-čhavéskiro, dro Lodievaro.”

⁵I bičhadiá králi Davído, i lyné les Mahiroskire kheréstyr, Amieloskire čhavestyr, Lodievarostyr.

⁶I javdiá Miefivosfieje! (Miemfivosfieje!) Ionafanoskiro čhavó, Saulóskire-čhavéskire, ke Davído, i pyjá pe péskiro muj, i klonindiape. I phendiá Davído: “Miefivosfiejo!” I phendiá dová: “Ĥáda, pishári tyró.”

⁷I phendiá léske Davído: “Na dar; me keráva túke lačhipén (tangipén) pal tyré dadéste Iofanoste i riskiráva túke saré Saulóskire féldy, dadéskire-tyreskire, i tu ŭsády (sak) kažno mólo javésa te xas maró pal miro skamínd.”

⁸I klonindiape Miefivosfiejo i phendiá: “So adasavó isyn pishári tyró, so tu dykhcián laskasá pe adasaveste muleste džukleste, syr me som?”

⁹I khardiá králi Sivas, Saulóskire dynarís, i phendiá léske: “Saró, so sys Sauloskiro i sar léskire kheréskiro, me otdáva tyré xuláskire čhavéske;

¹⁰i adiáke obker vaš léske phuv tu i čhavé tyré pishárja tyré, i jan lákire baritka (plódy), sob (kaj) tyré xuláskire čhavéste te javél maró vaš xabén; o Miemivosfiejo, xulaskiro čhavó, ŭsády (sak) javéla te xal pal miro skamínd.” Sivaste sys dešupandž čhavé i dešudúj pishárja.

¹¹I phendiá Siva kralíske: “Saró, so priphenela xuláj miro, králi, pisharíske peskireske, keréla pishári tyró.” Miefivosfiejo xaja pal Davidóskiro skamínd, syr jekh kralískire čhavéndyr.

¹²Miefivosfiejoste sys tykné-beršytko čhavó, pir lav Miha. Saré, kon dživdiá dro Sivaskiro kher, sys Miefivosfiejoskire pishárja.

¹³I dživdiá Miefivosfiejo ke Jerusalimo, pal-dová so jov xaja ŭsády (sak) pal kralískiro skamínd. Jov sys langalo pe duj ĥerá.