Read Biblija - Pe Baltitko Romani čib (Romanes) 2019 Baltic Romani Bible 3 Kralip 15 Bible Online

3 Kralip 15 - Biblija - Pe Baltitko Romani čib (Romanes) 2019 Baltic Romani Bible bible

3 Kralip 15

¹Pe dešuohtoto berš, syr lyjá te kralinél Jerovoámo (Iierovoamo), Navatoskiro čhavó, Avijá jaciá králi pe Judejakirende.

²Trin berš jov sys králi dro Jerusalimo; lav léskire-dákiro sys Maaha, Aviesalomoskiri čhaj.

³Jov psirdiá dre saré gréhi léskire dadéskire, savé odová kerdiá angledýr látyr, i iló léskiro na sys sarésa otdynó Ráske-Devléske, léskire Devléske, syr iló Davidóskiro, léskire-dadéskiro.

⁴Ne vaš Davidóske Raj Devél, Devél léskiro, dyjá léske momolýtko (svietíl'niko) dro Jerusalimo, čhudiá paló léste králi čhavés leskires i zoraliakirdia Jerusalimo.

⁵Pal-dová so Davído kerdiá lačhipén angíl jakhá Ráskire-Devléskire i jov na otgijá saréstyr doléstyr, so Jov rakirdiá léske, dre saré péskire džiibnáskire dyvesá, apríč dová, so vygijá Urijasa Xietejaninosa.

⁶I maribén sys maškír Rovoamoste i Jerovoamoste dre saré léngire džiibnáskire dyvesá.

⁷Javír réndy (diély) Avijaskire, saró, so jov kerdiá, isyn začhindlé dre beršýtka arhívy kral'jéngire pe Judéia. I sys maribén maškír Avijaste i Jerovoamoste.

⁸I myjá Avijá i garadé les dadénca leskirenca dro Davidóskiro fóro. I Asá jaciá králi, léskiro čhavó, pe štéto léskiro.

⁹Dro bišengiro berš, syr lyjá te kralinél Jerovoámo, Izrailjoskiro králi, jaciá te kralinél Asá pe Judejakirende.

¹⁰I štardešajekh berš jov sys králi dro Jerusalimo. Lav dákire-leskirjakiro sys Ana [Maha-ju.o.], čhaj Aviesalomoskiri.

¹¹O Asá kerdiá lačhipén angíl jakhá Ráskire-Devléskire, syr Davído, léskiro dad.

¹²Jov tradyjá krig biladžakunen ne manušen phuvjátyr i vyčhurdyja saré ídoly, savé kerdé léskire dadá.

¹³I adiáke-pac' datyr peskirjatyr, Anatyr, jov otlyja khariben (titulo) kralicakiro pal dová, so joj kerdiá vyčhindlo muj Astartakiro. I rosčingirdia Asá vyčhindlo muj lákiro, i xačkirdiá les pašýl sýgno rékica (lenorí) Kiedrono.

¹⁴Vučipená na sys phagirdé. Ne iló Asáskiro sys otdynó Ráske-Devléske dre saré léskire džiibnáskire dyvesá.

¹⁵I jandiá jov dro Kher Ráskire-Devléskiro priedmiéty i khoré, savé sys obsvencynde léskire dadésa, i priedmiety, savé jov obsvencyndia: rup, i suvnakái, i khoré.

¹⁶I maribén sys maškír Asaste i Vaasaste, kralíste Izrail'skoneste, dre saré dyvesá léngire.

¹⁷I vygijá Vaasa, králi Izrailjoskiro, proti Judéia, i lyjá te kerél Ráma, sob (kaj) nikón te na vydžál i te na zadžál ke Asá, králi Judejákiro.

¹⁸I lyjá Asá saró rup i suvnakái, savó sys jačkirdo dre piraliá kučipnaskire dro Kher Ráskire-Devléskiro, i dyjá les dre vastá dynar'jénge peskirenge, i bičhadiá len králi Asá ke Vienadado, čhavó Tavrimonoskiro, čhavó Xiezionoskiro, králi Sirijákiro, savó dživdiá ke Damásko, i phendiá:

¹⁹“Dorakiribén (sojuzo) mek te javél maškír mánde i maškír túte, syr sys maškír dadéste mireste i maškír tyré dadéste; ĥáda, me bičhaváva túke dro dáro rup i suvnakái; roskuš dorakiribén tyró Vaasasa, králi Izrailjoskiresa, sob (kaj) jov te otdžal mándyr.”

²⁰I kandyjá Vienadado kralís Asas, i bičhadiá péskire xaladéngire barydyrén proti Izrailjoskire fórja, i rozmardiá Aino i Dano, i Aviel-Bief-Maaha, i saró Kinierofo, pir sarí phuv Niefalimsko.

²¹Syr šundiá pal davá Vaasa, to pirijaciá te kerél Ráma i risijá dre Firca.

²²Králi Asá khardiá sarén Judejakiren, nikonés na promeki, i vylydžiné jone Ramatyr bará i vešá, savé Vaasa mekciá te čhuvél kherá. I kerdiá léndyr králi Asá Givá Vieniaminoskiri i Micpa.

²³Saré javír réndy (diély) Asaskire, i saré slavutna réndy (podvigi) léskire, i saró, so jov kerdiá, i fórja, savé jov kerdiá, isyn začhindlé dre beršýtka arhívy kral'jéngire Judejátyr, apríč dová, so dro phuripen péskiro jov sys nasvaló ĥerénca.

²⁴I myjá Asá i garadó sys péskire dadénca dre fóro Davidóskiro, péskire dadéskiro. I Iosafáto jaciá králi, čhavó léskiro, pe štéto léskiro.

²⁵O Navato, čhavó Jerovoamoskiro, jaciá králisa pe Izrailjo dro javír berš Asáskiro, Judejákire kralískiro, i sys králi pe Izrailjo duj berš.

²⁶I kerdiá jov fuipén angíl jakhá Ráskire-Devléskire, psirdiá péskire dadéskire dromésa i dre gréhi léskire, savénca odová zalydžijá Izrailjo dre grého.

²⁷I kerdiá zrakiribén proti léste o Vaasa, čhavó Ahijoskiro, kheréstyr Isaharoneskirestyr, i zamardiá les Vaasa pašýl Gavafono Filistimsko, kiéli Navato i saré Izrail'tiáni občhuvenas trusciál Gavafono.

²⁸I zamardiá les Vaasa pe tríto berš Asáskiro, kralískiro Judejakireskiro, i jaciá králi pe štéto léskiro.

²⁹Kiéli jov jaciá králi, to tedy vymardia saró kher Jerovoamoskiro, i na jačkirdiá ni jekh di Jerovoamostyr, paka na zamardiá les, pir lav Ráskire-Devléskiro, savó Jov rakirdiá pirdál pishariste Peskireste, Ahiiaste Silomlianinoste.

³⁰Pal gréhi Jerovoamoskire, savé jov kokoró kerdiá, i savénca lydžijá dro grého Izrailjo, pal kirkipen, savésa jov xoliakirdia Ras-Devlés, Devlés Izrailjoskires.

³¹Javír réndy Navatoskire, saró, so jov kerdiá, isyn začhindlé dre beršýtka arhívy kral'jéngire Izrailjoskire.

³²I maribén sys maškír Asaste i Vaasaste, kralíste Izrailjoskireste, dre saré dyvesá léngire.

³³Pe tríto berš Asáskiro, syr kralís Judejakires, jaciá králi Vaasa, čhavó Ahijoskiro, pe saré Izrail'tianende dre Firca, i sys králi biš te štar berš.

³⁴I kerdiá fuipén angíl jakhá Ráskire-Devléskire, i psirdiá dromésa Jerovoamoskiresa i dre gréhi léskire, savénca odová lydžijá dro grého Izrailjo.