Read Biblija - Pe Baltitko Romani čib (Romanes) 2019 Baltic Romani Bible 4 Kralip 11 Bible Online

4 Kralip 11 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 11

¹E Gofolija, Ohozijaskiri daj, dykhí, so lákiro čhavó myjá, uštyjá i vymardia saró kralískiro ródo.

²Ne e Iosaviéf, Ioramoskire-kralískiri čhaj, Ohozijaskiri phen, lyjá Ioasasos, Ohozijaskire čhavés, i čorahanés lydžijá les krig mulé kralískire čhavéndyr, les i nian'ka leskirja, dre soibnytko štúba; i garadé les Gofolijatyr, i jov na sys zamardo.

³I sys jov lása garadó dro Ráskire-Devléskiro Kher šov berš, syr Gofolija sys králica pe phuv.

⁴Pe eftáto berš bičhadiá Iodajo, i lyjá barydyrén pe šelá rakhibnar'jende i manušén, savé sýges psiréna, i jandiá len ke pe dro Devléskiro Kher, i kerdiá lénca dorakiribén, i lyjá léndyr sovél dro Ráskire-Devléskiro Kher, i sykadiá lénge kralískire čhavés.

⁵I dyjá lénge priphenybén, phení: “Ĥáda, so tumé kerén: tríto paš tuméndyr, savé javénas dro sávato (subóta), javéla te rikirél stréga pašýl kralískiro kher.

⁶Tríto paš javéla pašýl pórta Suro, i tríto paš pašýl pórta palál rakhibnar'jénde. I rikirén stréga kheréske, sob (kaj) te na javél phagirdó nisó.

⁷I duj pašá tuméndyr, saréndyr, savé džána dro sávato (subóta), javéna te rikirén stréga pašé bi Ráskire-Devléskiro Kher vaš kralíske.

⁸I zalen muj (obkrengliakiren) kralís saré rigéndyr, kažno (sváko) mardytkonesa (oružyjosa) peskiresa dre péskire vastá; i kon zagijá by dre riady, odová mek te javél zamardo. I javén pašé kralíste, kiéli jov vydžála i kiéli zadžála.”

⁹I kerdé šelytka saró, so priphendiá Iodajo rašái, i lyné kažno peskiren manušén, savé sys javi dre sávato i savé giné péske dre sávato, i javné ke Iodajo rašái.

¹⁰I rozdyja rašáj šelytkonenge čhurdybnytka bustiá (kop'i) i ščýty Davidóskire kralískire, savé sys dro Ráskire-Devléskiro Kher.

¹¹I terdiné manušá, savé sýges psiréna, kažno mardytkonesa (oružyjosa) dro péskiro vast, čačé-kheréskire rigátyr ke zérvo (liévo) kheréskiri rig, pašo altárjo i pašo kher, trusciál kralíste.

¹²I vylydžyja jov kralískire čhavés, i čhudiá pe léste kralískiri koróna i šukarjakiriben, i kerdé kralísa les, i pomakhne les, i mardé dre vastá i godlenas radymása: “Mek te dživél králi!”

¹³I šundiá Gofolija zan manušéngiri, savé prastándyne, i gijá ke manušá dro Ráskire-Devléskiro Kher.

¹⁴I dykhéla, i ĥáda, králi sys terdó pe vučipén, syr isyn prilyno, i thagárja, i rógi pašýl kralíste; i saré manušá phuv radynénape, i bašavena rogénca. I roskustia Gofolija péskire ídi, i zadyja godly: “Zrakiribén, Zrakiribén!”

¹⁵I dyjá priphenybén rašáj Iodajo šelytkonenge, barydyrénge pe xaladénde, i phendiá lénge: “Vylydžan la pal rakhibnar'jengire riady; a kon džála pal láte, zamarén kurtalása, adiáke syr dumindia o rašái, sob (kaj) te na zamarén la dro Ráskire-Devléskiro Kher.

¹⁶I dyné láke štéto, i joj gijá pirdál zagiibén grengiro ke kralískiro kher, i zamardé la odój.

¹⁷I kerdiá Iodajo zaviéto maškír Raste-Devléste, i maškír kralíste, i maškír manušénde, sob (kaj) jone te javén Ráskire-Devléskire manušénca, i maškír kralíste, i manušénde.

¹⁸I giné saré manušá phuvjákire dro Vaaloskiro kher, i rosphagirdé léskire altári, i léskire figury sarésa rozmarde, i Matfanos, rašás-žriecos Vaaloskires, zamardé angíl altári. I čhudiá rašáj dykhibén pal Kher Ráskire-Devléskiro.

¹⁹I lyjá šelytkonen, i rakhibnar'jen, i manušén, savé sýges psiréna, i saré phuvjákire manušén, i lydžiné kralís Ráskire-Devléskire Kheréstyr, i javné pir drom pir rakhibnar'jéngire pórta dro kralískiro kher; i jov bestiá pe kral'jéngiro trono.

²⁰I radyndlepe saré phuvjákire manušá, i fóro štylyja. A Gofolija muliakirdé kurtalása dro kralískiro kher.

²¹Eftá berš sys Ioasoske, kiéli jov jaciá kralísa.