Read Biblija - Pe Baltitko Romani čib (Romanes) 2019 Baltic Romani Bible 4 Kralip 12 Bible Online

4 Kralip 12 - Biblija - Pe Baltitko Romani čib (Romanes) 2019 Baltic Romani Bible bible

4 Kralip 12

¹Pe eftáto berš Iiujoskiro, jaciá kralísa Ioáso, i jov štardešá berš sys kralísa dro Jerusalimo. Lav léskire dákiro sys Cyvja, Virsavijatyr.

²I kerdiá Ioáso dová, so sys lačhés dre Ráskire-Devléskire jakhá dre saré péskire dyvesá, paka sykliakirdiá les rašáj Iodajo.

³Jekh vučé štéty na sys rozrade; manušá iščo (inké) janénas svénta dyibená i xačkirdé dróga smóly pe vučipená.

⁴I phendiá Ioáso rašange: “Saró rup isyn obsvencyndlo, savó janéna dro Ráskire-Devléskiro Kher, rup manušéndyr, savé javénas, rup, savó vylydžana pal kažno (sváko) di pir timín, saró rup, ci but konéske javéla pe iló te janel dro Ráskire-Devléskiro Kher.

⁵Mek te len rašaja péske, kažno péskire džindlé manušéstyr, i mek jone te podkeren, so sys phagirdó dre Khangirí; pe kažno štéto usiéndie (viezdie), kaj lathelape phagiriben.”

⁶Ne syr ke biš te tríto berš, kiéli lyjá te kralinél Ioáso, rašaja na podkerde phagiriben dro Khangirí,

⁷to tedy o králi Ioáso khardiá rašás Iodajos i rašán i phendiá lénge: “Sóske tumé na keréna riemónto pe phagiriben dre Khangirí? Na len akaná rup péskire pindžkirdendyr, a lové te riemontynen phagiriben dre Khangirí otdén pale.”

⁸I jačné dre jekh godý rašaja te na len rup manušéndyr te riemontynen phagiriben dre Khangirí.

⁹I lyjá rašáj Iodajo jekh mohtó (jaščyko), i kerdiá kula (otvierstijo) upré léstyr, i čhudiá les pašýl altárjo pe čačí (pravo) rig, kaj zadžána dro Ráskire-Devléskiro Kher. I čhudé odorík rašaja, savé sys terdé pe rakhiben pašýl progo, saró rup, savó janénas dro Ráskire-Devléskiro Kher.

¹⁰I kiéli jone dykhné, so but rup sys dro mohtó (jaščyko), to javélas lylá-čhibnaskiro (pisarjo) kralískiro i anglatunó rašái, i zaphandena dre goné, i piriginenas rup, savó sys lathno dro Ráskire-Devléskiro Kher.

¹¹I otdenas pirigindlo rup dre vastá manušéngire, savé dykhné pal butiá, konés čhudé pe butý ke Ráskire-Devléskiro Kher, a odolé lenas les pe kherá-keribnaskirende (plotnikende) i strojkakirende, savé kerdé butý dro Ráskire-Devléskiro Kher.

¹²I pe manušénde, savé kerdé vánty i pe butiarnende, savé vyčingirenas bará, adiáke-pac' pe kinyben veš, i obkerde bará, te riemontynen phagiriben dro Ráskire-Devléskiro Kher, i pe saró, so rozgijápe vaš Khangirjákiro podrikiribén.

¹³Ne na sys kerdé vaš Ráskire-Devléskiro Kher rupuvé čaré, čhurja, tahtaja (čašy) te počhuven, rógi (truby), kažna khoré suvnakuné i khoré rupéstyr, savé sys jandlé dro Ráskire-Devléskiro Kher.

¹⁴A manušénge, savé kerénas butý, otdenas les, i čynindle lénge Ráskire-Devléskiro Kher.

¹⁵I na phučné otphenybén odolé manušéndyr, savénge dopatianas rup te rozden manušénge, savé kerdé butý; pal-dová so jone kerdé čačunés.

¹⁶Rup pal svénto janybén Ráske-Devléske pal čoripén i rup pal svénto janybén Ráske-Devléske pal grého na janénas dro Ráskire-Devléskiro Kher: rašange jov sys te otdelpe.

¹⁷Tedy vygijá dro drom Azailo, králi Sirijákiro, i gijá maribnása pe Giéfo, i lyjá les; i skedyjape Azailo te džal pe Jerusalimo.

¹⁸Ne Ioáso, králi Judejákiro, lyjá saró, so sys jandlo syr dáro, so jandlé vaš Khangirí, i Iorámo i Ohozija, dadá léskire, králja Iudejakire, i so jov kokoró jandiá syr dáro, i saró suvnakái, savó sys lathno dre piraliá dro Kher Ráskire-Devléskiro i dro kher kralískiro, i bičhadiá davá Ioáso Azailoske, kralíske Sirijakireske; i jov otgijá Jerusalimóstyr.

¹⁹Javír pal Ioasoste i pal saró, so jov kerdiá, sys začhindló dre beršýtka arhívy kral'jénge Judejakirenge.

²⁰I ĥazdynépe léskire dynárja, i zrakirdepe, i muliakirdé Ioasos dro kher Miloskiro, pe drom ke Silo.

²¹Les zamardé léskire dynárja: Iozakaro, Šymietoskiro čhavó, i Jegozavado, čhavó Šomieroskiro: i jov myjá, i garadé les dadénca leskirenca dro Davidóskiro fóro. I jaciá kralísa Amásija, čhavó léskiro, pe štéto léskiro.